Ko ʻEku Lēsoni ʻi he Tuí

ʻI he ngaahi taʻu siʻi kuo hilí, ne u akoʻi ha lēsoni efiafi fakafāmili ʻi ʻapí ki he tuí. Ne lahi ha taimi ne faʻa talanoaʻi ai ʻe hoku fāmilí e tuí koeʻuhí he naʻe faʻa fehuʻi hoku taʻoketé ki he ʻuhinga ʻoku tau fie maʻu ai e tuí. Naʻá ku tō ha tengaʻi meleni ʻi ha kiʻi ipu ke moʻui. Ne u talaange ki hoku fāmilí ʻoku hangē e tuí ko ha tengaʻi ʻakaú. Kapau te ke tokangaʻi lelei ia, ʻe tupu e tengaʻi ʻakaú.

Ne teʻeki ke fuʻu ola lelei ha ngoue kuo mau tō. Ka naʻá ku ʻamanaki te u lava ʻo ʻai ke tupu e fuʻu ʻakau ko ʻení pea lava ke u hoko ko ha faʻifaʻitakiʻanga lelei ʻo e tuí. Ne u tuku e ipú ʻi he matapā sioʻatá peá u tokangaʻi lelei ia. Naʻá ku tatali mo lotua ke tupu ʻeku tengaʻi ʻakaú.

Ne u meimei loto-foʻi, ka ʻi he hili ha uike ʻe taha naʻá ku mamata ki ha huli lanumata ʻoku ʻasi hake. Naʻe tupu hake ia ʻi he matapā sioʻatá ʻi ha uike ʻe taha. Ne tokoni mai ʻeku ongomātuʻá ke kumi ha feituʻu ke tō ia ʻi ha luluʻanga ʻakau ʻi homau ʻapí.

Naʻá ku tokangaʻi lelei ʻeku fuʻu ʻakaú. Naʻá ku fuʻifuʻi ia mo taʻataʻaki e vaó. Naʻe hokohoko atu ʻene tupu ʻafaʻafá. Naʻá ku fuʻu fiefia!

Hili ha ngaahi uike, naʻá ku fakatokangaʻi ha matalaʻi ʻakau, pea kamata leva ke laku mai e fuá. Naʻa mau mamata ki ha foʻi meleni ʻe fitu ne maʻu mei he foʻi tengaʻi ʻakau pē ʻe taha. Ko ha mana ia kiate au, pea ko e tali ia ki heʻeku lotú. Naʻe melie e fuá, ʻo hangē pē ko e fakamatala ʻi he ʻAlamā 32:42: “Pea ko e meʻa ʻi hoʻomou faivelengá mo hoʻomou tuí mo hoʻomou kātaki ʻi hono tauhi ʻo e folofolá, koeʻuhí ke tupu hono aká ʻiate kimoutolú, vakai, ʻe faifai pea mou toli hono fua ʻo iá, ʻa ia ʻoku fungani mahuʻinga tahá, ʻa ia ʻoku melie hake ʻi he meʻa melie kotoa pē.”

Ne u fiefia ʻaupito he aʻusia ko ʻení ke akoʻi ai au mo hoku fāmilí ko e tuí ko ha tefitoʻi moʻoni moʻoni ia ʻo e ongoongolelei ʻo Sīsū Kalaisí.