Jej Aikuj Etal n̄an Tampeļ eo Kiiō!
Mary Holmes Ewen, California, USA
Kōmeļeļe ko jān Bradley H. Clark
Juon jibbon̄ in Jabōt, juon membōr ekāāl ej kab peptaij kar kwaļo̧k kadkad in n̄an ward eo. Etan liin kar Lydia. Ekar wiini būruwōm̧ juon iien.
Lydia ekar rūtto im pilo jān iiō ko an kar bōk nan̄inmej in tōn̄al. Liin ekar m̧ōkaj an jeļā kajjeen membōr in ward eo jān ainikier im bun̄tōn neer. Emaron̄ ba etam im idik peiūm̧, im kōm̧ij jan̄in kar ron̄ kōn m̧ool in bwe ekar pilo.
Ālkin iiō in an aikuj kōttar, Lydia eaar ioon bisop eo im stake būreejtōn eo n̄an bōk peba in mālim an tampeļ eo an. Ilo Doulul eo an Kōrā ilo juon Jabōt, eaar kajijetļaļļo̧k ña n̄an iturin im ba, “Stake būreejtōn eo eaar jiron̄ eō bwe ij aikuj etal n̄an tampeļ eo iien eo emōkajtata. Komaron̄ ke bōk eō?”
Ekar ilo wiik eo jinoin Tijem̧ba—iien boub ekar n̄an kōm̧ aolep. Ikar kajjieon̄ kōm̧m̧an jekpen ņae ko im ba, “Jemaron̄ ke kōttar m̧ae Jānwōde?”
“Jaab, jej aikuj etal kiiō!”
Juon kurub in kōrā ro jān ward eo rekar etal n̄an tampeļ eo aolep allōn̄, kōn menin iaar kepaak er n̄an kōm̧m̧an tūreep in ippān Lydia. Raar barāinwōt lukkuun boub. Ak Lydia, kōn kōm̧jaļaaļ iturin mejān, kar ba tok n̄an kōm̧ bwe stake būreejtōn eo eaar jiron̄ e n̄an etal iien eo emōkajtata.
Im bwe kōm̧ aolep kar errā ippān doon n̄an kōm̧m̧ane 150 m̧aeļ (241 km) tūreep eo wiik eo juon. Ilo iaļ eo am, kōm̧ kar kobrak van eo kōn ribwebwenato im jōmdoon an kōrā ro ralitōk. Lydia ekar lan̄lōn̄ kōn en̄jake in tampeļ eo an im kōjeram̧m̧an eo jān an kar bōk menin letok kwojarjar eo.
Wiik eo kein kajuon ilo Jānwōde, ājmour eo an Lydia ekar nana im ekar deļo̧n̄ ilo aujipitōl n̄an kōm̧adm̧ōd ko reidin̄. Juon wiik tokālik ekar jako. Ak Lydia ekar etal ippān kōjeram̧m̧an ko an indeeo eaar būki ilo tampeļ eo jejjo wiik m̧oktaļo̧k.
Tokālik iaar kōnono kake n̄an stake būreejtōn eo bwebwenato in tūreep eo am im kar jiron̄ e ekōjkan aō kar m̧weiur ke ikar im̧we n̄an jiron̄ļo̧k Lydia ke e ej aikuj etal n̄an tampeļ eo iien eo emōkajtata.
“Ejjab lukkuun meļeļe eo aō ke e ej aikuj kar etal kiiō,” eaar uwaak. “Aolep iien ij jiron̄ rikabwijer ro an peba in mālim an tampeļ eo n̄an etal n̄an tampeļ eo iien eo emōkajtata. Jetōb eo eaar kōnono n̄an Lydia, ejjab n̄a!”
Lydia eaar katakin kōm̧ aolep n̄an ron̄jake Jetōb eo im m̧akūtkūt ekkar n̄ane iien eo emōkajtata. Ij kam̧oolol kōn rikakeememej eo an n̄an ron̄jake ainikien eo edik.