Baed, Ngomad

Nap’an e ngiyal’ nap’an bo’or e galasia ulongob e fayleng e ba n’ag e math’eg ko chongin, fare Galasia ku Yesus Kristus—arragon ba’chigchig ko reb e galasia—be garar nib papay ufithik e galasia ko fayleng. Nap’an e September 2013 ko fare Galasia bay 15 million chongin ulongob e fayleng.

Bay bo’or e fan, machane rayog Ningu pii’ boech’uw?

Bin somm’on, biney e Galasia kan sulweg ko tiney e rran rodad udakaen Yesus Kristus. Ulangin gara pir’yeg e matawon ningan muruwel ufithik e Fithingan— tawfe ko n’ag fan e denen, ningan pii’ fare taw’ath ko fare Kan Thothup, man m’ag e tin u fayleng nge tharmiy.¹

E gidii’ nira un ko Galasia ney ma un bachan yad ba’adag en Somoel Yesus Kristus mar ba’adag ningar Leked. Kar faflaen’gad ko llowan’ ni Got e ma non ngak e gidii’ bayay. Nap’an yaed ba thapeg fare gam’ing ko priesthood ma fi’leg e michmich ko Got, rayog ningar thamiyed gelngin Rok u yafas roraed.² Nap’an ranoed ulangin fare temple nib thothup, yaedra thamiy e tagil Rok. Nap’an yaedra biy’eg fare babyor nib thothup³ ma fol e machib rok fapi profet Rok, yaedra garar ngak en Somoel nib t’uf ngoraed.

Reb e fan i’ir bachan fare Galasia ma bing e wo’en ningar rrin’ed e tin nib fel’.

E michaen’ ngak Got e rib fel’, machane boech e gidii’ ba’adag ni nge rrin’ ba’nen ko bin kemus ni nge motoyil ko welthin nib fel’ fa lik’ay marunag’en na’un u lane lang.⁴ Yaedba’adag ningar ngongoliyed e mich roraed. Yaed ba’adag ningar fi’leged e kengin roraed mar uned ko muruwel nib ga’.

Tinem ra buch nap’an e gidii’ ra mukun ngomaed—bay bo’or e wo’en ningar thilyeg e salap roraed, runguy, ma ngiyal’ ko e ngongoliy nib fel’. Bachan dariy’ e clergy nibe fek e salpiy u mo’olung ulongob e fayleng, e chongin rodad e ma mugu’uliy e muruwel ko galasia. Kan pinningraed ufithik e yi’iy. Boech e ngiyal’ gamadra volunteernog; boech e ngiyal’ bee’ be “volunteernogdad.” Gamad manang ni muruwel e gathi tomal machane e wo’en ngad mugu’uliyed e michmicheg romad ningad pigpig gad ngak Got ma bitir Rok.

Bin delip e fan ni gidii’ e ma un ko Galasia e bachan e milekag ko kanawo’en gachalpen ba yaen ngak e taw’ath nib pulowon.

Tawfe i’ir e ta’bab ko milekag rom ko gachalpen. E milekag ku Yesus Kristus e ra powiy’em ngak e gapas nge fan ko yafas ma faflaen’ nge yafas nib manemus u fayleng ni bay yib.

E gidii’ nira fol biney e kanawo’ ufitik e mich ra chuw ko e dibchay, kirebaen’, nge tin kireb ko yafas.

Fare gidii’en gafgow ko ya’el nge miyuluy ko gum’racha’en ra piry’eg e nang fan nib ga’ pulowon uroy.

E gidii’ nib gafgow fa kirebaen’ ra piriy’eg e gol uroy.

E gidii’ ba tomal ko denen ra piriy’eg e n’ag fan, puf rogon, ma tofan.

E piriy’eg ko tin riyul’ kan powiy’ bo’or biyu’ e gidii’ ngak fare Galasia ku Yesus Kristus. Machane, bay boech e gidii’ ni kar chuwgad ko fare Galasia nib t’uf roraed.

Sana e bee’ ra fith, “Fa’anra marib fel’ e gospel, mang fan bee’ nira chuw?”

Boech e ngiyal’ gadadra lemnog i’ir bachan kar fek ya thin fa malmal fa denen. Machane, i’ir gathi mom’. Nib riyul’, gathi kemus ta’areb e fan ko pin’nem.

Boech e chongin nib t’uf era cham ko fare duwer ni fan ni ningar chuwgad ko fare Galasia fa dangay.

