Dili Ko Mangopya
Joanna Mae Rangga, Southern Leyte, Philippines
Isip freshman sa kolehiyo, pirme kong mahigawad sa akong mga kauban sa klase. Tungod kana kay kadaghanan nila mangopya panahon sa mga eksam. Ang uban mopayuhot sa ilang mga notes ngadto sa klase. Ang uban mo-text sa mga tubag sa pasulit ngadto sa uban. Gani ang uban mangopya sa eksam sa ilang mga kauban sa klase.
Kadtong nangopya sa kanunay mas taas og score kay kanako. Bisan pa niana, wala ko matintal sa pag-apil nila. Gibutang nako pirme sa akong hunahuna nga mas maayo pa nga dunay matinuoron nga 0 porsyento kay sa kinawat nga 100 porsyento.
Kon mangopya ko, dili ko makapakita og ehemplo alang nila. Dili ko makapuyo sa paagi nga ako mahimong mopakigbahin sa ebanghelyo ni Jesukristo ngadto nila. Dili nako mapakita ngadto nila nga ang Simbahan tinuod.
Usa ka hapon miadto ko sa opisina sa cashier sa kolehiyo aron mangutana sa balanse sa akong tuition. Kinahanglan nakong bayran ang tanang balayranan sa dili pa ako makakuha sa final exams sa mosunod nga semana. Samtang naglakaw ko, nabalaka ko kon asa ko mokuha og kwarta nga akong gikinahanglan. Alang sa estudyante nga nagsuporta sa kaugalingon sama nako, ang kwarta lisud kaayo.
Sa dihang miabut ko sa opisina, nangutana ko sa cashier pilay akong bayrunon.
“Wala ka nay bayran hangtud ka mogradwar,” miingon siya.
Nakugang, nangutana ko niya kon sigurado ba siya o nangomedya lang.
“Oo, sigurado ko, ug seryoso ko” miingon siya. “Ang guidance counselor miproseso og application alang nimo aron makakuha ka og scholarship gikan sa usa ka senador. Eskolar ka na karon.”
Ang pagkadungog niadtong mga pulong nakapalipay nako pag-ayo. Nagpasalamat ko niya ug midagan ngadto sa opisina sa guidance counselor aron pasalamatan ang tawo nga responsable.
“Dili ka kinahanglan mopasalamat nako,” miingon ang counselor human ako makasulti niya nga mapasalamaton ug malipayon kaayo ko. “Instrumento lamang ko.”
Sa akong pagbiya, nahinumdom ko sa kasulatan nga ganahan kaayo nako nga ipakigbahin: “Ug bulahan siya nga makaplagan nga matinud-anon ngadto sa akong ngalan sa katapusan nga adlaw, kay siya pagahimayaon aron mopuyo sa gingharian nga giandam alang kaniya gikan sa katukuran sa kalibutan. Ug tan-awa kini mao Ako [Jesukristo] nga namulong niini.” (Ether 4:19).
Pinaagi sa pagbuhat sa matarung, akong napakita ang akong pagkamatinud-anon sa pagsunod sa mga sugo sa atong Langitnong Amahan—bisan sa usa ka sitwasyon diin komon ang pagkadili matinuoron. Ako nasayud nga pinaagi sa pagbarug nga lig-on diha sa akong pagtuo, Siya dili mobiya kanako.
Malipayon ko nga ako karon makaeskwela nga dili na mabalaka sa balayrunon. Nadasig usab ako sa pagpadayon sa pagbuhat unsay matarung, dili tungod sa mga ganti ug mga panalangin nga akong madawat apan tungod kay ako nahigugma sa Langitnong Amahan ug sa Iyang Anak, nga si Jesukristo, kinsa nagpakita og ehemplo alang nako.