Ang Reyalidad sa Pasko
Ni Bishop Gary E. Stevenson
Presiding Bishop
Kon wala pa ang pagkatawo ug Pag-ula sa Manluluwas, kita wala untay Tigpangamuyo, walay Manlalaban uban sa Amahan, ug walay Tigpataliwala kinsa nakahimong posible para kanato nga makabalik ngadto sa presensya sa atong mahigugmaong Langitnong Amahan ug mag-uban isip mahangturong mga pamilya.
Sa dihang ang akong amahan bata pa, siya nagpuyo sa gamayng lungsod sa central Utah duol sa Utah Lake. Sa panahon sa wala pa ang mga pioneer, ang mga Native American mangayam ug mangisda sa dapit. Pihong mga lokasyon libut sa lawa nahimong sikat alang niadtong gustong mangita og mga tumoy sa pana.
Sa usa ka kalihokan nga mag-uban ang mga amahan ug anak sa dihang singko anyos pa akong amahan, ang ilang ward miadto sa Utah Lake aron sa pagpangita og mga tumoy sa pana. Human ang grupo migahin sa tibuok adlaw sa pagpangita, ang akong lolo nangutana sa akong amahan kon siya nakakita ba og tumoy sa pana.
“Wala, wala koy nakit-an,” mitubag akong amahan. Dayon iyang gikuot iyang bulsa ug miingon, “Apan akong nakit-an kining nindot nga bato nga naporma og sama sa Christmas tree.”
Nakakita diay ang akong amahan og tumoy sa pana, apan wala makaila niini. Siya nagkupot sa tinuod nga butang diha sa iyang kamot, apan wala makaila niini.
Pag-ila sa Manunubos
Para sa daghang tawo karon, ang ilang panglantaw kon unsa ang tinuod ug labing importante—si Jesukristo, ang Manluluwas sa kalibutan—nahimong libog tungod sa mga butang nga dili tinuod.
Bag-ohay lang nakakita ko og programa sa telebisyon kabahin ni Jesukristo nga nagpangutana kon Siya gipakatawo ba gyud ni Birheng Maria. Gani ang bantugang mga propesor gikan sa inilang mga institusyon sa pagkat-on nagduha-duha kon kini ba mahimo.
Mitubag niadtong mga nagduha-duha, si Presidente Ezra Taft Benson (1899–1994) miingon: “Kining gitawag nga mga eskolar nagtinguha sa pagkombinser kanato nga ang balaanong pagkatawo ni Kristo sumala sa giproklamar diha sa Bag-ong Tugon dili gyud balaanon ug nga si Maria dili birhen sa panahon sa pagpanamkon kang Jesus. Gusto nila nga kita motuo nga si Joseph, ang ama-ama ni Jesus, mao ang Iyang pisikal nga amahan, ug busa si Jesus usa ka tawo sa kinaiya ug karakter. Sila makita nga buutan sa ilang pagdayeg Kaniya kon sila moingon nga Siya bantugang moral nga philosopher, gani pinakabantugan. Apan ang nagpahipi nga katuyoan sa ilang paningkamot mao ang pagsalikway sa balaang pagkaanak ni Jesus, kay niana nga doktrina nag-agad ang ubang mga pagtuo sa Kristyanismo.”1
Naka-ski ko sa artipisyal nga snow, ug nakadayan-dayan og peke nga mga Christmas tree gamit ang pekeng mga icicle. Usahay mahimong lisud sa pagsabut unsa ang tinuod, ilabi na sa panahon nga ang teknolohiya mohimo og daw tinuod sa usa ka butang. Busa unsaon nato pagkahibalo unsa ang tinuod? Unsaon nato pagbaton og pagpamatuod sa reyalidad ni Jesukristo?
