Cov Mus Saib Xyuas tom Tsev tsab Xov, Plaub Hlis Ntuj 2014
Yexus Khetos lub Luag Hauj Lwm Los Saum Ntuj Los: Tus Cawm Seej thiab tus Txhiv Dim
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Txwj Laug D. Todd Christofferson ntawm Pawg Kaum Ob tug Thwj Tim hais tias “Yexus Khetos ib lub npe tseem ceeb heev yog tus Txhiv Dim. Txhiv dim txhais tias yus them ib tus nqi kom tiav. Lo lus txhiv kuj txhais hais tias yus cawm neeg los yog yus them nqi kom ib tug neeg dim tau. … Tej kev txhais lo lus no qhia tej yam txog txoj kev Txhiv Dim ntawm Yexus Khetos dhau los ntawm Nws txoj Kev Theej Txhoj; nyob hauv phau ntawv txhais lus lo lus txhiv lub ntshiab yog ‘cawm neeg dim kev txhaum thiab lub txim, xws li thaum ib tug ua kev txi kom txhiv tus neeg txhaum dim.’”1
Linda K. Burton, lub Koom Haum Niam Tsev tus tuam thawj tswj hwm, hais tias: “Leej Txiv Saum Ntuj Ceeb Tsheej … tau txib Nws Tib Leeg Tub uas zoo tag nrho los raug kev txom nyem rau peb tej kev txhaum, kev mob siab, thiab txhua yam uas zoo li tsis ncaj ncees hauv peb lub neej.
“… Muaj ib tug poj niam uas tau raug tej kev sim siab thiab tej kev nyuaj siab tau ntau xyoo nws los kua muag hais ias, “Kuv tau kawm hais tias kuv zoo li ib daim nyiaj nees nkaum daus las qub qub—ntsws, ntuag, qias neeg, raug rhuav thiab muaj caws pliav. Tiam sis … kuv tseem muaj nqis li nees nkaum daus las.’ Tus poj niam no paub hais tias nws … muaj nqi txaus rau [Vajtswv] txib Nws Leej Tub los theej txhoj rau. Txhua tus viv ncaus hauv lub Koom Txoos yuav tsum paub li tus poj niam no.”2
Los ntawm cov Vaj Lug Kub
Los ntawm Peb zaj Keeb Kwm
Nyob hauv Phau Tshiab muaj tej zaj txog cov poj niam uas ntseeg Yexus Khetos, kawm thiab ua raws li Nws tej lus qhia, thiab ua tim khawv txog Nws txoj kev qhuab qhia, tej txuj ci tseem ceeb, thiab yeeb koob.
Yexus hais rau tus poj niam nyob ntawm lub qhov dej:
“Tus uas haus cov dej uas kuv muab rau nws yuav tsis nqhis ib zaug li lawm; tiam sis cov dej uas kuv muab rau nws yuav txhawv hauv nws lub siab thiab cawm nws txoj sia mus ib txhis.
“Tus poj niam ntawd hais rau Yexus hais tias, Tus Tswv thov koj muab cov dej uas koj hais ko rau kuv haus kom kuv yuav tsis nqhis dua. …
“Kuv paub tias [tus Mexiyas] yuav los, … : thuam nws los lawm, nws yuav qhia txhua yam rau peb.
“Yexus teb hais tias, Kuv yog nws, kuv tab tom nrog koj tham no ntag.”
Ces nws “txawm muab nws lub hub dej tso plhuav tseg” thiab ua tim khawv txog nws hauv nroog. (Saib Yauhas 4:6–30.)
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/13. Pub txhais ua lus Hmoob: 6/13. Kev txhais lus Visiting Teaching Message, April 2014. Hmong. 10864 363