Mōjņo̧ Ejjab Juon Jerawiwi

Ekkā ad ļōmņak bwe jerawiwi im m̧ōjņo̧ relukkuun oktak jekjekier jān doon ippān jetōb eo ilo kōj, eoktak bōd ko aer jān doon. Bōtaab jeje ko rekwojarjar rej kwaļo̧k ke jerawiwi im m̧ōjņo̧ relukkuun in oktak, oktak wāween likūt ippān doon, im wōr an maron̄ n̄an kōm̧m̧an tōprak ko jān doon.

Kōj kajjojo jejeļā kōn jerawiwi ijjelo̧kin ad kōm̧m̧ane, ak jen etale: Jerawiwi ej kālet n̄an jab pokake kien ko an Anij ak jum̧ae meram in Kraist eo ilo kōj. Jerawiwi ej juon kālet n̄an leke Setan ijjelo̧kin Anij, Ejjab āinwōt kōj, Jisōs Kraist ekar lukkun ejeļo̧k an jerawiwi im maron̄ im kar pinmuur kōn jerawiwi ko ad. Eļan̄n̄e jej lukkuun m̧ool in ukwelok—ekoba ukōt ļōmņak ko ad, būruwōd, im m̧wil ko ad; leļo̧k joļo̧k bōd ko rekkar ak kwaļo̧k m̧ool; kōm̧m̧an oktak ijo ekkar; im jab bar kōm̧m̧ane jerawiwi eo tokālik—emaron̄ bōk Pinmur eo an Jisōs Kraist, bōk jeorļo̧k in bōd jān Anij, im bar erreo.

Erom erreeo eaorōk kōnke ejjeļo̧k men ettoon emaron̄ deļo̧n̄ ilo aelōn̄ in Anij. Bōtaab eļan̄n̄e kōttōbar eo am̧ ekar n̄an bwe kwōn wānōk āinwōt ad kar itok jān im̧aan mejān Anij, enaaj kar em̧m̧an ļo̧k n̄e jen kar kiki aenōm̧m̧an ilo aolepān mour kein ad. Ijjelo̧kin, jekar itok n̄an laļ in n̄an ekkatak ilo ad make en̄jake n̄an jeļā kōtaan em̧m̧an kab nana, eddōkļo̧k ilo meletlet im kapeel, mour kōn aorōk ko jej kaorōki, im pukōt m̧wil ko āinwōt an Anij—tōprak ko jejjab maron̄ bōki jen aenōm̧m̧an in ad babu bajjōk.

M̧ōjņo̧ eo an armej ej boktok juon m̧ōttan eo eaorōk ilo kōttōbar kein raōrok ilo mour in. Ke Moronai ekar inepata kōn m̧ōjņo̧ eo an ilo jeje enaaj kōm̧m̧an bwe riaelōn̄ ko ren kajirere kōn men ko rekwojarjar, Irooj ekar kapen n̄an e kōn naan kein:

“Eļan̄n̄e armej rej itok n̄an Eō Inaaj kwaļo̧k n̄an er aer m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧aō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er” (Ether 12:27; bar lale 1 Korint 15:42–44; 2 Korint 12:7–10; 2 Nipai 3:21; im Jekab 4:7).

Waļo̧k in an eoon kein ralikkar relukkuun emm̧an im rej karuwaineneik kōj n̄an jeļā kōtaan jerawiwi (rōjan̄ jān Satan) jen m̧ōjņo̧ (kōmeļeļeik ijin āinwōt jōkjōk eo “letok” n̄an kōj jān Anij).

