Agai Pea i Luma le Faaauauina o Malumalu

“A maea ona fausiaina ma faapaiaina uma malumalu ua uma ona faasilasila atu, o le a atoa ai le 170 malumalu e faaaogaina i le lalolagi atoa,” na saunoa mai ai Peresitene Thomas S. Monson i le taimi o le konafesi aoao ia Oketopa 2014. “Ona o loo taulai atu a matou taumafaiga i le faamaeaina o malumalu ua uma ona faasilasila atu, o lea matou te le toe faasilasilaina atu ai nisi malumalu fou i le taimi nei. Peitai, i le lumanai, pe a matou iloaina manaoga ma maua ni fanua, o le a toe faasilasila atu ai nisi malumalu faaopoopo.”

Ina ua toe faapaiaina e Peresitene Monson le Malumalu o Ogden Iuta ia Setema 2014, ua atoa i ai le 143 o le aofai o malumalu o loo faaaogaina a le Ekalesia i le lalolagi atoa.

Na faapaiaina le Malumalu o Fort Lauderdale i Florida ia Me 2014 e Peresitene Dieter F. Uchtdorf, Fesoasoani Lua i le Au Peresitene Sili. O le a faapaiaina le Malumalu o Phoenix Arisona i le aso 16 Novema, 2014, ma isi malumalu e le itiiti ifo ma le lima o le a faapaiaina pe toe faapaiaina i le 2015.