O Perofeta o le Feagaiga Tuai
Ieremia
“Sa soifua Ieremia i se taimi ma se nuu faigata, ae sa faatagaina e le Alii e ‘muai vaai i se taimi o le faamoemoe i le taimi o le toe faapotopotoina o Isaraelu.’”1 —Linda K. Burton, peresitene aoao o le Aualofa
Ata o le tusi taai na pueina e dimdimich/iStock/Thinkstock; Ieremia, saunia e Walter Rane © IRI
Ou au o le atalii o Hilikia, o se faitaulaga i Anatota, e latalata i Ierusalema. I le taimi o lou talavou, “na oo mai ia te au le afioga a Ieova, ua faapea mai,
“Na a’u iloa oe a o lei faia oe e au i le manava; na au faapaiaina oe a o lei fanau mai oe, na au tofia oe e fai ma perofeta i nuu.”
Sa ou lagona le le saunia mo lenei valaauga, ma sa ou tali atu, “Faauta, ou te le iloa ona tautala, aua o au o le tama itiiti.”
Sa fetalai mai le Alii, “Aua e te faapea, o au o le tama itiiti: aua o i latou uma ou te auina atu i ai oe, e te alu lava i ai, o mea uma foi ou te fai atu ai ia te oe, e te fai atu ai lava.
“Aua e te fefe ia te i latou: aua ou te ia te oe e laveai ia te oe.” Ona “pai mai [lea o le Alii] i lou gutu” ma tuuina i ai i totonu ia upu.2
Sa ou vavalo i Ierusalema mo le 40 tausaga, mai le 626 i le 586 t.l.m., i le taimi o nofoaiga a Iosia, Ioakima, ma Setekaia.3 O au o se perofeta faaonapo nei o le perofeta o Liae o le Tusi a Mamona. Sa ma tausalaina uma le amioleaga o tagata i Ierusalema ma valoia le faatafunaga o lena aai tele.4
Na poloaiina au e le Alii e faamaumau au valoaga i “se tusi taai.”5 Ina ua faalogo le Tupu o Ioakima i valoaga, na ia susunuina le tusi taai. Na poloaiina au e le Alii e toe tusi ia valoaga ma faaopoopo atu i ai le tele o isi valoaga.6
Sa ou feagai ma feteenaiga faifai pea a o ou talai atu le afioga a le Alii. Na taia au e Pasura, le atalii o le matai sili, ma tuuina au i laau faamau. Sa mananao ia tagata faatupu vevesi e faaoo le oti ia te au ona o lau talaiga. Sa avea au ma se perofeta itagia, e masani ona lafo i sela ma falepuipui. Sa ou ola i se taimi o le matua amioleaga tele lava.7
Ae e ui i le ola ai i le lotolotoi o faigata, sa faatagaina au e le Alii ina ia muai vaai o le a faapotopotoina le aiga o Isaraelu i aso gataaga, o le a tusi ai e le Alii Lana tulafono “i o latou loto,” ma Ia aumaia “e taitasi i aai ma le taitoalua i aiga” i Siona.8
A o faaauau ona ou talai atu le afioga a le Alii—e ui lava ina sa faigata—sa ou aoaoina o se tautinoga faaletagata o le talalelei e taitai atu ai i le filemu. A o tatou atiae taitoatasi le faaaumea ma le Alii, e mafai ona tatou mauaina uma le faamoemoe i le lotolotoi o faigata ma puapuaga.