100 Iiō in Nokon in Jota eo an Baam̧le

Pija

A portrait of eight of the sons of Joseph F. Smith. All are identified

Pija eo letok jān Church History Library

Ro jeiū im jatū Jitōn bōro:

Jej kōkapilōklōk Armej ro Rekwojarjar ilo Raan-ko Āliktata n̄an lukkuun kōjparok kien ko an Irooj kar litok ilo 68th in jekjen in Doctrine and Covenants:

Eļan̄n̄e ro jineer im jemāer elōn̄ nejier ajri ilo Zaion, jerawiwi enaaj itok ioon bōran jineer im jemāer n̄e rej jab katakin ajri ro nejier bwe ren meļeļe katak in ukweļo̧k, tōmak ilo Kraist Nejin Anij emour, im kōn peptaij im menin letok eo an Jetōb Kwojarjar jān likūt pā ko ioon bōrāer n̄e rej ralitōk iiō rūtto.

Im jineer im jemāer renaaj barāinwōt katakin ajri ro nejier n̄an jar, im etetal jim̧we im̧aan Irooj [lale D&C 68:25–28].

Ajri ro ilo Zaion rej aikuj barāinwōt lukkuun kōjparok kien ko an Irooj, ko kar liļo̧k n̄an Israel etto im kar bar ba n̄an Armej ro Rekwojarjar ilo Raan-ko Āliktata:

“Kwōn kautiej jem̧ōm̧ im jinōm̧, bwe raan ko am̧ ren aetok ioon āneo Irooj am̧ Anij ej lewōj n̄an eok.” [Exodus 20:12].

Revelesōn kein rej jerbal kōn kajoor eļap n̄an Armej ro Rekwojarjar ilo Raan-ko Āliktata, im ej menin aikuj n̄an m̧am̧a im baba ro ilo Kabun̄ in bwe kien kein ren katakin im mour kaki ilo m̧ōko.

N̄an jibadbad in jej rōjan̄ im libjerjer bwe “nokon in jota” en kōm̧m̧an ipeļaakin Kabun̄ in, ilo iien eo ro jemāer im jineer maron̄ kakutok ļaddik im leddik eo nejier n̄an ippāer ilo m̧weo im katakin er naan in Irooj. Rej aikuj ekkatak eļapļo̧k kōn aikuj ko im men ko remenin aikuj an baam̧le ko aer, ilo ejja iien in wōt, jeļā kaki im ajri ro nejier eļapļo̧k kōn pedped in katak ko an gospel eo an Jisōs Kraist. Nokon in jota in ej aikuj in kōm̧m̧an kōn jar, al al ko, al ko, kein kōjan̄jan̄ al, jeje ko rekwojarjar, unin kōnono ko an baam̧le, im kōmeļeļe eo kōn pedped in katak ko an gospel eo im kōn jorrāān ko rejelet mour, barāinwōt eddo ko im jerbal ko an ajri ro n̄an ro jineer im jemāer, m̧weo, Kabun̄ eo, jukjukinpād eo, im laļ eo. N̄an ajri ro reddikļo̧k, ālij katak ko, al ko, bwebwenato ko, im ikkure ko maron̄ kwaļo̧k kadkadier. Kappijje ko remera ko remaron̄ kar kōpooji ilo m̧weo maron̄ ajije n̄an m̧ōn̄ā.

Karōkan im an pen aikuj jab ļoore, im aolepān baam̧le eo ej aikuj bōk koņaan ilo ekkatak ko.

Kuktok kein renaaj letok iien ko rem̧m̧an kōn iiaio ko rem̧m̧an ikōtaan ro jinen im jemān im ajri ro, ikōtaan jem̧jān jemjati ro, barāinwōt leļo̧k iien em̧m̧an kōn naan in kakkōl, kapilōk, im rōjan̄ jān ro jinen im jemān n̄an ļaddik ro nejier im leddik ro nejier. Renaaj letok iien em̧m̧an n̄an ļaddik im leddik ro n̄an kautiej jineer im jemāer im n̄an kwaļo̧k aer kam̧oolol kōn kōjeram̧m̧an ko ilo m̧weo bwe kalim̧m̧ur eo an Irooj n̄an er en maron̄ kūrm̧ool im mour ko aer ren aetokļo̧k im kam̧ōņōņō. …

Kōm̧ij … rōjan̄ jodikdik ro n̄an pād wōt ilo m̧weo joten eo im kōjerbal kajoor ko aer ilo kōm̧m̧an bwe en iien ekkatak, wōr tokjān, im kalimomo.

Eļan̄n̄e Armej ro Rekwojarjar rej pokake kapilōk in, jej bōk kalim̧m̧ur bwe kōjeram̧m̧an ko reļļap renaaj waļo̧k. Iakwe ilo m̧weo im pokake ro jinem̧ im jemōm̧ enaaj ļapļo̧k. Tōmak enaaj ejaak ilo būruwōn jodikdik in Israel, im renaaj bōk kajoor n̄an tariņaeik kareel ko renana im kapo ko rej kōmetak er.

Em̧m̧aan ro jeim̧i im jatūm̧i rejjitōn bōro

Joseph F. Smith

Anthon H. Lund

Charles W. Penrose

Būreejtōnji eo Kein Kajuon