Semati Tawamudu ki na Noqu Matavuvale

Au a laki gonesusu niu se yabaki tolu, ka vakatara o tinaqu dina me vakaivolataki vakataucoko na noqu laki susugi kevaka rau vakatara o noqu itubutubu me vakayacori na noqu cakacaka vakalotu niu sa yabaki 12. E nanuma o tinaqu meu na yalomatua cake me rawa niu digidigi ga vakai au, ia sa dredre sara na wawa vakaoqo.

Io, a dredre meu raica e vuqa na noqu itokani era papitaiso ni ra sa yabaki walu, ia a dredre cake sara niu sa kila tu niu na sega ni rawa ni vauci vei rau na noqu itubutubu veisusu kei na lima na tuakaqu qase cake me yacova niu sa yabaki 12. Au sa rere de dua na ka ena yaco vei au ka na sega ni rawa meu vauci vei rau.

Ni sa roro mai na ika 12 ni noqu siganisucu, keitou sa tekivu tuvanaka na noqu papitaiso ka vauci ki na noqu matavuvale. Rau sa laiva vei au na noqu itubutubu meu digitaka na valetabu cava me keitou laki vauci kina. Au dau nanuma tu ga ni Valetabu e San Diego California e totoka duadua, ka sa vakadonuya sara na noqu matavuvale taucoko me keimami draiva yani ki California me keimami laki vauci.

Au sa sega tale ni wawa meu dua na matavuvale tawamudu kei rau na noqu itubutubu kei na taciqu. Ni yaco tiko na veivauci, au vakila vakalevu na kaukauwa ni Yalotabu ka dredre meu vakamacalataka rawa. Ia niu sa mai vauci oqo ki na noqu matavuvale, sa mai sosomitaki na noqu lomaleqa ena vakacegu kei na sautu, kau kila niu sa semati tawamudu oqo kei iratou.