Makapagdedenna aSangkamaysa dagitiPamilia iti Agnanayon

Ti bileg ti priesthood a mangbegkes kadagiti pamilia iti agnanayon ket maysa kadagiti kaindaklanan a sagut ti Dios. Tunggal tao a makaawat iti plano ti pannakaisalakan ket aggagar iti dayta manayon a bendision. Kadagiti laeng seremonia ti panaglantip a maan-annong kadagiti naidaton a templo ti Ti Simbaan ni Jesucristo dagiti Santo iti Ud-udina nga Aldaw nga ited ti Dios ti kari a mabalin a mabegkes a sangkamaysa dagiti pamilia iti agnanayon.

Dagiti tulbek ti priesthood a mangaramid a posible daytoy ket insublin iti daga ni propeta Elijah ken ni Joseph Smith iti Templo ti Kirtland. Dagita a tulbek ti priesthood ket naipasan iti saanen a mapugsat a linia babaen dagiti sibibiag a propeta iti Ti Simbaan ni Jesucristo dagiti Santo iti Ud-udina nga Aldaw agingga iti agdama nga aldaw.

Ti Mangisalakan iti panagserbina iti daga insaona maipapan iti bileg a mangilantip kadagiti pamilia babaen ti balikas ni Pedro, ti panguluen nga Apostolna, idi kinunana, “Pudno kunak kadakayo, Aniaman a galutanyo ditoy daga magalutanto idiay langit: ket ti aniaman a warwaranyo ditoy daga mawarwaranto idiay langit” (Mateo 18:18).

Iti laeng celestial a pagarian a makapagbiagtayo kas sangapamiliaan iti agnanayon. Sadiay a makapagbalintayo a sangapamiliaan iti sidong ti Nailangitan nga Amatayo ken ti Mangisalakan. Inladawan ni Propeta Joseph Smith ti nakaskasdaaw a padas iti kastoy a wagas iti Doktrina ken Katulagan:

“Inton agpakita ti Mangisalakan makitatayonto ti mismo a kinasiasinona. Makitatayonto nga isu ket tao a kas kadatayo.

“Ket dayta met laeng a pannakipulapol nga adda kadatayo ditoy addanto met kadatayo sadiay, makaduaanto laeng iti agnanayon a gloria, a kinadayag a saantayo ita a malak-am” (DkK 130:1–2).

Isingasing daytoy a nasantuan a kasuratan a kabaelantayo nga addaan panagtalek ti manggandat iti nailangitan a pagrukodan kadagiti pannakilangentayo iti ikub dagiti pamiliatayo. Umdas a maipategtayo dagiti miembro ti pamiliatayo, sibibiag ken natay, nga aramidentayo ti amin a kabaelantayo a maited kadakuada dagiti ordinansa ti priesthood a mangbegkesto kadatayo idiay langit.

Adu kadakayo, ubbing ken nataengan, ti mangar-aramid iti dayta. Nagsapulkayon iti nagnagan dagiti kapuonan a saan pay a nakaawat kadagiti ordinansa a makailantip kadakayo a sangkamaysa.

Dumani amin kadakayo ket addaan kadagiti sibibiag a kabagian a saan pay a napaglantip kas sangapamiliaan babaen ti bileg ti priesthood. Adu nga addaan kadagiti sibibiag a kabagian nga immawaten kadagiti ordinansa ti priesthood ngem saan nga agtungtungpal kadagiti katulagan nga inaramidda iti Dios. Bendisionannakayto ti Dios tapno kabaelanyonto a tulongan ti amin a kabagian nga addaan iti pammati. Addaankayo iti kari nga aramiden ti Apo kadagiti disipulona a mapan ken mangyeg kadagiti dadduma Kenkuana:

“Ket asino man a mangawat kadakayo, addaakto met sadiay, ta addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo” (DkK 84:88).

Manipud iti tawa ti opisinak inaldaw a makitak dagiti nobia ken nobio nga agparetrato iti yan dagiti napipintas a sabsabong ken dagiti agpuspussuak a danum wenno fountain. Masansan no kua a sakruyen ti nobio ti nobiana, iti uray sumagmamano laeng a nainnayad nga addang, idinto nga alaen ti retratista dagiti ladawanda para iti kallaysa. Tunggal kanito a makitak dayta, mapanunotko dagiti agassawa a naam-ammokon nga iti maysa a panawen—naminsan iti ababa a panawen kalpasan ti aldaw ti kallaysada—nasken nga agsinnakruyda wenno agtinnulongda iti dadduma pay a wagas idi nagbalin a narigaten ti panagbiag. Mabalin a maawan dagiti pagtrabahuan. Mabalin a mayanak dagiti ubbing nga adu dagiti pannubok. Mabalin a dumteng ti panagsakit. Ket kalpasanna, dagiti inaramidtayo kadagiti dadduma a kas kayattayo nga aramidenda met kadatayo—no nalaklaka—ket mamagbalinto kadatayo a bannuar kadagita mapannubok a panawen no nadagdagsen pay daytoy ngem iti impagaruptayo a mapasamak kadatayo.

Utangtayo kadagiti pamiliatayo ti kita ti pannakilangen nga isangbaytayo iti sidong ti Dios. Nasken nga ikarigatantayo ti saan a mangpasakit wenno masakitan. Mabalin nga ikeddengtayo ti mamakawan a dagus ken naan-anay. Mabalin nga ikarigatantayo ti mangikalikagum iti pagragsakan dagiti dadduma a ad-adda ngem iti pagragsakantayo. Mabalintayo ti agsao iti nasayaat. No ikarigatantayo nga aramiden amin dagitoy a banag, maawistayto ti Espiritu Santo kadagiti pamiliatayo ken iti biagtayo.

Ipanamnamak kadakayo, a babaen ti tulong ti Apo ken addaan iti agbabbabawi a puso, makitatayo iti daytoy a biag ti kita ti biag a kayattayo a maaddaan iti agnanayon. Ay-ayatennatayo ti Nailangitan nga Ama. Kayatna nga agsublitayo Kenkuana. Ti Mangisalakan, babaen ti bileg ti Pannubbotna, aramidenna a posible ti panagbalbaliw iti puspusotayo a kasapulantayo tapno makastrektayo kadagiti nasantuan a templo, maaramidtayo dagiti katulagan a matungpaltayo kalpasanna, ket iti kamaudiananna makapagbiagtayo kas sangapamiliaan iti agnanayon iti celestial a gloria—iti pagtaengan manen.