Samataem blong Seves

Wan samataem, mi bin spendem taem long wan kantri ovasi, we mi go wok wetem ol pikinini we oli gat ol spesel nid. Fastaem we mi mitim ol pikinini ia, tingting blong mi i no oraet tumas. Mi no toktok lanwis blong olgeta, be mi bin trastem Spirit, se bae Hem i lidim mi long wei we mi wok wetem olgeta. Taem mi kam blong save wanwan pikinini, mi luksave se lanwis i no wan fanis we i blokem lav. Mi bin plei, laf, mo mekem ol smol wok wetem ol pikinini, mo mi no save holemtaet mi, be mi filim lav we i fulwan long ol pikinini ia. Mi luk smol lav ia we Papa long Heven i gat long ol pikinini blong Hem, mo glad ia we i fulumap hat blong mi, i no gat toktok i save tokbaot.

Taem mi givim seves long ol narafala, mi filim lav, i no long olgeta ia nomo we mi givim seves long olgeta, be tu, long Papa long Heven. Mi rili kam blong save se “taem we [yumi] stap wok blong ol narafala man, [yumi] stap mekem wok blong God blong [yumi] nomo.” (Mosaea 2:17). Stamba tingting biaen long seves blong mi, nomata hem i long taem blong ol bigfala seves projek, o tru long ol smol aksen blong fasin we i kaen, stamba tingting i blong givim glori long God (luk long Matiu 5:16). Mi hop se, taem mi givim seves long ol narafalawan, ol pipol bae oli luksave lav we mi gat long Papa long Heven, mo oli luksave Laet blong Kraes we i stap laet insaed long mi.