—Talafaasolopito o Aiga—O Loo O’u Faia

O le tausia o se api talaaga e le faigofie. E masani lava ona tatou faapea atu ia i tatou lava tatou te pisi tele po o le le lavavā tele po o le le manaia tele o o tatou olaga e tusia. Sa ou iloaina i ni nai tausaga ua mavae, o le tausiga o se api talaaga e le tatau ona faigata ma e mafai ona ou tuputupu ae e fiafia i ai.

Sa amata ona ou tusia se mea e tasi i le aso. Sa lei afaina pe afai e matuai umi lava pe faafiafiaina; na o lou tusi lava o soo se mea sa i lo’u mafaufau po o soo se mea na tupu i lena aso. Ua faamanuiaina ai lava lo’u olaga.

I se tasi aso sa i ai se tasi o lou aiga sa mafatia ma sa ou le mautinoa po o le a se tala e fai atu ia te ia, ae sa uunaia au e faitau ia te ia se tasi o faamatalaga o lau api talaaga. Sa mafai ona ou faasoa atu sina vaega itiiti o au lea sa ou faamaumauina i lena api talaaga laitiiti lanu uliuli, ma sa ou vaai i le auala na fesoasoani ai e faafiafiaina lona loto.

Ou te faamautinoa atu afai o le a amata ona e tusia se mea e tasi i le aso, o le a faamanuiaina lou olaga. Tusa lava po o le a le laitiiti po o le tele, o le tusiaina i lalo o faamanuiaga i lou olaga e mafai ona fesoasoani ia te oe ina ia manatuaina.

Ata

A young woman and elderly woman looking at family history papers.

Ina ua ou papatiso, sa ou faalogo i le tele o mea e uiga i le talafaasolopito o aiga, ae sa ou le iloa pe faapefea ona fai pe mafai foi ona ou faia. Sa ou filifili loa e tatalo e uiga i ai, ma sa ou lagona faapea ua tatau ona ou amata galue ai i le taimi lava lena. Sa ou lagona ua naunau o’u tuaa ina ia ou amataina ma o le a latou fesoasoani mai ia te au ia maua faamatalaga e manaomia e faia ai sauniga.

Sa amata i lou aveina o se vasega o talafaasolopito o aiga, ma i se taimi puupuu mulimuli ane sa valaauina au e avea ma se faufautua o talafaasolopito o aiga. Sa ou popole aua sa le tele ni mea na ou iloa e uiga i ai, ae na ou taliaina le valaauga.

I se tasi aso sa ou asiasi atu ai i le uso o lo’u tinamatua, o le sa i ai ni pepa o faamatalaga e uiga i le tina o lo’u tinamatua. Na te lei manao e faasoa mai le tele o faamatalaga aua sa i ai se latou tu masani o le le talanoa e uiga i tagata o aiga ua maliliu. Sa ia fai mai o le aso na sosoo ai e faamanatu ai le maliu o le tina o lo’u tinamatua, ma o le a ia susunuina ia pepa o faamatalaga. Sa ou fai atu i ai pe mafai ona ou mauaina muamua mai ni faamatalaga mai ia pepa, ma sa ia tuuina mai ia te au. Sa ou iloaina i lena taimi o le a fesoasoani mai le Tama Faalelagi ia te au e faaauau pea lau sailiiliga.

A o ou auauna atu i le nofoaga autu o talafaasolopito o aiga i tafatafa o le malumalu, sa faaauau pea ona ou iloa atili e uiga i lo’u aiga. Sa ou iloaina o tagata e toalua o matua o matua o le tina o lo’u tinamatua o ni tagata na malaga mai Italia ma sa i ai se la faatoaga e latalata i São Paulo, Pasila. Sa leai se fesootaiga a lo’u aiga ma tagata o le aiga sa i le faatoaga, ae sa ou maua se tausoga o le sa tusia se tusi e uiga i le gafa o lo matou aiga. Na ia tuuina mai ia te au le tusi, lea e iva tausaga sa ia tusiaina ai. Sa ia fai mai na te le iloa pe aisea sa tatau ai ona ia tusiina ae sa lagona o le a fesoasoani i se tasi i le lumanai. Sa ou iloa o le agaga o Elia na musuia ai o ia.

O o’u aafiaga na aoao mai ia te au faapea o loo tatou faia se galuega paia. O loo faatalitali mai o tatou tuaa mo la tatou fesoasoani ma ua i o tatou autafa e fesoasoani ia i tatou.

Ata

Youth at the Preston England Temple.

