iVaqa ni Veisiko, Maji 2014
Na iLesilesi Vakalou i Jisu Karisito: Rarama kei Vuravura
Vulica ena masumasu na itukutuku oqo ka vaqara mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Ni da sa mai kila ni o Jisu Karisito na Rarama kei Vuravura, eda na vakalevutaka na noda vakabauta me baleti Koya ka yaco me dua na rarama kivei ira tale eso. A vakadinadinataka o Karisito na Nona ilesilesi me vaka “na rarama dina; io sa vakararamataka na turaga [kei na marama] kecega sa lako mai ki vuravura” (V&V 93:2) ka kerea meda na “dulaka cake na [Nona] rarama me cilavi vuravura” (3 Nifai 18:24).
Era sa vakadinadinataka talega na Rarama i Karisito na noda parofita. E tukuna o Peresitedi Henry B. Eyring, na iMatai ni Daunivakasala ena Mataveiliutaki Taumada: “Na veigauna o digitaka kina ni tovolea mo bula me vakataka cake na Karisito, ena vakaukauwataki vakakina na nomu ivakadinadina. O na rawa ni mai kila vakataki iko ena kena gauna ni sa iKoya na Rarama kei Vuravura. … O na vakacaudreva kivei ira tale eso na Rarama i Karisito ena nomu bula.”1
A tukuna kina o Elder Quentin L. Cook ena Kuoramu ni iApositolo Le Tinikarua me baleta na noda rarama voli ki vuravura: “Sa dodonu meda taqomaka na noda matavuvale ka tiko vakailiu vakatautauvata kei ira na tamata cakavinaka ena qaravi ni veika kece eda rawata me maroroi kina na rarama, inuinui, kei na bula savasava ena noda vanua vakaitikotiko.”2
Mai na iVolanikalou
Mai na Keda iTukutuku Makawa
Era tomana voli nikua na marama Yalododonu Edaidai na tutuvaki ni nodra cina.
Ena ika walusagavulu ni itabavale ni dua na vale cecere e Hong Kong, Jaina, e dua na marama yada ka tuvaki vakaca tu na yagona—na Yalododonu Edaidai duadua ga ena nona matavuvale—a tara e dua na itikotiko ka sa ivurevure ni vakacegu me rawa ni vakila kina o koya kei ira na dauveisiko na veivakauqeti ni Yalotabu. A maroroya voli vakavoleka o koya na nona ivolanikalou, nona ivolavakarau ni iSoqosoqo ni Veivukei, kei na nona ivola ni sere. A lako ki na valetabu o koya me qarava kina na cakacaka tabu vakalotu me baleti ira na nona kawa.3
E Brazil a susugi ira na luvena e dua na tina yalodina ena rarama ni kosipeli. A vakasinaita na maliwa lala na sere eso ni Lalai ena nona itikotiko vatu damudamu, kei na iyaloyalo eso mai na Liaona ni valetabu, veiparofita ni Kalou, kei na iVakabula era a kabi ena veilalaga. A solibula o koya kei na watina me rau vauci vata ena valetabu me rawa ni ra sucu na luvedrau ena veiyalayalati. Na nona masu wasoma oya me na vukei koya na Turaga ni vakatuburi ira cake na luvena ena rarama, dina, kei na kaukauwa ni kosipeli.4
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni Visiting Teaching Message, March 2014. Fijian. 10863 858