Vahevahe ʻo e Nāunau Tokoni Fakaʻapí
ʻOku nofo ʻa e taha naʻá ne faʻú ʻi Minitanao,ʻOtu Filipainí.
Tā fakatātā ʻa Julie Yellow
Ne tō e ʻuhá pea momoko mo e matangí. Ne u sio ki ha ngaahi fuʻu ʻakau ne taʻaki pea ʻauha kotoa hono laú. Ne mate e ʻuhilá ʻi he ngaahi feituʻu ʻe niʻihi koeʻuhí ko e motu ʻa e ngaahi uaea ʻuhilá. Ne hangē e meʻa ne u mamata aí ko ha feituʻu ʻoku tēvoloʻiá. Kuo ʻauha e meʻa kotoa. Ne fiekaia e kakaí mo nau fie maʻu ha nofoʻanga.
Ne ongo moʻoni ki hoku lotó ʻa e fie maʻu ke fai ha tokoní. Ne fononga foki hoku fāmilí mo e kāingalotu kehe ʻo e Siasí ki ha kolo masiva ʻa ia ne fakaʻauha ai ʻe ha matangi mālohi ha ngaahi ʻapi ʻe lauiafe pea mole mo ha moʻui ʻe lauiafe. Ne mau ʻi aí ke foaki ha ngaahi koloa ke fakafiemālieʻi ʻaki e kakai faingataʻaʻiá.
ʻI heʻemau fuofua tūʻuta atú, ne u mamata ki he fofonga mamahi ʻa e kakaí. Ne u fakatokangaʻi hake ʻa hono tāpuekina lahi kimautolu koeʻuhí he naʻe ʻikai ke ʻauha homau ngaahi ʻapí.
Ne kei ʻuha pē he taimi ne mau tufa ai e ngaahi kato tokoní ʻi ha fale pelepela mo ʻikai hano ʻato, ka naʻe ʻikai ke mau hohaʻa ki ai. Ko e ngaahi kato tokoní—ngaahi laulau pelesitiki, tīpota, peleti, sēpuni, huhu, ipu sioʻata, mo e sioki—ne mau ui fakatenetene pē ko e “nāunau tokoni fakaʻapí.” ʻI heʻemau foaki mo hoku fāmilí e ngaahi kato tokoní ki he kakaí, ne nau malimali fiefia mo fakamālō mai.
Ne hanga ʻe he houngaʻia lahi ʻa e kakaí ʻo langaki ʻeku moʻuí, pea ne u ongoʻi e tākiekina ʻa e Laumālié. Ne fakamahino moʻoni heʻenau malimalí ʻoku ʻi ai ha ʻamanaki lelei pea he ʻikai teitei liʻekina kitautolu ʻe he Tamai Hēvaní mo Sīsū Kalaisi pea te Na ʻomi maʻu pē ha maama ki hotau ngaahi ʻaho fakapoʻulí.
ʻOku ou ʻiloʻi kapau te tau fetauhiʻaki mo feʻofaʻaki, te tau maʻu e ngaahi tāpuaki taʻengatá pea maʻu e ngaahi ʻulungaanga faka-Kalaisí. ʻOku ʻikai ke faʻa hoko vave mai e ngaahi tāpuaki ʻo e tokoní, ka ʻe hoko mai ia ʻo kapau ʻe hokohoko atu pē ʻetau tokoniʻi e niʻihi kehé ʻaki ha loto fakamātoato. ʻOku ou ʻiloʻi “ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).