ʻE ʻOmi ʻe he Faiva Foʻoú ha Faingamālie ke Feʻiloaki mo e kau Māmongá
ʻOkú ke faʻa fakaʻamu naʻe ʻi ai ha founga faingofua ke ʻilo ʻe niʻihi kehé ko e Kāingalotú ko ha kakai angamaheni pē ʻoku nau ʻilo ʻa e taumuʻá mo ha fakahinohino ʻi heʻenau tokanga taha kia Sīsū Kalaisi? Ko e meʻa ia ʻe tokoni atu ha faiva ʻa e Siasí ʻe vavé ni hono tuku atú ke ke fai.
ʻOku kamata ʻa e Feʻiloaki mo e kau Māmongá ʻaki ha vakai fiefia ki he faʻa maʻuhala e niʻihi kehé ʻo kau ki he kāingalotu ʻo e Siasí. Peá ne fakafeʻiloaki ha fāmili ʻe ono, ʻo nau takitaha vahevahe e aʻusia fakatāutahá mo fakamatalaʻi ʻa e founga hono tokoniʻi ʻe he ongoongoleleí ʻenau moʻuí. ʻOku kau ʻi he niʻihi ʻoku kau aí ʻa e:
Pīsopé. ʻOku ngāue ʻa Siamane Suliveni mo hono uaifi ko Kemipē mei ʻAtalanitā, Siosiā, USA ke ʻi ai e uouangatahá ʻi ha kolo ʻoku kehekehe lolotonga hono ohi hake ʻena fānau tangata iiki ʻe toko tolú.
Faiakó. ʻOku tauhi ʻe Keni Niumatalolo, ko e faiako pule ʻo e timi ʻakapulu ʻa e ʻApiako Tautahí ʻa e US ʻi ʻAnapolisi, Melilení, USA mo hono uaifi ko Papulaá, ke māʻoniʻoni e ʻaho Sāpaté ʻi he tokoni ʻena fānaú mo e kau tokoni faiakó.
Tokotaha Laku Lole Mei ha Vakapuna. ʻOku fakamanatu ʻe Keili Halavoseni, taʻu 93 ne kau ʻi he Tau Lahi Hono II ʻa Māmaní mo hono uaifi ko Loleini taʻu 90 mei ʻAmato ʻi ʻAlesona, USA, ki he fānaú e mahuʻinga e ngāue tokoní. ʻOkú ne kei hoko ko ha pailaté, pea ʻoku laku hifo ʻe Misa Halavoseni mei ha vakapuna ha lole ʻo hangē ko ia naʻá ne fai lolotonga e Berlin Airlift hili e taú.
Tokotaha Fuhú. ʻOku ʻai ʻe Kalolaina Malini, ko ha tokotaha kickboxer mei Seni Hōsei, Kosita Lika, mo ʻene faiakó ka ko hono husepāniti ko Militoní ke potupotutatau hona fatongia ko e ongomeʻa malí mo e mātuʻa ʻa ha fānau īkí mo ʻena saiʻia he feʻauhí.
Tokotaha Tokoni ʻOfa Fakaetangatá. ʻOku fakaʻapaʻapaʻi ʻe Pisinū mo Mangala ʻAtikali ʻo Katamanatū, Neipoló e tui mo e tukufakaholo hona fonua tupuʻangá. Ko Misa ʻAtikalí ko ha ʻenisinia kuó ne langa ha ngaahi hala, akoʻanga, mo ha maʻuʻanga vai maʻa kuó ne tāpuekina ha ngaahi kolo iiki lahi.
Faʻē Ngāue Fakafaifekaú. ʻOku fakamatala ʻa Kuleki mo Tana ʻAmisitulongo mo ʻena tama tangata ko ʻAnitoní mei Sōleki Siti, ʻIutā, USA ki he feʻiloaki ʻa Sisitā ʻAmisitulongo mo e kau faifekaú ʻi heʻene hoko ko ha faʻē tukuhausia mo ha mātuʻa toko taha. Naʻe tokoni e ongoongolelei ne nau vahevahé ke liliu ʻene moʻuí. Naʻá ne mali kimui mo Kuleki, pea ʻoku toe fakakakato e talanoá ʻi he ʻalu ʻa ʻAnitoni ʻo ngāue fakafaifekau taimi kakato ki Saute ʻAfilika ʻo vahevahe e ongoongolelei kuó ne faitāpuekina ʻene faʻeé.
ʻE huluʻi ʻa e Feʻiloaki mo e kau Māmongá ʻi he Fale Fakamanatu ʻo Siosefa Sāmitá ʻi Sōleki Siti, ʻIutā, USA, pea ʻi he ngaahi feituʻu kehe ʻe toki fakapapauʻi atu.