Naan in Katak an Kōrā ro, Nobōm̧ba 2013
Itok, Kobatok Ippām̧
Jekdo̧o̧n jekjek rot ko ami, kain armej rot kom̧, ak kajoor in naan in kam̧ool eo ami, ewōr jikin n̄an kom̧ ilo Kabun̄ in.
Juon tōre eaar wōr juon em̧m̧aan eo eaar ettōņak bwe ke eaar pād ilo juon em kileplep ijo aolep kabun̄ ko ilo laļ in raar kuk ippān doon. Eaar kile bwe kajjojo kabun̄ āinwōt n̄e elap aer aorōk im wānōk.
Eaar ioon ripālele ro me rej bōk jikin Kabun̄ eo an Jisōs Kraist im Armej ro Rekwojarjar ilo Raan-ko Āliktata im kar kajjitōk, “ta eo kom̧ij kōnaan jen membōr ro ami?”
“Jej jab aikuji jabdewōt men,” eaar uwaak. “Ak Irooj ej kajjitōk bwe jej kōkwojarjar aolep.”
Ripālele rein raar etal wōt im kōmeļeļeik kōn kūr ko ilo Kabun̄ in, katak ko ilo m̧oko im jerbal in loļo̧k ko an kōrā ro, jerbal ko an mijen aolep raan, nokon in jota ko kajjojo an baam̧le, jerbal in tam̧peļ, welfare im jerbal in jipan̄, im ijjitōn̄ ko n̄an katakin.
“Kom̧ij ke kōļļāik armej ro ami kōn jerbal ko rej kōm̧m̧ani? em̧m̧aan eo eaar kajjitōk.
“O, jaab,” ripālele ro raar kōmeļeļeiki. “Rej leļo̧k iien ko aer make.”
“Barāinwōt,” ripālele ro raar ba. “kajjojo jiljino allōn̄ ko membōr ro ilo Kabun̄ in rej jolo̧k juon weekend ak 10 awa ko n̄an alooje kweilo̧k eo eļap.”
“Jon̄oul awa in an armej ro kōnono?” Em̧m̧aan eo eaar bwilōn̄.
“Ak kōn iien kabun̄jar ko ami kajjojo wiik? Ewi jon̄an aetokier?”
“Jilu awa ko, aolep Jabōt!”
“O, em̧m̧aan,” eo eaar ba. “Membōr ro an kabun̄ eo am̧ rej ke kōm̧m̧ane ta eo kwoj ba?”
“Men ņe im elōn̄ļo̧k. Kōm̧ij jan̄in kwaļo̧k family history, kāām ko an jodikdik, nokon in jota ko, ekkatak jeje ko rekwojarjar, kweilo̧k in kaminene an ritōl ro, m̧akūtkūt ko an jodikdik, jemenere in jibbon̄, n̄an kōm̧anm̧an ļo̧k im̧ōn jar ko, im aaet ewōr juon kien in ājmour an Irooj, jitlo̧k n̄an jipan̄ rijeram̧ōl ro, im juon m̧ōttan jon̄oul.”
Em̧m̧aan eo eaar ba, “Kiiō ipok. Etke elōn̄ armej rekōņaan in koba ilo kain kabun̄ rot in?”
Ripālele ro raar ettōn̄ im ba, “Kōm̧ ar kōtmene bwe kojamin kar kajjitōk.”
Etke elōn̄ armej rekōņaan in koba ilo kain kabun̄ rot in?
Ilo tōre in elōn̄ kabun̄ ko ipeļaakin laļ in rej idajon̄jon̄ e dikļo̧k in oran membor ro aer, Kabun̄ eo an Jisōs Kraist im Armej ro Rekwojarjar ilo Raan-ko Āliktata—edik ilo keidi ippān elōn̄ ro jet—ej juon iaan kabun̄ ko rej eddōkļo̧k ilo laļ in. Ilo Jeptōm̧ba 2013 elōn̄ļo̧k jen 15 milien membōr ro ilo Kabun̄ in peļaakin laļ in.
Elōn̄ un ko n̄an menin, ak imaron̄ lewaj wōt jejjo iaer?
