Na Koniferedi kei Au

Au dau nanuma tu ni macawa ni koniferedi raraba e dau balavu ka vakavucesa, ia ni toso tiko na gauna, au sa tekivu meu taleitaka ka namaka meu tiko kina. Na macawa ni koniferedi raraba ena rawa me veivakavoui vakayalo, ia ena dau rawarawa me dau seyavu yani na yalo vakaoqo ni sa dau tekivu tale na bula ena Moniti. Eso vei ira na vakasama e tarava a vukei au meu vakani tikoga vakalevu mai na koniferedi.

Au a vakarautaki au ki na koniferedi ena noqu vola eso na taro, kau dau vola sara ni sa saumi mai na noqu taro. Ni oti o ya, au taleitaka sara meu katona na vosa ni koniferedi kei na sere mai na LDS.org ka biuta ena dua na MP3 meu na rogoca kina e dua na vosa se sere niu cakava voli na noqu cakacaka ena veisiga. Au dau taleitaka talega meu vulica na ilavelave ni koniferedi ena Liaona. Au dau makataka ka vola eso na itukutuku ena maliwa lala ni noqu ilavelave. Ni qai roro mai na koniferedi e tarava, sa vakayagataki vakavinaka tu na noqu mekasini o ya. Eso na gauna e ratou dau vulica vata na noqu matavuvale na itukutuku o ya ena lotu vakamatavuvale.

E gadrevi me cakacakataki na kena maroroi tiko na yalotabu keitou a vakila ena gauna ni koniferedi ka tomana tiko na vuli mai na veitukutuku o ya, ni vakayacori oqo sa mai dua na veivakalougatataki cecere vei au. Au sa mai vaqaqacotaki vakalevu ka dusimaki ena gauna ni leqa eso ena noqu vulica na itukutuku mai na koniferedi raraba, ka kila ni itukutuku oqo era sa veivakauqeti vakayalo.