Kita makaangkon og pagpamatuod sa unsay tinuod samtang kita magbasa sa pulong sa Dios diha sa kasulatan—karaan ug moderno. Kita masayud sa reyalidad sa Manluluwas samtang kita maminaw ug magbasa sa mga pagpamatuod sa buhing mga propeta ug apostoles. Atong makaplagan ang kamatuoran samtang kita mag-ampo “sa kinasingkasing, uban sa tinuod nga katuyoan, nga may hugot nga pagtuo kang Kristo” (Moroni 10:4). Atong madiskobrehan ang “matarung nga paagi” samtang kita “nagtuo diha kang Kristo, ug dili molimud kaniya” ug samtang kita“moyukbo kaniya, ug mosimba kaniya uban sa tanan [natong] gahum, hunahuna, ug kusog, ug sa tibuok [natong] kalag” (2 Nephi 25:29).
Mga Panagna sa Pagkatawo ni Kristo
Daghang kasulatan ang nanagna sa pagkatawo ni Kristo—ang unang Pasko. Mahimong kita makalimot kon kita mobasa niining mga panagna sa kasulatan nga kini sa tinuoray mga panagna. Kini naghatag og daghang detalye kabahin sa unsay mahitabo apan wala pa mahitabo.
Walo ka gatus ka tuig sa wala pa matawo si Kristo, si Isaias miingon, “Kay alang kanato ang usa ka bata natawo, alang kanato ang usa ka anak nga lalaki gihatag: ug ang kagamhanan igatungtong sa iyang abaga: ug ang iyang ngalan pagatawgon Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait” (Isaias 9:6).
Unom ka gatus ka tuig sa wala pa matawo ang Manluluwas, gihulagway ni Nephi ang iyang panan-awon sa inahan sa Anak sa Dios:
“Ako mitan-aw ug nakakita sa … dakbayan sa Nazaret; ug diha sa dakbayan sa Nazaret ako nakakita sa usa ka birhen, ug siya hilabihan ka matahum ug kaputi. …
“Ug [ang anghel] miingon ngari kanako: Tan-awa, ang birhen nga imong nakita mao ang inahan sa Anak sa Dios. …
“Ug ako mitan-aw ug nakakita sa birhen pag-usab, nagkugos og bata diha sa iyang mga bukton.
“Ug ang anghel miingon ngari kanako: Tan-awa ang Kordero sa Dios” (1 Nephi 11:13, 18, 20–21).
Usa ka gatus og bayente kwatro ka tuig sa wala pa matawo ang Manluluwas, si Haring Benjamin miingon:
“Tan-awa, ang panahon moabut, ug dili kini layo, nga uban sa gahum, ang Ginoong Makagagahum … manaog gikan sa langit aron moipon sa mga katawhan, ug mopuyo sa usa ka mortal nga lawas, ug makig-uban taliwala sa mga tawo, magbuhat og kahibulongan nga mga milagro. …
“Ug siya pagatawgon og Jesukristo, ang Anak sa Dios, ang Amahan sa langit ug sa yuta, ang Tiglalang sa tanan nga mga butang gikan sa sinugdanan; ug ang iyang inahan pagatawgon og Maria” (Mosiah 3:5, 8).
Otsentay tres ka tuig sa wala pa matawo si Kristo, si Alma miingon, “Ug tan-awa, [ang Anak sa Dios] matawo kang Maria, didto sa Jerusalem diin mao ang yuta sa atong mga kagikanan, siya ingon nga usa ka birhen, usa ka bilihon ug pinili nga tawo” (Alma 7:10).
Ug unom lang ka tuig sa wala pa ang unang Pasko, si Samuel ang Lamanite mideklarar:
“Ug tan-awa, ako mohatag kaninyo niini nga timailhan sa iyang pag-anhi; kay tan-awa, adunay daghan kaayo nga mga kahayag sa langit, nga diha sa gabii nga siya dili pa moabut walay kangitngit. …
“Ug tan-awa, adunay bag-o nga bitoon nga mosubang, nga sa sukad wala paninyo masud-ong” (Helaman 14:3, 5).
Ang mga Judeo naghinam-hinam niining dakong hitabo. Sila nasayud nga ang Mesiyas moabut, ug sila nagdahum nga Siya moabut uban sa himaya, moluwas nila sa temporal nga paagi, moestablisar og yutan-ong gingharian, ug mangulo isip ilang Hari.