Kabun̄ eo an Rilo̧mo̧o̧r
Juon, Kabun̄ eo eaar jepļaaktok ilo raan eo ad jen Jisōs Kraist Make. Ijin kom̧ naaj loe mālim eo n̄an jerbal ilo Etan—n̄an peptaij n̄an jeorļo̧k jerawiwi ko, n̄an leļo̧k ioon menin letok eo an Jetōb Kwojarjar, im n̄an liāp ioon laļ im ilo lan̄.1
Ro rej kobatok ilo Kabun̄ in rej iakwe Rilo̧mo̧o̧r Jisōs Kraist im rej kōņaan ļoor E. Rej lan̄lōn̄ ilo jeļāļo̧kjeņ bwe Anij ej kōnono bar juon alen n̄an armej. N̄e rej bōk kain̄i ko rekwojarjar an priesthood im kōm̧m̧an bujen ko ippān Anij, rej en̄jake kajoor eo An ilo mour ko aer.2 N̄e rej deļo̧n̄e tampeļ eo ekwojarjar, rej āinwōt n̄e rej pād im̧aan Mejān. N̄e rej riiti jeje ko rekwojarjar3 im mour kōn katak ko an rikanaan ro An, rej eddōkļo̧k epaake Rilo̧mo̧o̧r eo rej lukkuun iakwe.
Juon Tōmak Edim
Bar juon un ej kōnke Kabun̄ eo ej leļo̧k iien em̧m̧an ko n̄an kōm̧m̧an em̧m̧an.
Tōmak ilo Anij elukkuun em̧m̧an, ak jet armej rekōņaan kōm̧m̧an em̧m̧anļo̧k ijjelo̧kin ron̄jake katak ko reim̧we ak ļōmņak kōn em̧m̧an eo naaj kakkijeik er ilo lan̄.4 Rekōņaan in likūt tōmak eo aer ilo jerbal. Rekōņaan in limtake peir im pād ilo jerbal in eļap.
Im en̄in ej ta eo ej waļo̧k n̄e rej kobatok ippād—ewōr ippāer iien ko rem̧m̧an n̄an kōkāāl taļōn ko aer, tiriam̧o kake, im iien n̄an jerbal ko rem̧m̧an. Kōnke jejjab kōļļāik rikaki ro ilo aolep jikin jar ko ad ipeļaakin laļ in, membōr ro ad rej kōm̧m̧ani jerbal in kwaļo̧k ko kōn er make. Rej kūr jen im̧we. Jet iien jej baļintiir; jet iien jaar kōm̧m̧an “baļintiir.” Jej lo ijjitōn̄ ko me āinwōt rejjab eddo ak āinwōt iien ko rem̧m̧an n̄an kakūrm̧ool bujen ko jej m̧ōņōņō in kōm̧m̧ani n̄an jerbal n̄an Anij im ajri ro Nejin.
Kōjeram̧m̧an ko kar Kaorōki
Un eo kein kajilu bwe armej ren kobatok ilo Kabun̄ in ej kōn mour juon mour āinwōt rikaļoran Kraist eo ej tōl ļo̧k n̄an kōjeram̧m̧an ko raorōk.
Jej lo bwe peptaij ej ijjino eo ilo ad erom rikaļoran. Ad etetal ippān Jisōs Kraist kajjojo iien ej tōl ļo̧k n̄an aenōm̧m̧an im unjen mour in im lo lan̄lōn̄ im lo̧mo̧o̧r indeeo ilo laļ eo tokālik.
Ro retiljek rej ļoor iaļ in rej bōbrae elōn̄ kauwōtata ko, būrom̧ōj ko, im pere ko an mour in.
Ro rejeramōl ilo jetōb im em̧ool buruweer rej lo elap jinokjij in jeļāļo̧kjeņ ijin.
Ro rej en̄taan ak limō pukōt kōmour ijin.
Ro rej eddodo kōn jerawiwi rej pukōt jeorļo̧k bōd, anemkwoj, im kakkije.
N̄an Ro Rej Em̧m̧akūt
Pukōt m̧ool eo eaar tōļ milien armej ro n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Mekarta, ewōr jet ro rej em̧m̧akūt jen Kabun̄ in kar juon iien raar iakwe.
Juon emaron̄ kajjitōk, “Eļan̄n̄e ko̧jpeļ in elukkuun em̧m̧an, etke elōn̄ armej rej em̧m̧akūt?”