O au o se tagata liliu mai ma na o le pau lea o le tagata o le Ekalesia i lo’u aiga. Ua ou aoaoina o se tasi o sauniga paia o le papatisoga lea mo e ua maliliu. Sa ou alu i le malumalu i se maimoaga taamilo, ma a o faalogologo atu i le tagata o aveina le maimoaga o talanoa e uiga i sauniga, sa ou lagonaina se leo lemu, itiiti o tau mai ia te au ou te alu i le nofoaga autu o talafaasolopito o aiga e auina atu se talosaga mo le sauniga o le malumalu mo lo’u tina, o le ua maliu. Sa ou matua fiafia lava ina ua faamautinoa mai e le faitotoa o le FamilySearch mulimuli ane, ua uma ona faia ona galuega o le malumalu. Na faamalosia ai la’u molimau, ma ou te iloa o se tasi o mafuaaga ua tatou i ai iinei i lenei lalolagi o le fesoasoani atu i o tatou tuaa ina ia maua le talalelei moni a Iesu Keriso.

Ata

Family members together at a table looking at a photo album.

Ina ua uma ona faauu mai le aoga maualuga, sa uunaia au e asiasi i o’u matua matutua uma e toafa. Sa maua sou taimi avanoa, ma ou te iloa atonu o le a ou le toe mauaina lenei avanoa, o lea sa ou faaaluina ai se vaiaso se tasi i vaega taitasi o o’u matua matutua.

Sa ou faaaluina lo’u taimi e sailiili ai i atigipusa tuai, faitauina o tusi tuai, ma matamata i ata tuai. Sa ou tusia tala o olaga o o’u matua matutua, savalivali faataamilo i fanua maliu, ma asiasi atu i nofoaga sa nonofo ma galulue ai ou matua matutua ma tagata o o latou aiga. Sa malie! Sa ou aoaoina ni mea se tele e uiga i o’u tuaa, o’u matua matutua, ou matua, faapea ma au. Sa ou iloaina semanu ou te le mauaina le olaga lea ua ou mauaina pe ana leai ou tuaa.

Ina ua uma la’u malaga, sa ou toe foi mai ma le pe tusa ma le 1,000 o igoa o o’u tuaa ma ua mafai ona faia galuega o le malumalu mo le toatele o i latou. O le mulimuli i uunaiga a le Agaga Paia, ma le asiasi atu i o’u matua matutua o se tasi lea o faaiuga sili na ou faia.

Ata

Indexing, UK Army war records screen, Wales, UK

Ina ua ou fesili i lo’u tama mo ni manatu o le talafaasolopito o aiga e faamaea ai lau Alualu i Luma o le Tagata Lava Ia, sa ia faamatala mai na ia maua ni igoa o le aiga i ni nai tausaga ua mavae, ae sa lei mafai e ia lava ona saunia igoa e ave i le malumalu ona o le pisi o lona taimi. O la’u fesoasoani o le a mafai ai e nei tagata o aiga ona maua faamanuiaga o le malumalu.

Mo ni nai masina na sosoo ai, sa ou faaaluina aoauli ma afiafi o Aso Sa e ta ai i totonu o le komepiuta ia igoa ma aoaoina tala o le aiga mai lo’u tama. Na oo lava ina matou okaina se taaiga o ata mataninii e saili ai nisi faamatalaga. O nisi taimi pe a faigata ona faitau ia ata tuai, ou te faia se tatalo le magagana ona aveina lea i fafo o se pepa ma tusi oomi ia ata. Mai le le manino, na faaali mai ia igoa.

Na iu lava ina ou aoina mai se faaputuga tele o igoa o aiga, ma sa fesoasoani le autalavou i le matou uarota e faia papatisoga. Ona aveina lea e o’u matua ma isi tagata o le uarota ia kata o igoa e faamaea ai isi sauniga o le malumalu.

Na foliga mai e na o sina taimi puupuu ua mavae atu ae ou sauniuni foi au ia e alu i le malumalu mo ou lava faaeega paia. Sa ou fiafia lava ae na popole foi.

A o matou agai atu i le malumalu, na faamatala mai e lo’u tama sa ia maua nisi o le kata o igoa o le aiga sa ou saunia mo la’u galuega faatino o le Alualu i Luma o le Tagata lava Ia. O nisi sa sese le mea na tuu ai, o lea sa ia aumaia ai ia kata o igoa mo lo’u tina, o lo’u toalua faaolioli, ma ia e faataunuuina. Na ia faasoa mai ia te au o latou igoa, ma sa ou manatuaina i latou mai lau galuega faatino.

A o ou osia feagaiga paia i le malumalu, sa ou lagonaina le siomiaina e e pele i itu uma o le veli. Sa ou lagonaina se filemu maoae i le iloaina o le a mafai ona faatasia e faavavau ma lo’u aiga.