Ang Boda sa Kasal sa Akong Mama

Imahe

Wedding dress in a storage box.

Usa pa ako ka batang babaye sa dihang una nakong nakita ang boda sa kasal sa akong mama. Giayo kini sa pagpilo sulod sa kahon, ug nakahinumdom ko nga hinay nga giablihan sa akong mama aron makita nako kini. Pagkanindot niini! Gusto kaayo nako nga isul-ob kana nga sinina kon moabut na ang adlaw sa akong kaminyoon.

Hinay kining giuli pagbalik sa akong mama og misaad nga ipahulam kini nako sa umaabut. Miingon siya nga ang sinina usa ka espesyal nga regalo gikan sa akong amahan. Nahigugma kaayo siya nga tan-awon ug matahum sa mga litrato sa iyang kasal. Ang akong mga ginikanan, dili mga miyembro sa Simbahan, talagsaong mga tawo.

Nahibalo ko sa Simbahan sa dihang akong gikahimamat ang tawo nga mahimo nakong bana. Kana nga panagkita dili kasagaran tungod kay, bisan og siya dili aktibo sa Simbahan, ang among panagkita misangpot sa istorya sa Unang Panan-awon. Akong nakita nga ang istorya talagsaon, apan dili pa ko andam sa pagdawat niini.

Human sa among pag-date sulod sa 16 ka bulan, ang akong mga damgo natinuod sa dihang akong gisul-ob ang boda sa kasal sa akong mama nga dunay taas nga ikog ug naglakaw sa pasilyo padulong sa akong pamanhunon. Ako usab nahigugma pag-ayo. Daghang mga tawo miingon nga susama ako sa akong inahan sa dihang siya naminyo.

Milabay ang katuigan, ug kami nakaanak og duha. Sa dihang ang akong bana misulay sa pagbalik sa simbahan, akong gipugngan ang iyang mga paningkamot. Bisan og ako dili aktibo sa simbahan sa akong kabatan-on, maglisud ko pagdawat og laing simbahan.

Kana sa katapusan nausab human sa 19 ka tuig nga pagkaminyo. Ang akong bana mibalik sa simbahan, ug paglabay sa pipila ka semana nagsugod ko sa pagtambong uban kaniya. Daling milambo ang akong pagpamatuod, ug ako nabunyagan ug nakumpirmahan. Sa wala madugay ang akong dakong tinguha mao ang pag-andam sa akong kaugalingon nga mabugkos ngadto sa akong bana diha sa templo.

Sa dihang miabut ang malipayong adlaw sa among pagkabugkos, gisul-ob na usab nako ang puti nga boda sa kasal sa akong mama. Usa ka higala sa simbahan ang mipasibo niini aron angay kining isul-ob sa templo. Gisul-ob kini nako didto sukad niana.

Sa dihang miabut ang panahon nga namatay ang akong amahan ug ang akong inahan anaa na sa iyang katapusang mga adlaw, dili gihapon siya andam nga modawat sa gipahiuli nga Simbahan. Apan gisultihan nako siya og daghang talagsaong mga butang mahitungod sa Pagpahiuli. Giingnan usab nako siya nga kon moagi na siya sa tabil, makadungog siya sa mensahe sa tinuod nga ebanghelyo. Gisaaran nako siya nga human sa usa ka tuig, akong isul-ob ang among sinina alang kaniya aron siya makadawat sa mga ordinansa sa templo ug mabugkos ngadto sa akong amahan. Ug akong nabuhat.

Ang akong sinina daan na karon, ug nasayud ko nga moabut ang adlaw nga dili na kini magamit. Hangtud moabut kanang adlawa, magpadayon ko sa pagsul-ob niini uban sa gugma—alang sa akong bana, alang sa akong inahan ug amahan, alang sa mga sakop sa pamilya nga akong naserbisyuhan diha sa templo, alang sa tinuod nga ebanghelyo, alang sa akong sagrado nga mga pakigsaad, ug alang sa akong Langitnong Amahan ug sa Iyang Anak, nga si Jesukristo.