Jemaron̄ in kōmļeļeik m̧ōjņo̧ āinwōt jemļo̧kin māletlet, kajoor, im kwojarjar eo ej itok ippān armej. Ilo ad bōk ānbwin jej lotak ilo jab maron̄ jipan̄ kōj make im jekarļo̧k iaad make, kōn elōn̄ m̧ōjņo̧ ko ilo ānbwin im kōņaan ko ad. Jej rūttoļo̧k im jepooļ kōn bar jet ānbwin ko rōm̧ōjņo̧, im katak ko aer, waanjon̄ak, im wāween aer kōm̧m̧an n̄an kōj rejjab jim̧we im jet iien rōboktok jorrāān. Ilo m̧ōjņo̧ ko ad, jōkjōk in anbwin in jej en̄taan ilo ānbwin im en̄jake n̄aninmej, kwōle, im jorrāān. Jej idajon̄jon̄e en̄jake ko an kanniōk āinwōt illu, būrom̧ōj, im mijak. Jej likjab ilo māletlet, kapeel, kijejeto, im kajoor. Im jej maron̄ in bōk kapo an elōn̄ kain.

Jekdoon n̄e ekar ejjeļo̧k an jerawiwi, Jisōs Kraist ej kobatok ippād ilo jōkjōk in m̧ōjņo eo an ilo ānbwin (lale 2 Korint 13:4). Ekar ļotak āinwōt juon nin̄nin̄ eo ejeļo̧k an maron̄ ilo mour in ānbwin im rūttoļo̧k jān ro rej bōk eddoin im rejjab wānōk. Ekar aikuj in ekkatak wāween etetal, kōnono, jerbal, im iaieo ippān ro jet. Ekar kwōle im mōk, idajon̄jon̄e en̄jake ko an kanniōk, im maron̄ kar nan̄inmej, en̄taan, bōtōktōk, im mej. Ekar “ilo jabdewōt wāween āinwōt kōj, jekdoon n̄e ekar jab jerawiwi,” leļo̧k E make n̄an mour in kanniōk in bwe en maron̄ “en̄jake en̄jake in en̄taan kein ad” im maron̄ in jipan̄ kōj ilo en̄taan im m̧ōjņo̧ kein ad (Hibru 4:15; bar lale Alma 7:11–12).

Jejjab maron̄ kajju ukweļo̧k jān m̧ōjņo̧ kein ad—ak m̧ōjņo̧ eban make jeorļo̧k ad ettoon. Jejjab maron̄ eddōkļo̧k ilo mour in jetōb ijelo̧kin n̄e jej karmejjet jerawiwi, bar āinwōt jejjab eddōkļo̧k ilo mour in jetōb ijello̧kin n̄e jej kile jo̧kjōk in m̧ōjņo̧ eo ad ilo mour in kanniōk, kōm̧m̧an n̄an men in kōn ettā bōro im tōmak, im ekkatak jen m̧ōjņo̧ ko ad n̄an lōke Anij. Ke Moronai ekar leļn̄o̧n̄ kōn m̧ōjņo̧ eo an ilo jeje, Anij ekar ba bwe en ukweļo̧k. Ijjelo̧kin, Irooj ekar katakin e n̄an ettā bōro im tōmak ilo Kraist. Ilo ad jouj im tōmak, Anij ej letok an jouj—ejjab jeorļo̧k bōd—āinwōt kadkadin in m̧ōjņo̧. Bible Dictionary ej kōmleleik iakwe āinwōt kajoor eo jān Anij im ej kōm̧m̧an bwe jen kōm̧m̧ani men ko n̄an kōj make (lale Bible Dictionary, “Grace”)—kajoor eo an Anij ekar eo im emaron̄ kōm̧m̧an m̧ōjņo̧ ko ren erom kajoor.”

Jān en̄jake ko ad m̧oktaļo̧k ilo kabun̄ in, kar katakin kōj m̧ōttan ko raorōk an ukweļo̧k, ak ewi wāween ad kiiō lukkuun kōjerbal ettā bōro im tōmak? Ļōmņak kōn men kein:

