Ko Hono ʻOmi ʻo e Palaimelí ki ʻApí
ʻOku ʻi Ai ha Palani ʻa e Tamai Hēvaní Maʻa ʻEne Fānaú
Ako lahi ange ki he kaveinga ʻa e Palaimelí he māhiná ni!
ʻOku lava ke nāmuʻi ʻe ʻŌliva e keke ʻene Kuifefiné ʻoku taʻo he ʻōvaní, pea ʻoku ʻi ai ha ongo ʻapasia he fale ʻo ʻene Kuifefiné mo e Kuitangatá. Ne sioloto mai ʻa ʻŌliva ki he efiafi fakafāmili makehe ko ʻení he ʻahó kotoa.
Naʻe pehē ʻe he Kuitangatá, “Ko ʻetau lēsoní ʻoku fekauʻaki mo e palani ʻo e fiefiá ne fokotuʻu ʻe he Tamai Hēvaní maʻatautolu kotoa.” Naʻá ne pehē mai, ʻI he pōní, ʻe fakafofongaʻi ʻe he peitó e langí, ʻa ia ne tau nofo ai mo e Tamai Hēvaní kimuʻa pea tau toki haʻu ki he māmaní.”
Ne ʻeke ange ʻe ʻAsi, “Ne u kau ai Kuleniteti?” Ne sio takai ʻa ʻŌliva he lokí ki he Kulení mo e Kulenitetí, Mami mo Teti, pea mo hono ongo tehina ko ʻAsi mo ʻĒtaní.
Ne tali mai ʻe Kuleniteti, “ʻIo. Ne tau ʻi ai kotoa. ʻI he taimi ne fakahā mai ai ʻe he Tamai Hēvaní kiate kitautolu ʻEne palani ke fokotuʻu ha māmaní mo ʻomi ha Fakamoʻui maʻatautolú, ne tau fuʻu fiefia pea tau kaila ʻi he fiefia.”
Ne kata mo punopuna fiefia ʻa ʻAsi mo ʻĒtani.
Ne ʻeke mai ʻe ke Kuitangatá, “Ko hai ʻi hotau fāmilí ne fuofua mavahe mai mei langi ʻo haʻu ki he māmaní?”
Naʻe pehē ʻe ʻŌliva, “Ko koe.”
Ne ʻalu ʻa e Kuitangatá mei peito. Ne hoko atu ai ʻa Kuleni. Pea ʻalu tahataha atu e kau mēmipa ʻo e fāmili ʻŌlivá ki he loki mohé.
Naʻe pehē mai ʻe he Kuifefiné, “ʻOku fakafofongaʻi ʻe he lokí ni e māmaní.” Naʻá ne ʻeke mai, “Ko e hā ha ngaahi meʻa te tau fai ʻi heni ke tokoni ke tau toe foki ai ki he Tamai Hēvaní?”
Naʻe pehē ʻe ʻŌliva, “Ko e papitaiso.”
Ne pehē ʻe Mami, “ʻAlu ki he temipalé.”
Ne pehē mai ʻe ʻAsi, “Fili ʻa e totonú.”
Ne kamokamo pē ʻa Kuleni mo malimali. Pea naʻá ne talamai kuo taimi ke mau mavahe mei māmani ʻo toe foki ki he Tamai Hēvaní.
Ne pehē mai ʻe Kuleniteti, “Te u ʻuluaki ʻalu au.”
Naʻe pehē ange ʻe ʻĒtani, “ʻOiauē, Kuleniteti, ʻoua te ke ʻalú!”
Ne pehē mai ʻe he Kulenitetí, “ʻOua te ke hohaʻa ki ai. Ko ha konga ʻo e palani ʻa e Tamai Hēvaní ki he fiefiá ko e mavahe mei he māmaní. ʻE vavé ni pē haʻatau toe fakataha.”
Ne nau foki tahataha kotoa ki peito. Ne pehē ange ʻe Teti he taimi ne lele atu ai ʻa ʻAsi mo ʻĒtani ʻo fāʻofua ki aí, “Kuo tau toe foki kotoa pē ki langi!”
Ne ongoʻi fiefia ʻa ʻŌliva ke sio ki hono fāmilí ʻo hangē naʻá ne mavahe meiate kinautolu ʻi ha fuʻu taimi fuoloá. Naʻá ne lele atu ʻo fāʻofua ki hono ongo tehiná mo e Mamí mo e Tetí. Kuo mahino ʻeni kiate ia e ʻuhinga ne ui ai ia ʻe Kuleniteti he ko e palani ʻa e Tamai Hēvani ki he fiefiá.