Jet iien jemaron̄ ļōmņak kōnke raar illu ak jowan, ak jerawiwi. Ilo m̧ool, ejjab pidodo menin. Ilo m̧ool, ejjeļo̧k juon un emaron̄ jerbal n̄an elōn̄ jekjek ko.
Jet iaan membōr ro ad rejitōn bōro rej en̄taan ium̧win iiō kōn kajjitōk in eļan̄n̄e rej aikuj kōjono̧lo̧k er make jān Kabun̄ in.
Ilo Kabun̄ in me ekanooj rie anemkwoj eo an juon make n̄an kelet, me eaar kōjepļaaktok kōn juon ļaddik edik eo eaar kajjitōk kajjitōk ko im kar pukot uwaak ko, kōm̧ij kautiej ro em̧ool aer pukot m̧ool eo. Emaron̄ lukkuun kabūrom̧ōjm̧ōj n̄e iaļ in aer ebōk er jān Kabun̄ in jej iakwe im m̧ool eo em̧ōj ad kar loe, ak kōm̧ij rie jim̧we eo aer n̄an kabun̄jar n̄an Anij Ekajoor Pōtata ekkar n̄an ta eo rej tōmak e ejim̧we, ilo ad ejja bar āinwōt kōm̧m̧ane n̄an kōj make.5
Kajjitōk ko Rejjan̄in Uwaak
Jet rej en̄taan kōn kajjitōk ko rejjan̄in uwaak kōn men ko em̧ōj kōm̧m̧ani ak ba m̧okta. Jej lukkuun kile bwe enan̄in 200 iiō ko ilo bwebwenato an Kabun̄ in—ippān ļo̧k wāween ad maron̄ bōk im̧we eo ejjab jem̧ļo̧k, aorokiier, im iien ko retinkwadik—ewōr jet men ko kar ba im kar kōm̧m̧ani me armej remaron̄ kar kajjitōk.
Jet iien kajjitōk ej jarjar kōnke jej jab jeļā aolep meļeļe ko im jej aikuj jidik iien kijenmej. N̄e aolepān m̧ool eo ej waļo̧k, men ko rej jab alikkar n̄an kōj m̧okta naaj uwaak n̄an kōņaan eo ad.
Jet iien ewōr juon oktak ilo ļōmņak n̄an ta lukkuure meļeļein “m̧ool ko.” Juon kajjitōk emaron̄ kwaļo̧k pere ilo kōļmenļo̧kjeņ an armej, ālkin lukkuun etale, kalōk tōmak ioon ro jet.
Bōd ko an Armej ro Rej Jab Wānōk
Im, inaaj lukkuun m̧ool, ewōr iien ko n̄e membōr ro ak ritōl ro ilo Kabun̄ rej kōm̧m̧an bōd. Emaron̄ in wōr men ko kar ba ak kōm̧m̧ani me rejjab jejjet jekjek ko ad, pedped ko, ak katak eo.
Ij kile bwe Kabun̄ in emaron̄ in wānōk eļan̄n̄e en kar tōl jen armej ro rewānōk. Anij ej wāppen, im katak ko An rereeo. Ak Ej jerbal kōn kōj—ajri ro Nejin rejjab wāppen—im armej ro rejjab wāppen rej kōm̧m̧an bōd.
Ilo Bok in Mormon jej riit, “Im kiiō, eļan̄n̄e ewōr bōd renaaj bōd ko an armej; kōn men in, jab kabōd men ko an Anij, bwe kwon maron̄ jab libijinjin ilo jea in ekajet an Kraist.”6
En̄in kar baj jekjek eo wōt im naaj āindein an naaj wāppen wōt m̧ae raan eo n̄e Kraist Make naaj irooj ioon laļ in.
Ejerata bwe jet raar wōtļo̧k kōnke armej ro rej kōm̧m̧an bōd. Ak jeļā eo ilo menin, bwe m̧ool eo indeeo an jepļaaktok in ko̧jpeļ eo maron̄ loi ilo Kabun̄ eo an Jisōs Kraist im Armej ro Rekwojarjar ilo Raan-ko im Armej ro Rekwojarjar ilo Raan-ko Āliktata ejjab bōd, ejjab m̧ōjņoļo̧k, ak kar jorrāān.