U Galasia ney nib liyoer ko puf rogon ningan me’leg; u Galasia ney, ni kan fulweg udakaen e pou’moon ni bay e duwer rok maki gay e fulweg tabon, gamadba tay’fan e gidii’ nima gaey e tin riyul’. Ra pii’ e kirebaen’ nga gum’racha’dad nap’an e milekag roraed be fekraed nib palog ko fare Galasia ma tin riyul’ kug piry’eged, machane gadadba liyoer ko puf rograed ningar liyoer gad ngak Got ni Gubin Rayog Rok ko lem roraed, woed rogon ngad rrin’ed.⁵

Boech e gidii’ ba cham ko duwer ni dawori fulweg maruna’gen e tin ni kanoeg fa ke buch. Gamadma nang ni ulane 200 e duw ko chepin e Galasia—ma ko gidii’ nib gel bugwaen, liyoer, nge tin ko mich—bay boech e tin ni kan yoeg ma buch nira pii’ e duwer ngak e gidii’.

Boech e ngiyal’ e duwer ra yib bachan dawor ningu athapeg urning e nang fan ma thingar ningad’ gumaen’dad. Nap’an urngin e riyul’ ra yib, e tin ni dani mudugil u somm’on e ra mang e nang fan u fel’ laniyaen’dad.

Boech e ngiyal’ bay e thil u laniyaen’ e gidii’ ko mang e “tin riyul” e ba yip fan. E duwer nira pii’ e muluwaen’ ko boech e gidii’ e rayog, tomuren nikan fil, era toey e mich ko reb e gidii’.

Nge, ningu non ufithik e riyul’, bay e ngiyal’ nap’an e chongin fa tapowiy’ ko fare Galasia kar oloboechgaed. Nap’an ke buch e ban’en nib kireb lowaen’ fa gathi fel’ ko kenginn e yalen, Gube pinning e siro’.

Gube lemnog fare Galasia ra mang e machalboeg fa’anra ba suwey e gidii’ nib machalboeg. Got i’ir machalboeg, ma ba machalboeg e machib Rok. Machane irma muruwel udakaendad—bitir Rok e de machalboeg—ma gidii’ de machalboeg e ra oloboech.

Ulan fare Babyor ku Mormon gadadra biy’eg, “Ere chiney e, fa’anra bay e tagan ma bogi oloboch ko gidii’; ere, dab ni gay thibngin e tirok’ Got ban’en, me yog ni ngan pir’eg med ni dariy thibngimed u tagil’ e pufthin rok’ Kristus”⁶

Aray rogon u somm’on mada’ ko fare rran nib machalboeg wi’in Kristus Ir e ra Suwey nga dakaen e fayleng.

Nib kireb ni boech e kan dol’ ni fan e oloboech ko gidii’. Machane dariy’ fan e oloboech, e tin riyul nib manemus ko fare gospel ni kan fulweg nge fare Galasia ku Yesus Kristus dabki tagan’, chigchignog, fa gathaynog.

I gag e Apostal ko en Somoel i Yesus Kristus mug guy u oewcheg fapi mo’olung nge muruwel ko biney e Galasia, Gube pii’ e m’ag nib ga’fan dariy’ e me’leg nira tay ma yaen ko Galasia nge gidii’ rok ni kan me’leg u somm’on e meybil nge yaen ko e likngin e lowaen ko powiy’. Ireray bin riyul’ e Galasia rok Yesus Kristus. Got dabi pag e muruwel rok ninge malog.

Ko gidii’ nikar chuwgad ko fare Galasia, rayog Ningu yoeg bay e tagil’ ni fanam?

Baed mu pethpeth niged e salap romed, taw’ath nge gelnginmed ngomaed. Ra soer ningad manged nib fel’.

Boech ra fith,“Machane mang fan bay e muluwaen’mad?”

Nib fel’ rogon ni bay e duwer—fare awoch ko e nang fan e ke tugul maki ga’nag ko gak’iy nib ga’ ko nang fan. Kemus buchuw e chongin ko Galasia, ko boech e ngiyal’, dabki cham ko e duwer nib almarin fa ga’. Reb fan ko fare Galasia ningan tuguliy man ayuweg e awoch ko mich—arragon ufithik e yan’ ko mada ko muluwaen’ nge kirebaen’. Mich i’ir e athap ko urngin e ban’en ko tin dawori guy machane ba riyul’.⁷

Walageg nib mo’on nge ppin—Gube wenig ngom—muluwaen’ ko tin ni gaba muluwaen’ u somm’on ningam muluwaen’ ko mich rom.⁸ Dabiyog ningad pii’ rogon ngak e muluwaen’dad ninge kalbusnogdad ma fekdad ko t’ufeg nu tharmiy, gapas, nge bin thabi ga’ puluwon e taw’ath nira yub ufithik e mich ngak en Somoel i Yesus Kristus.

Boch e gidii’ e sana rayog ni,,“Dabi fel’ rogog u fithik I gimed e gidii’ u lane Galasia.””

Fa’an rayog ni ngam guy lan gumirchaen’mad, sana rayog ni ngam guy ni gara paer nib mangil boch ni gathi rogon ni gabe lemnag. Sana gara gin ngay nikam patngay nibay ea ar’ar’ nge magawon nge athap nib toborgon ko tirom. Rogon nim ilal ea sana wad nib thil rogon ko pi Gidii’en Got ko Tin Tomur e Rran, machane rayog ni banen nib tawa’ath. Walageg ni pum’on nge bpin, pi fagar, ba t’uf e tin ni gimed ba chagriy nge rogon e changar romed. Rogon nib thil’thil’ ea e gidii’ nge ba guruy I gidii u daken e faileng e ireram gelingin e ra Galasia ney.

