Na Yalayala nei Porter

Ni a mai leqa na tamai na watiqu, keitou a soqoni vata matavuvale ka kidavaki ira na so ka ra mai vakaloloku. Ni’u a veivosaki vata kei ira na matavuvale kei na itokani ena bogi taucoko oya, au dau siqemi makubuqu o Porter, yabaki 10, ni tucake volekati tinai watiqu voli—o buna. So na gauna ena duri tu e dakuna, ka vakaraici koya toka. Au a raica ena dua na gauna ni rau a veitauriliga tu. Au vakaraici koya ni vakatavia na ligai buna, mokoti koya vakalalai, ka tucake tu e yasana.

Ni oti e vica na siga ena sotavi ni veika oya, au a sega ni rawa ni kauta laivi mai na noqu vakasama na ivakaraitaki oqo. Au a vakayarayarataki me’u vakauta vei Porter e dua na imeli. Au a tukuna vua na ka au a raica ka vakila Au a vakananumi koya ena veiyalayalati a cakava ena nona a papitaisotaki, ka tukuna vua na vosa nei Alama ena Mosaia wase 18:

“Ia, me vaka dou sa gadreva mo dou curu ki na loma ni bai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;

“Io ni sa lomamudou mo dou tagi vata kei ira sa tagi; ka vakacegui ira sa rarawa, ka vakadinadinataka na Kalou ena veigauna kecega, ena veika kecega, kei na veivanua kecega dou sa tiko kina, me yacova na mate, … me nomudou kina na bula tawamudu—

“… Kevaka sa vaka oqori na ka sa lomamudou, na cava me tarova na nomudou papitaiso ena yaca ni Turaga, io me ivakadinadina ni nomudou sa veiyalayalati kaya mo dou qaravi koya ka muria na nona vunau, me sovaraka mai kina vei kemudou na nona Yalo Tabu?” (tikina e 8–10).

Au a vakamacalataka vei Porter ni o Alama a vakatavulica ni o ira ka vinakata mera papitaisotaki sa dodonu mera gadreva taumada mera qarava na Turaga ena nodra qarava na tani—ena nomu bula taucoko! Au a kaya: “Au sega ni kila ke o a nanuma oya, ia na sala o vakaraitaka kina na loloma kei na veikauwaitaki vei Bumu, o sa muria tiko kina na nomu veiyalayalati. Eda muria na noda veiyalayalati ena veisiga ni da lomavinaka, vakaraitaki loloma, ka veikauwaitaki vakaikeda. Au vinakata ga mo kila ni’u dokai iko vakadaunimuri veiyalayalati voli! Ni o muria tiko na veiyalayalati o cakava ni ko a papitaisotaki, o sa na vakavakarau ki na veitabaki ni matabete. Ena solia vei iko na ikuri ni veiyalayalati oqo na madigi e vuqa mo vakalougatataka ka qaravi ira tale eso ka vukei iko ni vakavakarau ki na veiyalayalati ko na cakava ena valetabu. Vinaka na nomu ivakaraitaki uasivi tiko vei au! Vinaka na nomu vakaraitaka voli vei au na irairai ni dua ka daunimuri veiyalayalati!”

A sauma lesu mai o Porter: “Bubu, vinaka na ivola. Ni’u a dau mokoti Bu voli, au sega ni kila ni’u a muria tiko na noqu veiyalayalati, ia au a vakila na vakacegu e lomaqu ka sa vinaka dina. Au kila ni oya na Yalo Tabu ena lomaqu.”

Au vakila talega na vakacegu e lomaqu ni’u siqema ni kila o Porter ni gauna e muria kina na nona veiyalayalati, ena “tiko ga kei [koya] na Yalotabu ni [Tamada Vakalomalagi]” [V&V 20:77]. Oqo e dua na yalayala ka rawati ena ciqomi ni isolisoli ni Yalo Tabu.