Āinwōt juon Rijilōk an Irooj Jisōs Kraist im āinwōt juon eo em̧ōj an loe ko̧o̧njeļ ko im jerbal ko ilo Kabun̄ in, Ij kwaļo̧k kam̧ool bwe ejjeļo̧k kālet en eaorōk enaaj jetlet Kabun̄ in ak membōr ro ie ijjelo̧kin wōt Jemedwōj Ilan̄. En̄in ej Kabun̄ eo an Jisōs Kraist. Anij ej jamin kōtļo̧k bwe Kabun̄ eo An en jako jān iaļ in em̧ōj an ba kajien ak likjab n̄an kakūrm̧ool kwojarjar eo an.
Ewōr Ruum̧ n̄an Kom̧
N̄an ro raar kejeno̧ļo̧k er make jān Kabun̄ in, imaron̄ ke ba, ro m̧ōtta rejitōnbōro, aaet ewōr jikum̧ ijin.
Itok im kobaitok tōļan ko am̧, menin letok ko, im kajoor ko n̄an ko am̧. Jenaaj aolep em̧m̧aan ļo̧k āinwot jet tobrak ko.
Jet remaron̄ kajjitōk, “Ak pere ko aō?”
Ekkā an wōr kajjitōk ko—ine eo edik an kappok eo m̧ool ekkā an eddōkļo̧k im kajoorļo̧k ilo juon jon̄ak in meļeļe. Ewōr wōt jejjo membōr ro an Kabun̄ in ro, ilo juon iien ak bar juon, kar jab ire ippān kajjitōk ko reppen ak rekōm̧m̧an m̧ōjņo̧. Juon iaan kōttōpar ko an Kabun̄ in ej n̄an naajdik im ejaake ine in tōmak eo—aaet ilo jet iien bwidej eo eperpere im jab lukkuun jeļā kake. Tōmak ej n̄an kōjatdikdik kōn men ko jab loe ak ko rej m̧ool.7
Kōn menin, ro jeiū im jatū jitōn bōro—ro jera rejitōn bōro—jouj, m̧okta pere pere ko am̧ m̧okta kwoj pere tōmak eo am̧.8 Jej jab aikuj kōtļo̧k pere n̄an dāpij kōj im kalbuuji kōj jān iakwe eo ekwojarjar, aenōm̧m̧an, im menin letok ko rej itok jen tōmak ilo Irooj Jisōs Kraist.
Jet remaron̄ ba, “Ij jab ekkar n̄an kom̧ armej in Kabun̄ ņe.”
Eļan̄n̄e komaron̄ loe ilo būruwōm̧, komaron̄ loe bwe kwoj ekkar eļapļo̧k jen am̧ aikuj. Kwonaaj bwilōn̄ n̄an loe bwe kōm̧ ar januwaade im en̄taan im kōjatdikdik ejja wōt oktak jen n̄an ko am. Ia eo kwar ruttoļo̧k ie im ta eo kwoj jeļā kake emaron̄ oktakļo̧k jen ta kwoj loe ippān elōn̄ Armej ro Rekwojarjar ilo Raan-ko Āliktata, ak emaron̄ in juon jeram̧m̧an. Ro jeiū im jatū, ro jera rejitōn bōro, jej aikuji tōļan ko ami im kapāāl ko. Ukoktak in armej ro ipeļaakin laļ in ej juon kajoor an Kabun̄ in.
Jet remaron̄ ba, “Ij ļōmņak ij jab maron̄ mour kōn jon̄ok ko ami.”
Aolep un ko rellōn̄ļo̧k rej itok! Kabun̄ in eaar ejaak n̄an naajidik eo ejjab wāppen, eo ej ioon apan̄, im eo eaar m̧ōk. Ej obrak kōn armej ro rej kōņaan ilo aolepān būruweer kōjparok kien ko, aaet men̄e rej jan̄in wājepdik kaki.
Jet remaron̄ ba, “Ijeļā kajjien juon membōr in Kabun̄ ņe am ej rijeļā moņ. Ij jamin koba ippān juon kabun̄ ewōr kain armej āinwōt e āinwōt juon membōr.”