Boech ra yoeg,“Gube lemnog dabiyog ningu paer ko likngin e yalen romed.” ”

Aram e fan ningam baed! Kan yarmiy fare Galasia ninge ayuweg e gidii’ nib demachaelboeg, ba waer, mar chuwchuw. Kan sug ko gidii’ ni bay e ar’ar’ u gum’racha’en ningar folgad ko fapi motochiyel, arragon ni dawori. gelnog .

Boech ra yoeg ,“Gumanang e chongin ko Galasia rom i’ir e tadum’thin. Dabiyog ningu un ko galasia ni bay e chongin woed rogon riy’.”

Fa’anra ngad lemnoged e tadum’hin i’ir e bee’ nib waer ninge paer ko yafas nib machaelboeg ko tin ba michaen’ngay, ere gadad gubin nib tadum’thin. Dabda manged woed rogon Kristus nib machalboeg. Machane gadad ba’adag nib polo’ ningad gel nog e tin kireb nge laniyaen’ ko denen Ko e gum’racha’en nge ya’el gadadba’adag ningad manged fel udakaen e ayuw ko fare Bayul ku Yesus Kristus.

Fa’anra pinn’ey tin ni gamedba’adag, dariy’ fan e rogom, e chepan rom, fa gelngin e michaen’um, bay e tagil’ ni fanam ulane re Galasia ney. Mu Baed, mukun ngodaed!

Dariy’ fan e tin nib waer ko gidii’, Guma nang ni gara piry eg ufithik chongin e Galasia ney bo’or e ya’el nib thabi fel’ nira pii’ e fayleng. Fare Galasia ku Yesus ba gay e gidii’ nib fel’ nge gol, e gidii’ miyuluy ma muruwel nib gel.

Fa’anra gaba lemnog ningam piriy’eg e gidii’ nib machaelbog, gara muluwaen’. Fa’an gara lemnog ni ngam pir’eg ea gidii’ nib machaelboeg uroy, mara kireb e n’um. Machane fa’an gabe gay fare machib nib polo’ rok Kristus, fare thin rok Got “nima golnag fare yael nike mad’ad,”⁹ nge fare piningaen’ ko fare Kan ni Thothup, ere giney e gara patag riy. Ko tineye rran nibe achig ea mich—ko tineye rran ni bo’or e gidii’ nibe thamiy nike palog ko tu’ufeg rok Got—ireray e gin ni gara patag e gidii’ nibe athpeg ni nge nang me chuchgur ko Tathapeg rorad ko ngiyal niyad be pigpig ngak Got nge gidii’, niwad gur. Baed, Ngomad!

Gube lemnog marunga’gen e ngiyal’ u yafas rok en Tathapeg u napan nib yo’or e gidii’ nike n’ag.¹⁰ Yesus ke fith ngak fapi ragag nge la’agruwi gachalpen Rok:

“Gimed ba’adag ni ngkum paged gag ngam marod?

“Me fulweg Simon Peter ni ga’ar, Somoel, i mini’ e gamad ra yan ngak? Ya gur e bay fapi thin rom ni ir e ma pi’ e yafos ni dariy’ n’umpgin nap’an ngak e girdi’”¹¹

Boech a ngiyal’ bay e duwer romaed ningan fulweg. Gadadra chuweg? Fa gadadra, woed Peter, athamgil ko thin ko yafas nib manemus?

Fa’anra gaba gay e tin riyul’, fan, nge e rogon ningam thilyeg e mich ko ngongol; fa’anra gaba gay tagil’im: Mu baed, mukun ngodad!

Fa’anra kam chuweg ko mich ni imoy rom: Moy bayay. Mukun ngodad!

Fa’anra kam lumel ningam waer: Soen ko boech e ngiyal’. Bay tagil’im ara’.

Gube wenig ngak urngin ra motoyil fa biy’eg e pi thin ney: Mu baed, mukun ngodad. Mu baed motoyil ngak e tolul ko en Kristus nib sumunguy. Fek e kruth rom mu Lek.¹²

Baed, mukun ngodad! Ara’ gara piry’eg e tin nib thabi ga’ pulowon.

Gube micheg ni gara piry’eg fapi thin ko yafas nib manemus ara’, e kanawo’en nga soer ko gapas, fare micheg ko bayul, nge faflaen’.

Gube meybil ni gara pir’yeg rom ko tin riyul’ ni gara thamiy u gum’racha’em e ba’adag ningam baed mukun’ ngomaed. Udakaen fithingan ni Yesus Kristus, amen. 6 U dakean fithngan Yesus Kristus nib thothup, amen.