Randall L. Ridd

Isip anak sa usa ka builder, si Randall L. Ridd sayong nakat-on sa kaimportante sa pagbuhat dayon sa trabaho. Sa daghang mga okasyon, ang batan-ong Randall mokompleto sa buluhaton, nga makadungog lang sa iyang amahan nga si Leon Ridd, nga moingon, “Wala pa ka mahuman.”

Ang maong pagka-eksakto nakatanom og malungtarung impresyon diha niya kinsa nagserbisyo karon isip ikaduhang magtatambag sa kinatibuk-ang kapangulohan sa Young Men. Hangtud karon usahay makadungog siya sa bug-at apan mahigugmaong pulong sa iyang amahan samtang siya mohimo sa iyang mga katungdanan sa iyang trabaho, pamilya ug eklesiastikanhon: “Wala pa ka mahuman; buhata kinig sakto.”

Miingon si Brother Ridd nga batasan sa iyang pamilya sa pagtrabaho nahimong usa ka panalangin sa iyang kinabuhi. Mao usab ang mga mentor ug mga lider sa priesthood kinsa usahay mopahinumdom niya subay sa dalan sa ebanghelyo. Samtang daghan sa iyang mga klasmeyt gikan sa high school midawat sa tawag sa misyon sa edad nga 19, si Randall mipili sa pag-eskwela sa kolehiyo ug mipalista sa kasundalohan. Dayon gidawat niya ang trabaho isip usa ka X-ray teknisyan samtang nagpadayon sa iyang pagtuon sa University of Utah. Pipila ka maalamong mga tawo may igong kaisug nga misulti niya nga ang iyang dapit atua sa mission field. Iyang gisunod ang ilang direksyon ug mipadala sa iyang aplikasyon sa pagserbisyo. Sa wala madugay nagpakigbahin na siya sa ebanghelyo didto sa Mexico North Mission. “Dili nako mahunahuna unsang matanga sa kinabuhi ang akong maangkon kon wala pa ko makaserbisyo og misyon,” miingon siya.

Mipauli siya, mipadayon sa iyang edukasyon, ug naminyo ni Tamina Roark sa Salt Lake Temple niadtong 1975. Ang mga Ridds adunay upat ka anak samtang si Brother Ridd nagpalambo sa iyang propesyonal nga trabaho isip commercial real state ug ubang mga kalihokan sa negosyo.

Ang iyang gugma alang sa misyonaryo nga buhat nagpabilin. Nagdumala siya sa Ecuador Guayaquil North Mission gikan sa 2005 hangtud 2008 ug usab nakasaksi sa kausaban sa kinabuhi sa batan-ong lalaki ug babaye sa full-time nga misyon.

Si Brother Ridd nagserbisyo isip sakop sa Young Men general board sa dihang gitawag siya ngadto sa kinatibuk-ang kapangulohan sa Young Men niadtong Mayo 2013.