Te Beku Ngkai nakon te Beku Rimwii

“N na kabobirimwaka ma ngkoe nakon te umwantabu!” e taku Mórmon, ni kotea taubukin te umwantabu ae waikakang ae kona n nooraki ietan taian aroka aika baam. Ngkanne e a kabirimwaka n aron ae kona bwa e na rimoan tarina ae karimwiina, Morian.

Ataeinimwaane ma aia karo a kaman rianna teuana te maaire mani mweengaia, ma Moomon ao Morian a tabe ni kabobirimwaka ngke a roko n te oo te biti itinanikun aia autinibotaki n aia uoote. A tei ni katoka kuaia.

Imwaain ae a baireia bwa antai ae moanna, a weteaki iroun temanna te ataeinimwaane, “Kam kan takakaro n te butibooro?”

Mórmon e tangira te butibooro, ma ngaia ao ana utu a nang nako ni kaitiaka autin te uoote bwa e aonga n tauraoi ibukin te taromauri ibukin te bong are imwiina.

E ioioa atuna Moomon. “Tiaki ngkai―tao rimwi riki!” e kaboa te taetae.

E aki maan imwiina ao a mwakuri korakora Moomon ao Morian. E kamwaingi taian kaintekateka Mórmon ao n taea aon te timanti ma tamana ngke e tabe ni mwaobuna te timanti Morian ma tinana.

Imwiina a uaia ni kaitiaki taian tirotaam ataeinimwaane inanon te roki n tebotebo. “I aki iangoia bwa N na kaitiaka te umwantabu, ma e boni kaunga,” e taku Morian. “Ao ngkoe, Moomon? Anne bukina ngkai ko roko ma ko na aki takakaro n te butibooro?”

E iangoa tamana Moomon. Bon te bitiobi ngaia n aia uoote, ma e bon reke naba ana tai n ibuobuoki ni kaitiaka te autinibotaki.

“I mena ikai ibukina bwa I kan riki n ai aron Tamau,” e taku Moomon.

Ngkanne e a iangoia mitinare inanon ana uoote. A bon tatabetabe ni karebwerebwe iaon taian mataroa ao n tibwaua ana Boki Moomon ma tabeman. A na kaoia aomata bwa a na roko n taromauri n te kateitei are a kaitiakia ataeinimwaane.

“I Mena ikai ibukina bwa n te bong teuana I kan karaoa naba au mwakuri ni mitinare,” e iango Moomon. “I kona ni buokia mitinare man katauraoan te umwantabu.”

E tabe n iangoa te ingabong Mórmon, ngke ngaia ma tarina a na bae n uti n te aoa 6:00, n rianna nakon te taromauri n aia kabaraaki aika mainaina ao aia neketai, ao ni katauraoi kaintekateka ao booki n anene n ruun te Moanrinan.

“I mena ikai ibukina bwa I kan beku n te nakoa inanon te Ekaretia,” e iango.

E iango Mórmon bwa e na kanga n riki bwa te riikan rimwii. E na bae ni kabuta te toa ao ni karaoi riki bwaai tabeua ni beku.

“I mena ikai ibukina bwa n te ririki are e na roko N na karekea te nakoanibonga, ao I tangiria ni karaoi bwaai ni kabane ake I kona ngkai ni katauraoi.”

Iai te bwai ae e a kaman tia ni katauraoia Mórmon ibukin te nakoanibonga: e a tia ni karekea te Kanuanga n te Onimaki iroun te Atua. E a kaman n reiakinaki ni maiuakina te reirei are kaineti ma reirein te euangkerio ao ni beku ibukiia tabeman.

N te kabane e taraa tamnein tarina n te tirotaam ao e wingare.

“I mena ikai ibukina bwa I tangira te Uea,” e taku, “ao ibukina bwa te beku ngkai e na buokai ni katauraoai ni beku rimwii.”E maeka te tia korokaraki i Utah, USA.