Klumech er a First Presidency, Ongeua el Buil 2014
Mesisiich el Delalm el Otil a Reng
Kmal diak el meketeketang er a mla me mong e ng mlo er ngii a techellek el nga er a omerael el ngar er a diall er a bita er a klebokel el debel a Alaska, USA. A chad er a diall se el temel el mengedmokl er a taem er a diall el olengull a lekebesengei er a ulecheuekl el basio, e ng kmal el ungil el mesuub er a basio me a rokui el telengtengil, uldimukl er ngii a temel a dolech, klungel a delchel a daob, me a dirrek el cheridel a diall er a ike el kengaol el olibesongel. Se el bo el ungil a rengul, e ng orbetii a otil a diall me ng sebechel el melemolem el selbechakl e mesisiich a otil, e mesterir a rechad el ngar er a diall a techellir el mo omes a klebokel el urerel a Rubak.
Se er a kumes er a chelechol, e ak mlo melebedebek el kmo tia el diall a mle mekekokil el mengitengtik er a di kekerei el cheltel a eolt me a berius. Osisiu el taem, tia el diall a millemolem el mesisiich er a ika el mekekerei el olibesongel er a chelsel tia el chaibibeob lultuil er a klemengetel a okul me a klisichel a otil tia el diall.
A chad el omekall er tia el diall a dimlak el becherei a otil a diall er a chelsel a diall, medechel el kldmokl el kirel a ses el eolt se el bo er ngii. Ng diak, ng mla mekur a diall me ng uchul e ng ungil olekebai e mesebechakl er a diall me ng diak el bo er a kengaol el daob me a lechub e loberius me a rechad el ngar er a diall a sebechir el selbechakl a rengrir.
Me tia er a kulbedebek er tia el blekeradel, e ak mlo melechesuar el kmo alsekum e ng dimlak tia el techall er a ollachitnger, e ngak a locha dimlak bo kumekall a skoki.
Ngera Uchul Me Kede Ousbech a Otil a Reng
A moktek er a otil a diall a rullii me ng selbechakl e kldmokl er a ungil el basio me a lechub e ng sebechel omtebechel er a diall se el ngar er ngii a ses el eolt. E ng di, alsekum ke mo olab aika el moktek, a di mobang a otil a reng e ng kmal kesai. A otil a reng a kmal kirel el mesisiich, usbechall, e kired el ousbech er ngii er a ulterkokl e ungil taem me a basio.
A di ta el chad me a dirrek el telungalek a dirrek el ousbech a otil a reng.
A cherarou a sebechel el mei el ua a klou el eolt el osebekid el ruebet er a roled e tomellid e ngoikid el mo chemau a bad. Se el bebil er a taem e ke de ngar er a kengaol e a rokui el tekoi a domes el uaia le selbechakl—e a eolt a kekerei e a daob a kllechakl. A mera er ngii, kid a sebeched el ngar er a klou el kengaol se el doberius me a omerolled a kmal kekerei me ng diak el secheched el melechesuar.
A Ebangkelio a Otil a Rengud
A otil a reng a kmal kirel el mesisiich, e diak el mesmesim, e ungil el ulsiou e kldmokl se el bo el temel usbechall. Ng dirrek, el kmal kirel delalm er a ungil el dodai el sebechel el oltekau a ngidi el berraod er a ngidi el ngerang el mo omtok er ngii.
Ng uaisei, a ebangkelio er a Jesus Kristo sei e a otil a reng. Ng milkedmokl er a Ulemeob er a beluulechad el kirel a chedaol moktek e dirrek el milruul el mesterir a selbechakl me a ulekrael el mo er a Rengelekel.
Ngera a ebangkelio, el diak luldimukl er ngii a telbilel a Dios el me olsobel er a Rengelekel e lmuut el melai er tir el mo kiei el Obengkel?
Se el dodengei el kmo ngar er a klengar e a rokui el tekoi a mo oberius, se e ng kired el kmal smisiich a otil a rengud el ngar er a chelades el dodai er a klemerang el ebangkelio. Ng kmal diak el kirel el meriou er a chetemel a keldidai el reng me a lechub e ng di kled er a bebul a mesisiich el klaumerang.
