Mateuteu ke Ngāue

Ne u tupu hake ʻi he kolo ko Minasi ʻi ʻUlukuai. Ne papitaiso ʻeku faʻeé mo hoku tuofāfine lalahí ki he Siasí, ʻi hoku taʻu onó. Naʻe ʻikai pē ke kau ʻeku tamaí ki he Siasí, ka naʻá ne fiefia maʻu pē ke mau ʻalu ki he lotú. Naʻá ne tauhi foki e Lea ʻo e Potó mo totongi vahehongofulu.

Naʻe fuʻu tokosiʻi homau kiʻi koló, pea naʻe ʻikai ke ʻi ai hamau falelotu. Ne mau fakataha ʻi ha fale nofo totongi. Naʻe ʻi ai ha kiʻi vai kaukau ʻi tuʻa he falé pea mau ngāue ʻaki ia ki he papitaisó.

ʻI he fakaofi mai hoku taʻu valú, ne u fiefia he ʻamanaki ke papitaisó. Ka ʻi he ʻaho ʻo e papitaisó, naʻe ʻuha lahi pea fuʻu momoko. Naʻe talamai ʻe heʻeku faʻeé mahalo ʻoku ʻikai totonu ke u papitaiso he ʻaho ko iá koeʻuhí ko e momoko ʻa e ʻea. Ka ko hoku ʻaho fāʻeleʻí ia, pea naʻá ku fie papitaiso pē ʻi he ʻaho ko iá.

ʻOku ou manatu ki hono tui hoku vala hiná ʻo hifo ki he vaí ke papitaisó. Naʻá ku ʻiloʻi ʻe momoko e vaí, ka naʻe ʻikai ke u mokosia. Naʻá ku ʻiloʻi ne u fai ʻa e meʻa ʻoku totonú, pea naʻá ku maʻu ha ongo māfana.

Ne hili ha taimi nounou mei ai naʻe langa ha falelotu maʻa homau koló. ʻI he taimi ko iá ne lava e kāingalotu ʻo e Siasí ʻo tokoni ki hono langa ʻo ha ngaahi falelotu. Ko ʻeku ngāué ko hono tufi e faʻó mo e sikalu kuo ngangana he kelekelé ke lava ʻo toe fakaʻaongaʻi. Ko ha ngāue faingofua, ka naʻe fuʻu mahuʻinga ia kiate au. Naʻá ne akoʻi mai kiate au ʻa e anga ʻo e ngāué, pea naʻe tokoni ia ki hono teuteuʻi au ki he ngāue tokoni he Siasí ʻi he kahaʻú. Manatuʻi neongo ʻokú ke kei talavou, ʻoku mahuʻinga e ngaahi meʻa ʻokú ke fai he taimi ní.