Eļan̄n̄e kwoj kōmeļeļeik rijeļā moņ āinwōt juon armej ej likjab n̄an mour wāppen n̄an ta eo ļeo ak lio ej tōmak, innām kōj aolep rej rijeļā moņ. Ejjeļo̧k iaad ej āinwōt Kraist ilo ad jeļā bwe jej aikuj erom. Ak jekōņaan in eļļā ioon bōd ko ad im kōņaan in jerawiwi. Kōn būruwōd im ad jej jānuwaade ad em̧m̧anļo̧k jen jipan̄ eo an Pinmuur eo an Jisōs Kraist.
Jekdo̧o̧n jekjek rot ko ami, kain armej rot kom̧, ak kajoor in naan in kam̧ool eo ami, ewōr jikin n̄an kom̧ ilo Kabun̄ in. Itok, Kobatok Ippām̧!
Itok, Kobatok Ippām̧!
Ilo en̄jake in jab wānōk ko ad, ij lukkuun jeļā bwe kom̧ naaj lo ilubwiljin elōn̄ membōr ro ilo Kabun̄ eo ro erreo buruweer rej mour ioon lal in. Kabun̄ eo an Jisōs Kraist ej kan̄al tok armej ro rejouj im kea, rem̧ool im rōwan.
Eļan̄n̄e kōtmane n̄an elolo armej ro ejjelok ņotaer ijin, kwonaaj ajlok. Ak eļan̄n̄e kwoj pukōt katak eo an Kraist erreeo, naan eo an Anij “eo enaaj kemour jetōb eo ekinejnej,”9 im kokwojarjar im̧we eo an Jetōb Kwojarjar, innām kwonaaj elolo ijin. Ilo tōre in idajon̄jon̄ e tōmak—in tōre in ijo ekanooj lōn̄ en̄jake ko rettoļo̧k jān iakwe eo an Anij—ijin kwonaaj loe juon armej eo jānuwaade n̄an jeļā im kepaakļo̧k Rilo̧mo̧o̧r eo aer jen jerbal n̄an Anij im armej ro, āinwōt kwe. Itok, Kobatok Ippām̧!
Kom̧ In Ke Bar Etal?
Ij kememej ļo̧k juon tōre ilo mour eo an Rilo̧mo̧o̧r ke elōn̄ raar kowaan E. 10 Jisōs eaar kajjitōk ippān rikaļoor ro An:
Kom̧ In Ke Bar Etal?
“Innem Simōn Piter e uwaak E, “Irooj, kōm naaj ilo̧k wōt n̄an wōn? Ippam̧ naan ko naan in mour indeeo.”11
Ewōr iien ko n̄e jej aikuj in uwaak e ejja kajjitōk in. Kom̧ In Ke Bar Etal? Ak jen ke āinwōt Piter, dāpij wōt naan in mour indeeo?
Elan̄n̄e kwoj kappukot m̧ool, meļeļe, im juon wāween n̄an ukot tōmak n̄an jerbal; eļan̄n̄e kwoj pukot juon jikin kwaam ņak ie: Itok, Kobatok Ippām̧!
N̄e kwaar etal jen tōmak eo am kwaar kautiej: Bar ro̧o̧ltok. Itok, Kobatok Ippām̧!
Eļan̄n̄e kwaar mālijjon̄ n̄an ebbeer: Pād jidik iien eaitokļo̧k. Ewōr Ruum̧ n̄an Kom̧ Ijin.
Ij akweļap ippāmi ro rej ron̄jake ak riiti naan ko: Itok, Kobatok Ippām̧. Itok eo̧ron̄ kūr eo an Kraist. Bōk am̧ dōbwāāl im ļoor E.12
Itok, Kobatok Ippām̧! Bwe ijin kwonaaj loe ta eo em̧m̧anļo̧k ilōn̄ļo̧k wōnāān.
Ij kam̧ool bwe ijin kwonaaj loe naan ko an mour indeeo, kalim̧m̧ur in kōjeram̧m̧an an pinmuur, im iaļ eo n̄an aenōm̧m̧an im m̧ōņōņō.
Ij jar bwe am make kappukōt m̧ool eo naaj kareel būruwōm̧ ikdelel eo n̄an itok im kobatok ippām̧. Ilo etan ekwojarjar Jisōs Kraist, amen.
© 2013 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/13. Kōmālim an ukook: 6/13. Ukook eo an Visiting Teaching Message, November 2013. Marshallese. 10671 874