Faatanoraa no te mau pureraa a te Feia Apî Paari, e haamata i te ava‘e tenuare

Ua faaara te Peresideniraa Matamua e te Tuhaa Faatere o te Haapiiraa a te Ekalesia i te faatanoraa o te taime, te vahi, e te haaparareraa o te mau pureraa na te feia apî paari, e mana i te ava‘e no tenuare 2015. Teie te faatanoraa :

I‘oa : Pureraa na te Feia Apî Paari na te ao atoa nei : Hoê pô e (te i‘oa o te taata a‘o).

Taime : E toru taime i te matahiti, i te piti o te sabati o te ava‘e tenuare, te sabati matamua i te ava‘e me, e te piti o te sabati i te ava‘e setepa.

No vai ma : Te ani-manihini-hia nei te feia apî paari atoa, tei faaipoipo e tei ore i faaipoipo, ia tae mai. Te ani-manihini-atoa-hia nei te mau piahi e faaoti ra i te haapiiraa tuarua e aore ra i tera faito haapiiraa, ia tae atoa mai.

Vahi : E tupu te mau pureraa o te ava‘e tenuare i te Fare Haapiiraa Teitei Brigham Young i Provo, Utah ; i BYU–Idaho ; e aore râ i BYU–Hawaii. E tupu te mau pureraa o te ava‘e me i roto i te Pû Amuiraa i Roto Miti, e aore râ i te tahi atu mau tuhaa o te Pû Faatereraa a te Ekalesia. E tupu te mau pureraa o te ava‘e setepa i te tahi vahi no te mau Hau Amui no Marite.

Haaparareraa : Tau mahana rii noa i muri mai i te mau pureraa tata‘itahi, e roaa te mau a‘oaraa papa‘i, te mea faaroo, e te hamaniraa video na roto i te reo peretane i ni‘a ia LDS.org e te faanahoraa Vairaa buka Evanelia i roto i te hoê haaputuraa apî na te Feia Apî Paari. E matara mai te tahi mau reo i muri iho. E tuuhia’tu te mau haapotoraa o te mau a‘oraa i roto i te Liahona, e e rave rahi mau faahitiraa papa‘i, te mau faahitiraa hoho‘a (memes), te mau tuhaa video e haaparare-ti‘a-atoa-hia e i muri mai i te pureraa na roto i te mau reni rave‘a haapareraa sotiare a te Ekalesia, oia’toa te mau api sotiare a te mau taata a‘o.

E tamau noa â te mau taata a‘o i te ma‘itihia e te Peresideniraa Matamua i rotopu i te mau Hui mana faatere rahi e te feia faatere rahi o te Ekalesia.

Ua faaarahia’tu te mau faatanoraa i te feia apî paari i roto i te pureraa FHE i te 2 no novema 2014, e i te feia faatere autahu‘araa i roto i te hoê rata a te Peresideniraa Matamua no te 28 no atete 2014, tei roto atoa te tapura haapurororaa no 2015.