Kamwane

Tamnei

illustration of a man fishing in a river

Kamatata n te tamnei iroun J. Ken Spencer

Te aotum bon te tai ae kakukurei ibukia taan akawa, ni kabongana te kainroaroa ma te bwai ni kabwaru itabon aia matau, bwa aio aia tai ikan te karaanga n anaaki nanoia ngkai a bora ni baki n te aro bwa aonga ni kakorakorai rabwataia bwa a na nuai man karakon te amwarake n tain te winta.

Ana kouru te tia akawa bon akawaan ikan te karaanga rinanon ana konabwai n te aro ni kamwane. Te tia akawa ae bane arona e kamatebwaia anuan te ika, ao ai aron naba tauan kanoan te bong, bwarobwaron te nao, ao aekakin maan aika bingingi ake e kang te ika ao nningai are a na kaabung iai maan akanne. Angin te tai e na bae ni karaoi ni baina ana kai ni kabwaru ake e kabonganai. E ataia bwa maan aika bingingi aikai a kamatoaki ma matau aika uarereke are a riki bwa te bwai ni kamwane ae nakoraoi ibukina bwa te ika e kinaa naba te kabwaka ae uarereke ao n aki iangoia bwa e na kana te abea anne.

Bon te kakukurei matakuakinan te ika ae otirake man te ran, e tenaa te abea, ao n un ni karokoa are n te kabane e a kua ao e a bae. Te kaboo ae korakora bon imarenan rabakaun te tia akawa ao ana konabwai, ao te ika ae rine.

Kabonganaan kanan te kai ni kabwaru ni karangirang ao n akawa te ika bon te katoto n ana anga Rutibeero ake e katai n angin te tai, ni mwamwanaira, ao ni kataia ni kamwaneira.

N aron te tia akawa are e ataia bwa iika a rootaki n te baki, Rutibeero e atai “bakira,” ke mamaarara, ao ni kariirira ma kanan te kai ni kabwaru aika karioaki are, ngkana ti kabongana, e kona n urua aron raun maiura nakon ana kairoro n akea te nanoanga. Ao n aron te tia akawa ma ana kainroaroa are e reke konana iika ao ni kaoki iika nako nanon te ran, n aron Rutibeero bon akea ana anganano ni kanakoa. Ana kouru bwa e na karaoia konana bwa a na karawawataki n ai arona.

Teuana mai buakon te anga are e kabongana ni kaitaraira bon ana konabwai ni kewe ao ni mwamwanaira n anai nanora bwa te buakaka bon te raoiroi ao te raoiroi bwa te buakaka. Man moan raoi te karikibwai n te Kauntira i Karawa, Tatan, e tangiria bwa e na urua inaomatan te aomata, are e a tia n anga te Atua nakon te aomata (taraa Moses 4:3).

Te buaka ibukin inaomatan te aomata are e anganaki iroun te Atua e reitinako n te bong aei. Tatan ao taan iriria iai kanan aia kai ni kabwaru aika katobibira, ni kantaningaia bwa ti na mamaara ao n anai abeana bwa e aonga ni kabaeira ma ana anga aika kewe.

Tariu ao mwaaneu, ti bia tarataraira man abea aika karioaki ake ti anganaki man ana anga ni kewe te tia akawa, Rutibeero. Ti bia karekea te wanawana ao te atatai n noori koauan bwaai aika raba ni kinai ao n aki butimwaai ana anganano aika a kamamate.

Ao ibukimi ngkami ake kam a tia n irekereke ma aekakin anua nako aika kareke, iai te kantaninga ibukina bwa te Atua e tangiria natina ni kabane ao ibukin ana Mwakuri ni Kamaiu te Uea Iesu Kristo a kona ni karaoaki bwaai ni kabane.