Chelecha el buil e ng ngar er ngii a techelled el mo rongeseterir a remesiungel a Dios er a klou el ongdibel er a Ikelesia. Aike el cheldechederir, el obengkel a chedaol el llechukl me a ongelulau er a Chedaol Reng, a mo meskid a selbechakl e mesisiich el chelades el dodai er a diak a ulebengelel el llach er a kldung me a teletael el ngii sebeched el mak a otil a rengud er ngii el mo uchul e ng sebeched el melemolm el mesisiich e selbechakl se el de iliuekl er a ongarm me a ringel er tia el klengar.
A profet er a rechuodel el Helaman a ulsisechakl el kmo, “Ng okiu a bedul a Osobel, el ngii a Jesus Kristo, el ngelekel a Dios, e ng uaisei el kirem el mekedecherur a dodai er kau; me se el le mei a se el sesengel a eolt er a diabelong el ongiterbis er ngii, e lolsiu a cheltel el me er kau, e ng mo diak a klisichel er kau e mo diak a techelel el orretau el ruebet er riou er a diak a ulebengelel el ongarm me a ringel, le ng okiu a bad el kau a milkdecherur, el ngii a mesisiich a dai er ngii, el dai er ngii a lulekedechor er ngii a rechad e ng diak el sebechel el ruebet” (Helaman 5:12).
Klungiolel a Mesisiich el Delalm el Otil a Reng
Tia el klengar a ngar er ngii a rolel el skeng a otil a rengud e mengetikaik er kid el mo cheroid. E ng di, a lsekum e a otil a rengud a ungil el delalm er a bedul a Osobeled, e ngii a mo sebechel el otekau—a ngidi el ngerang el diak a belkul a mesisiich el eolt, klisischel a daob, me a dirrek el meklungel a chedesaoch.
Ng uaisei, a diall a dimlak el meruul el moktek er ngii a medechel el ulak er a omkuul e le ng kirel ulengasech a otil e merael er a rolel er a debel a klengar. E ng di tia a olachitnger er a kuk mo ta er a taem.
E ng di chelchang, e ak chellaod el medengei el kmo a otil a renguk er a ebangkelio me a bedul a Osebeled a mo rullid el mo mesisiich e selbechakl.
Tia el otil a reng a mo olechib er kid er a mo ruebet er a kengaol me a mekngit el chung. Ng meskid a ungil techall el mo oldeu a rengud er a klebokel el ungil ues er a klengar.
A klengar a klebokel e ungil a klungiolel el de ngar er ngii. A eolt, ses el eolt, me a meringel el berius a locha me mengetikaik e orrael er kid el mo er a kengaol el sebeched el mes me a diak el mo ues, e ng di a cheldecheduch er a ebangkelio me a chedaol el klisichel a mo omekrael er a roled el mo er a selbechakl el omkuul er a Chedam er Babeluades.
Kid el rokui, bo el sebeched, el diak di dorrenges aika el cheldecheduch er a Klou el Ongdibel er a Ongeua el buil, dirrek el bo el sebeched el oltirakl aika el omeruul er a cheldecheduch el ua mesisiich el delalm el otil a reng er a klengar er kid er a bek el sils.
Bo el sebechel a Dios el omekngeltengat e lomekrael er kid er tia el kmal el tokubets e klou a ultutelel e meringel el omerael!
© 2014 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, April 2014. Palauan. 10864 881
Osischeklel Tia el Klumech
Bo momdasu er a klou el belkul a otil a reng er a chelsel a omerolel a Lehi me a telungalek er ngii er a le bo er a beluu er a telbiil (mesa 1 Nephi 18). Ke locha mo tutkii a 1 Nephi 18:11–15, se el taem e a Nephi a mle lechotel, e a Liahona a mlo diak loureor, me a diall a mlo merael er a kengaol el meringel el eolt. Ngera a telmall el bo dechelbangel a lsekum e ng diak el delalm a otil a rengud er a ebangkelio? Ke locha mo tutkii a 1 Nephi 18:21–22 e mo mesaod el kmo ng mekera e mo sebeched el metik a sebechekled se el dultuil er a Osobel.