• Kejōkļo̧kjeņ im jar. Kōnke jem̧ōjņo̧, jemaron̄ jab kile eļan̄n̄e jej jelm̧ae jerawiwi (kūr n̄an juōn oktak in kōlmenļo̧kijeņ eo em̧ōkaj, im m̧wil) ak kōn m̧ōjņo̧ (kūr n̄an ettā bōro, jerbal in rejtak, ekkatak, im eddōkļo̧k). Wāween ad kalimjōk men kein maron̄ in pedped ioon ad rūttoļo̧k im eddōkļo̧k. Emaron̄ lōn̄ jerawiwi im m̧ōjņo̧ jim̧or ilo m̧wil. Maron̄ ba jerawiwi ej lukkuun tōl ļo̧k n̄an bōd ijjeļo̧kin ukweļo̧k. Maron̄ ba m̧ōjņo̧ ej juon jerawiwi eo emaron̄ boktok jook, ņa ruōn, jorrāān, im bōjrak jān kallim̧ur ko an Anij. Kejōkļo̧kijeņ im jar rej jipan̄ kōj kōm̧m̧ani oktak kein.

• Karōk ta eo eaorōktata. Kōnke jej m̧ōjņo̧, jejjab maron̄ kōm̧m̧ane aolep oktak ko rej menin aikuj ilo juon wōt iien. Ilo ad ettā bōro im tōmak ilo ad jerbale m̧ōjņo̧ kein ad ilo mour in kanniōk jet men ko jej aikuj in jeļā kaki ilo iien in, jemaron̄ in kadikļo̧k ad jab kea, kōm̧m̧an jōkjōk ko rem̧m̧an ilo iminene, kōļapļo̧k ejmour eo ad ilo ānbwin im kōlmenļo̧kijeņ im kijejeto, im kōkajoorļo̧k lōke eo ad ilo Irooj. Anij emaron̄ jipan̄ kōj jeļā ia eo jej jino jen e.

• Karōk. Kōnke jem̧ōjņo̧, bwe jen kajoorļo̧k enaaj aikuj eļapļo̧k jen juon ikdeleel em̧m̧an im elōn̄ kauwe ko n̄an kōj make. Jej aikuj in bar pepe, ekkatak jān bōd, kōm̧m̧ani jet jōkjōk ko renaaj jipan̄, kōm̧m̧an oktak ilo karōk ko ad, im bar kajjeon̄. Jej aikuj jipan̄ jān jeje ko rekwojarjar, bok ko rem̧m̧an, im armej ro jet. Jekar aolep jino kōn jidik wōt, lan̄lōn̄ ilo eddōkļo̧k, im bōk kauwatata (jekdoon n̄e rej kōm̧m̧an bwe jen leln̄o̧n̄ im m̧ōjņo̧). Jej aikuj jipan̄ ko n̄an jipan̄ kōj kōm̧m̧an kālet ko rem̧m̧an jekdoon n̄e jem̧ōk ak jab kōņaan im pepe n̄an rool n̄an m̧okta jen ad kar wōtlo̧k.

• Kōjerbal kijenmej. Kōnke jem̧ōjņo̧, oktak ko emaron̄ bōk iien. Jeban kōjeno̧ļo̧k ad m̧ōjņo̧ ilo wāween ad kōjeno̧ļo̧k jerawiwi. Rijilōk ro retankwadik rekōņaan kōm̧m̧ane ta eo ekkar, ekkatak, kajieon̄, im jab ebbweer. Ettā ej jipan̄ kōj bwe jen kijenmej ippād make im ippān ro jet im rebar m̧ōjņo̧. Kijenmej ej kadkad in tōmak ko ad ilo Irooj, kam̧m̧olol kōn kōjatdikdik eo An ilo kōj, im lōke ilo kallim̧ur ko An.

Jekdoon n̄e jej m̧ool ilo ad ukweļo̧k jān jerawiwi ko ad, bōk jeo̧rļo̧k in bōd, im erom erreo bar juon alen, jej m̧ōjņo̧ wōt. Jej maron̄ wōt nan̄inmej, aer ilo ad en̄jake, jab kea, jorrāān, metak, im kapo. Ak likjab ko im pere kōj make rejjab jerawiwi im jab maron̄ kabōjrak kōj jān ad erreo im wānōk n̄an Jetōb eo.

