Ngaahi Fakaʻilongá

ʻOku ou faʻa fakaʻuli maʻu pē he ngaahi hala lalahí ki he ngāué. Ko e hala vave taha mo faingofua taha ia ke u aʻu ai ki he ngāué. ʻOku ou feinga ke mavahe kei pongipongia ʻi he kei siʻisiʻi ʻa e meʻalelé, mo ʻikai ha fakatuʻutāmakí.

Neongo ia, ʻi ha pongipongi ʻe taha ne kiʻi tuai ʻeku mavahé pea ne maʻu au he femoʻuekina ʻa e halá. ʻI heʻeku hū ki he hala lahí, ne u fakakaukau ki heʻeku ako folofola he pongipongi ko iá. Ne u ongoʻi ʻoku ou fuʻu tokanga lahi ange ki he ngaahi meʻa ʻo e māmaní pea ʻikai fai ha tokanga feʻunga ki he ngaahi meʻa fakalaumālié. ʻI heʻeku fakaʻuli ki he ngāué, ne u fakakaukau ki ha founga ʻe lava ke u toe tokanga lahi ange ai ki he ngaahi meʻa fakalaumālié he ʻahó kotoa.

Ne u toki fakatokangaʻi hake ha pōpoaki ʻi he taha e ngaahi fakaʻilonga fakaʻilekitulōnika he halá ʻo fakatokanga ki he kau fakaʻulí ʻoku ʻi ai ha fakatuʻutāmaki pe tuʻunga ʻo e halá. ʻI heʻeku ofi atu ki aí, ne u lau ia, “Fepaki kimuʻa he Hala Mesá—ʻoku taʻofi e foʻi hala ʻi lotó.” Ne ʻikai te u loto ke uesia au ʻi haʻaku mavahe mei he hala lahí, ko ia ai ne u fakakaukau pe ko e hā e fuoloa haʻaku nofo he hala lahí kimuʻa peá u toki mavahe mei aí.

Ne u toe maʻu mo ha fakakaukau ʻe taha: kapau te u tukunoaʻi pē e fakaʻilongá, ʻe lava nai ke u aʻu ai ki ha tuʻunga ʻoku fakatuʻutāmaki? Ne u taʻetokanga nai ki ha fakatokanga koeʻuhí ko e ʻikai te u loto ke ne uesia ʻeku taimitēpilé? Ne mahino ʻeku loto ke tukunoaʻi e fakatokanga ki heʻeku malu fakaesinó; ka kuo tuʻo fiha nai ʻeku taʻe fie fanongo ki he ngaahi ueʻi ki heʻeku malu fakalaumālié?

ʻI heʻeku fakakaukauloto ki ha founga ke toe tokanga ange ai ki he Laumālié, ne u fakatokangaʻi hake kuo pau pē ne fai mai ʻe he Tamai Hēvaní ha ngaahi pōpoaki lahi maʻaku he ʻahó kotoa. Ne u fakakaukau atu pe kuo tuʻo fiha hano ʻikai ke u maʻu ʻEne pōpoakí koeʻuhí he naʻe ʻikai ke u fakafanongo ki he ngaahi ueʻi fakalaumālié. Ne u fakapapau ke toe lelei ange.

Ne u vakaiʻi e ngaahi meʻalelé, liliu e halá, pea hū kituʻa mei he hala lahí ʻi he afe hono hokó. ʻI hono ngāue ʻaki ʻo e ngaahi hala he koló ke u ʻalu ai ki he ngāué, ne u lava ke hao ai mei he ngaahi faingataʻa mo e fakatuʻutāmaki ʻo e moʻunofoa he hala lahí ʻa ia ʻoku lolotonga fakaleleiʻi atu ai e fakatuʻutāmaki ne hokó.

ʻOku ou ʻilo ʻoku feʻunga e ʻofa ʻa e ʻEikí kiate aú ke ʻomi ʻEne pōpoakí kiate au. ʻOku fie maʻú pē ke u taau mo e ngaahi ueʻi fakalaumālie ʻokú Ne ʻomi kiate aú.