Si kinsa ang unang nasayud sa pagkatawo sa Mesiyas? Ang Sanhedrin ba o kadtong mga tawo nga may gahum ug impluwensya?
Ang Biblia nagsaysay kanato nga ngadto sa mapainubsanong mga magbalantay sa mga karnero nga nangatulog sa yuta diin ang anghel mideklarar sa “maayong balita sa dakong kalipay” (Lucas 2:10) ug ang mga Mago sa layong dapit kinsa nakakita sa “iyang bitoon didto sa sidlakan, ug [miadto] sa pagsimba kaniya” (Mateo 2:2). Ang gamhanan ug maimpluwensya, kansang panan-awon nagduha-duha tungod sa mga pilosopiya niining kalibutan, wala makauban sa Manluluwas sa Iyang pagkatawo o panahon sa Iyang pangalagad. Anaa sa ilang atubangan ang kamatuoran apan wala sila masayud o midawat niini.
Mahimong Mas Kristohanon
Si Presidente Benson miingon nga usa sa pinakanindot kabahin sa Pasko mao nga kini nagpalambo sa atong pagkasensitibo sa mga butang sa Dios:
“Kini nakapahimo kanato sa pagpamalandong sa atong relasyon ngadto sa Amahan ug sa kalalum sa atong debosyon para sa Dios.
“Kini nagdasig kanato nga mas maloloy-on ug mahinatagon, mas maghunahuna sa uban, mas matinuoron, mas puno sa paglaum ug gugmang putli—tanang Kristohanong mga kinaiya. Dili ikatingala ang diwa sa Pasko makatandog sa kasingkasing sa mga tawo sa tibuok kalibutan. … Bisan sa usa lang ka panahon, dugang atensyon ug debosyon gipahinungod ngadto sa atong Ginoo ug Manluluwas, si Jesukristo.”2
Karong Pasko, samtang natandog sa diwa sa panahon ang atong kasingkasing, magbuhat ta og usa ka butang nga nagpahayag sa atong mga pagbati sa dayag nga paagi, nagpakita nga kita nakasabut nga ang natawo nga bata sa Betlehem mao ang tinuod nga Manunubos. Si Presidente Howard W. Hunter (1907–95) mihatag og pipila ka praktikal nga tambag nga makatabang nato sa pagbuhat niini:
“Karong Pasko, ibalik ang maayong relasyon. Pangitaa ang usa ka nakalimtang higala. Ayaw pagduhaduha ug pulihi kini og pagsalig. Paghimo og sulat. Paghatag og mabinationg tubag. Dasiga ang mga batan-on. Ipakita ang inyong pagkamaunungon sa pulong ug buhat. Tumana ang saad. Ayaw pagdumot. Pasayloa ang usa ka kaaway. Pangayo og pasaylo. Paningkamot sa pagsabut. Hunahunaa ang inyong mga gikinahanglan sa uban. Hunahunaa og una ang uban. Magbinuotan. Magmabination. Katawa og gamay. Pasalamat. Pag-abi-abi og estranghero. Pahalipaya ang kasingkasing sa usa ka bata. Tagamtama ang kaanindot ug katalagsaon sa kalibutan. Ipahayag inyong gugma ug dayon ipahayag kini pag-usab.”3
Kon wala si Kristo, walay Pasko. Kon wala si Kristo, walay kahingpitan sa kalipay. Kon wala ang Iyang pagkatawo ug Iyang Pag-ula, kita wala untay Tigpangamuyo, walay Manlalaban uban sa Amahan, ug walay Tigpataliwala kinsa nakahimong posible para kanato nga makabalik ngadto sa presensya sa atong mahigugmaong Langitnong Amahan ug mag-uban isip mahangturong mga pamilya.
Mosaulog ko uban ninyo sa maanindot ug milagrusong reyalidad sa pagkatawo ug misyon sa Anak sa Dios, ug ako mopamatuod nga si Jesukristo mao ang atong Manluluwas ug Manunubos—ang gisaad nga Mesiyas.