Faatalitali i le Vaega i Luma

I se tasi afiafi sa ou aveina o’u tei laiti e toatolu i le malumalu e faia ni papatisoga. A o siakiina e le tagata faigaluega o le malumalu a matou pepa faataga, sa ia iloaina o loo misi le saini a le epikopo i le pepa a lo’u uso. Sa amata ona ou faatumuina le fomu e ave i le tusi talafaamaumau o le malumalu, lea o le a valaau atu i le epikopo. Ona siaki lea o le pepa faataga a lo’u tuagane e le tagata faigaluega o le malumalu ma maua ai e lei faaaogaina lava. Sa i ai lau peni, o lea sa ou aveina loa le fomu sa tuuina mai ia i matou ma amata ona faatumuina foi.

Sa ou iloa e le mafai ona o i totonu lou tuagane ma lou uso ona oni mea sese i luga o a la pepa faataga, ae o au e tatau ona vaaia i laua, ma sei iloga ou te fesoasoani ia i laua e faasao nei mea sese, ou te le mafai foi ona alu i totonu. Sa ou lagonaina lo’u le fiafia i le taofia i fafo o le malumalu. Sa matou tuua le potu mo papatisoga ma o i le fogafale i luga i le faitotoa o le malumalu e faamalamalama atu lo matou faafitauli i le laulau i luma. Na fai mai le tusitalafaamaumau o le malumalu e mafai ona ia faaleleia le faafitauli i le na o ni nai minute, o lea sa matou nonofo toafa ai i lalo e faatalitali i le vaega i luma.

A o ou saofai ai iina, na suia lou atuatuvale i le lotovaivai. Sa taofia i matou ona o ni nai mea sese faigofie, ae fai e na sese laiti se eseesega tele o le faatalitali i le vaega i luma ma le ulufale i totonu o le maota o le Alii. O se aso faigata, ma sa ou faamoemoe o le malumalu e fesoasoani ou te lagona ai le filemu. O mea sese e lei mafua ia au, ae a o faasolo ina umi ona faatalitali, sa ou lagona ua lata ona ou tagi. Sa ou taumafai ia lelei e ala i le oo mai i le malumalu ma faia se faataitaiga o le auai i le malumalu mo o’u tei laiti. O lea aisea sa taofia ai i matou i fafo ae na ou matua manao lava ia i ai i totonu?

Ona ou iloa lea o se mea: afai sa ou lagona le lotovaivai ona o le taofia i fafo o le malumalu mo ni nai mea sese failautusi, oka sou faanoanoa o le a ou lagonaina pe a taofia i fafo mo a’u lava mea sese—i le le agavaa e ulu atu i le malumalu? A o ou mafaufau i lenei mea, sa faafuasei lava ona ou lagonaina le toafilemu. Sa ou lagonaina na ou aoaoina le lesona e finagalo le Atua ou te aoaoina. Sa ou folafola atu ia te Ia o le a ou taumafai pea ina ia agavaa e ulu atu i totonu o le malumalu. Sa ou folafola atu o le a ou le taofia i fafo o le maota o le Alii mo a’u lava mea sese; ou te le manao i au amioga e faatapulaaina au i le na o le vaega i luma.

Mulimuli ane i lena po sa ou maua ai se taimi atofaina ma lo’u epikopo e toe faafou ai la’u pepa faataga o le malumalu. Ae ou te le’i alu atu, sa ou faia se siaki mo soo sau mea sese i a te au lava ia e ono taofia ai au mai le malumalu. Ina ua fesili mai le epikopo pe sa ou agavaa e ulu atu i le maota o le Alii, sa ou matua faafetai lava ua mafai ona ou fai atu ai ioe.