O Au le Tagata e le Tagolima

I ni nai tausaga ua mavae, na sau ai se taavale malepelepe i le paka o matou falelotu. O le taavale a se tama nofofua o se fanau e toafa. Sa sau o ia e fesili mai mo se fesoasoani. Na maua e le matou uarota se fale mo i latou, ma na amata e le tama ona aumai lona aiga i le lotu.

O nisi taimi na mama ai lavalava o le fanau ae o nisi taimi sa palapala, ae sa veuveua lava i taimi uma o latou lauulu. Matou te lei iloaina le leaga tele o le filia faatasi ma le taaiai o lauulu. I vaiaso taitasi e aumai ai e le peresitene o le Peraimeri ni fagu e faamatala ai lauulu ma pulumu. La te galulue ma se faiaoga e selu lauulu o tamaiti a o lei amataina le Peraimeri.

Sa avea au o se fesoasoani i le au peresitene o le Peraimeri, ma sa ou faamemelo i le tomai o nei tamaitai e toalua e taliaina nei fanau palapalā. Sa ou matuai le mafaia lava ona pa’i atu i o latou lauulu, ma sa ou ofo pe faapefea ona faia e nei uso. Ou te faamamaina lo’u mafaufau i le tauina ia te au lava ia faapea e mafai ona ou fesoasoani e ala i le vaavaaia o isi tamaiti a o galue nei tamaitai.

O le uii o lenei aiga e tolu tausaga le matua. Sa mafai ona ia tautala manino, ae sa ia taumafai ina ia faia ni leo musika leotetele pe a matou pepese. O lenei mea na faaitaina ai au.

Ona o fanau tai tolu tausaga le matutua e puupuu le taimi e filemu ai, sa amata ona ou siiina lenei teineitiiti laitiiti i luga o lo’u vae e fesoasoani ai ia te ia e faalogo. E ataata mai o ia ia te au i le agaga faafetai, ma sa amata ona ou lagonaina le olioli ma alofa sa i ai i le Tama Faalelagi mo lenei tamaitiiti palapala—Lona afafine. Mulimuli ane, sa ou le amaiaina le palapala ma uumauina se pulumu e faamatala ai lona lauulu ua taataai faatasi. Sa ou filifili foi faapea o lana taumafaiga e usu le pese o se leo fiafia.

I ni nai masina mulimuli ane, na tu i luga le tama o tamaiti i se sauniga molimau ma faafetai mai ia i matou mo le fesoasoani atu i lana fanau. O le vaiaso na sosoo ai, ua leai se aiga.

Ou te faafetai mo le avanoa na ou maua e auauna atu ai i na tamaiti. Ina ua latou taunuu mai, sa ou lagonaina sa latou matua le tagolima lava, ae sa ou iloa ai o a’u o le tagata o loo manaomia i latou e fesoasoani ia te au e suia.