Bitakin Nanou

Ngke I moan ongo taekan ana euangkerio ae kaokaki Iesu Kristo, I namakina te Tamnei ni kakoaua koauana. Rinanon te tataro, au kakoaua e rikirake riki ni matoa, ao I baireia bwa N na bwabetitoaki.

Bon imwiin au babetito, kain au uoote a waaki n titirakinai bwa tera au namakin n taekan te nako ni mitinare. N na taekinna ma te koaua, I bon aki ataia raoi bwa tera ae N na taekinna. Iangoan kitanakiia au utu ao te reirei n nako ni mitinare e taraa ni katabeaianga.

Imwiina n te bong teuana I tabe n iangoa rairakiu. I uringiia mitinare ake a reireinai, ake a kaekai au titiraki ma te taotaona n nano ao ni buokai ni kaotaai n te euangkerio. I kunea bwa n akean aia ibuobuoki, N na bon aki kona ni kunea te Ekaretia ae koaua. Bon te tai naba are I karekea ataakin anne, te nano ni kan mitinare e a bwebwerake inanou. I kona n namakina te Tamnei n tuangai bwa I riai n nako ni kabwanina au tai ni mitinare.

I ataia bwa te mwakuri ni mitinare bon ana mwakuri Tamara are I Karawa ao ti kona ni buoka uotakin nano nakon te atatai ae moan te tamaroa n te euangkerio are e a tia ni kaokaki.