Pija

composite of young man in sillouette and landscape

Pija jen iStock/Thinkstock

Ilo an Setan lukkuun in kōņaan kōjerbal m̧ōjņo̧ kein ad n̄an aujiidi kōj n̄an jerawiwi, Anij emaron̄ kōjerbal m̧ōjņo̧ ko an armej n̄an katakin, kōkajoorļo̧k, im kōjeram̧m̧an kōj. Oktak jān ta ko jemaron̄ kōtmene n̄an kōjatdikdik, mekarta, Anij ejjab aolep iien “kōm̧m̧an bwe m̧ōjņo̧ ko ren erom kajoor” n̄an kōj ilo an joļo̧k m̧ōjņo̧ ko ad. Ke Rijilōk Paul ekar āliji im men an jar n̄an Anij n̄an bōk kāliklik eo an ilo anbwinnin” eo Setan ekkā an kōjbwebweiki kake, Anij ekar ba n̄an Paul, “Aō joij e bwe n̄ōn yuk: bwe Aō kajur e wāppenļo̧k ilo m̧ōjņo” (2 Korint 12:7, 9).

Elōn̄ wāween ko Irooj ej kōm̧m̧an “menin m̧ōjņo̧ ko bwe ren erom kajoor.” Ilo an maron̄ joļo̧k m̧ōjņo̧ jen kōmour jen lokjak ko jej kōjatdikdik kaki, ilo mour e aō make men in ejeja. N̄an waanjon̄ak, ijjab ello kam̧ool ke Anij ekar joļo̧k m̧ōjņo eo an Moronai ilo jeje ālkin wōt eoon eo ebun̄bun̄ ilo Ether 12. Anij emaron̄ bar kōm̧m̧an men ko rem̧ōjņo̧ n̄an kajoor ilo an jipan̄ kōj jerbal ippān m̧ōjņo̧ ko ad, bōk juon wāween jeļā kōm̧m̧an kōjak ak melele kaki, im em̧m̧anļo̧k ien otemjej. Barāinwōt, kajoor im m̧ōjņo̧ enan̄in aolep iien rej eppake doon (āinwōt kajoor eo an kijenmej im m̧ōjņo̧ eo an pen bōro), im jemaron̄ ekkatak n̄an kaorōk kajoor eo im kijejeto ilo m̧ōjņo̧ eo ej itok ippān.

Ebar wōr, juon wāween eo ekajoorļo̧k im Anij ej kōm̧m̧an menin m̧ōjņo̧ ko bwe ren erom kajoor n̄an kōj. Irooj ekar ba n̄an Moronai ilo Ether 12:37, “Im kōnke kwaar lo am̧ m̧ōjņo̧ naaj kōm̧m̧an bwe kwōn kajoor, em̧ool n̄an jijet ilo jikin eo Iaar kōpooj ilo jikin ko rem̧m̧an an Jema”.

Ijin Anij ekar jab kōm̧m̧an bwe en ukōt m̧ōjņo̧ eo an Moronai, ak n̄an ukōt Moronai. Ilo an jerbal ippān mālijjon̄ ko an m̧ōjņo̧ ko an armej, Moronai—im kōj—maron̄ ekkatak iakwe em̧ool, tūriam̧o, ļōjokmen, kijenemj, peran, kijejeto, māletlet, kajoor, jeorļo̧k bōd, rooltok jen jorrāān, kam̧m̧olol, kapeel ko am̧, im ebar lōn̄ kain em̧m̧an ko im rej kōm̧m̧an bwe jen āinwōt Jemedwōj Ilan̄. Men ko rem̧m̧an kein jekar itok n̄an laļ in im bōki, m̧wil ko an Kraist im rej kepooj ijoko jikid ilan̄.

Ejjeļo̧k jikin iakwe eo an Anij, māletlet eo, im kajoor in lo̧mo̧o̧r eo An eļap ad kam̧ool kake jān An maron̄ kajeer apan̄ ko ad ilo m̧ōjņo̧ kein ad armej n̄an m̧wil ko rewānōk im kajoor eo im ej kōm̧m̧an bwe jen āinwōt E.