Pasidungog sa Lubong ni Elder L. Tom Perry
Hunyo 5, 2015, Salt Lake Tabernacle
“[Ang akong igsoong babaye] Linda Gay ug ako … gusto nga mopahayag sa among personal nga pasalamat ngadto ni Sister Barbara Perry sa pagka-matinud-anon nga kauban sa among amahan sobra sa 39 ka tuig ug ilabi na alang sa pag-atiman nga iyang gihatag kaniya sa miaging tuig. … Nakahibalo mi sa nawala nimo, Barbara—mas dako pa ang nawala tungod kay ang imong debosyon sa imong bana hingpit kaayo. …
“Matag adlaw sa kinabuhi [ni Elder Perry] mahimayaon ngadto kaniya. Nagpuyo siya nga puno sa kalagsik ug paningkamot. Hingpit niyang gihatag ang iyang kaugalingon sa tanan nga iyang gibuhat nga gani makalimot na siya hangtud nga ulahi na kaayo nga kinahanglan diay siyang maghinayhinay. … Nagpuyo siya sa iyang kinabuhi sa hingpit—usa ka kinabuhi sa debosyon ngadto sa Dios, pamilya, ug nasud.”
Lee T. Perry, anak nga lalaki
“Ang kinaiya ni Elder Perry nga gusto siya kanunay nga makakita sa mga butang nga naglambo. Ingon og gamay ra ang iyang pasensya kon dili mabungahon ang panahon. Kanunay siyang mitudlo, mi-awhag ug midasig sa tanang mga General Authority nga makahimo kita og mas daghan pa, makahimo kita og mas maayo pa, ug kita makalihok og mas dali pa sa pagpanalangin sa kinabuhi sa matag miyembro sa Simbahan. …
“Si Elder Perry nga mi-atubang og personal nga mga hagit, apan tungod sa iyang dili matarug nga pagkamalaumon ug sa iyang hugot nga pagtuo sa mahangturong plano sa Dios kanunay siyang mopahayag, ‘wala gyud koy dili maayo nga adlaw sa akong kinabuhi.’ …
“Tulo ka adlaw sa wala pa ang iyang pagkamatay, si Elder Dallin H. Oaks ug ako mitawag ni Elder ug Sister Perry. … Sa kanunay, si Elder Perry misulti sa iyang gugma alang sa mga miyembro sa Simbahan ug sa iyang dako nga kabalaka ug pagpakabana alang sa ilang espirituhanong kaayohan. Miingon siya, ‘si Jesus mao ang Kristo, ang Manluluwas sa kalibutan. Ang tanan nag-agad sa Kaniya. Mas maayong makakita kita og paagi sa pagpaduol ngadto Kaniya, ug kon kamo dili, walay daghang paglaum. Mao kana ang atong gikinahanglan. Kita makatukod diha sa mga stake sa Zion og usa ka tinuod nga lig-on nga gugma alang sa ebanghelyo.’”
Elder M. Russell Ballard sa Korum sa Napulog Duha ka mga Apostoles
“Si L. Tom Perry magulang nga igsoon ngadto sa tanan niyang mga junior sa Korum sa Napulog Duha. …
“Si Elder Perry mihimo og dakong impresyon sa tanan nga iyang nahimamat. Sama sa gisulti sa usa ka higala nga Katoliko, ‘Ang iyang kamaayo makita kaayo. Siya nakapadani kanimo pinaagi lamang sa iyang pagkatalagsaon nga tawo.’
“Laing nasyunal nga inila nga lider nga dili LDS misulat, si ‘Elder Perry usa ka inspirasyon kanako. Upat ka tuig ang milabay mibisita siya sa akong opisina sa New York. Natandog ko sa talagsaon nga kalagsik niini nga tawo. Mahigalaon, prangka ug direkta—direkta kaayo. Nadasig ko. Sigurado ko nga si Elder Perry nakaapekto sa liboan ka mga tawo sa iyang kinabuhi.’”
Si Elder Dallin H. Oaks sa Korum sa Napulog Duha ka mga Apostoles
“Si [Elder Perry] andam nga mobuhat sa bisan nga buluhaton ug kinsa kaming tanan adunay kompleto nga pagsalig. Napanalanginan og malungtarong hugot nga pagtuo, usa ka positibo nga kinaiya, ug kamanggiloy-on, si Tom mihulagway sa pamahayag ni apostol Pablo, ‘Pagkinabuhi ingon nga panig-ingnan sa mga tumutuo, sa sinultihan, ug sa paggawi, sa gugma, sa pagtoo, sa kaputli’ (1 Timoteo 4:12). …
“Si Tom Perry uban sa makahuluganong hunahuna sa usa ka kasingkasing nga puno sa pagtuo ang iyang mga pulong talagsaon. Iyang estilo tataw nga iyang kaugalingon. Siya gitugahan og buhong ug maanindot nga tingog diin siya misangyaw sa pulong sa Dios sa panimalay ug sa laing dapit sa tanan nga mga adlaw sa iyang kinabuhi. Ang tanan nga nakadungog sa iyang tingog, ug kadtong mobasa sa iyang mga pulong, makahibalo nga dunay walay kahadlok nga tigpanalipod ug tigpamatuod sa kamatuoran. …
“Uban sa iyang hugot nga pagtuo, pasalig, ug kusog, si Tom Perry mao ang labing mabination, masinabtanon, ug matinahuron nga tawo nga akong nakaila sukad. …
“Ako mopahayag ngnaha kaninyo, akong mga kaigsoonan, nga walay guba sa taming ni L. Tom Perry, walay pagpanglimbong sa iyang kalag, walay sayop sa iyang kinaiya. Gihigugma niya ang Dios sa iyang tibuok kasingkasing ug kalag ug miserbisyo Kaniya uban sa iyang tanang kusog hangtud sa katapusan sa iyang mortal nga kinabuhi. …
“Natawo sa Logan, Utah, si Tom misunod sa tawag sa iyang nasud sa dihang nagserbisyo siya isip usa ka marine atol sa Ikaduhang Gubat sa Kalibutan. Siya adunay usa ka labing inila nga trabaho sa negosyo, ug miserbisyo nga makahimo sa matag katungdanan diha sa Simbahan diin siya gitawag. …
“Ang iyang pagserbisyo sa buhat sa Ginoo sulundon ug walay sipyat. …
“Ang iyang gamhanang espiritu mipauli na ngadto niana nga Dios kinsa mihatag kaniya sa kinabuhi. Ang iyang rekord nailhan sa langit ug didto moani sa bahandi nga natigum sa maayong mga binuhatan ug matinud-anong pagserbisyo. …
“Bisan asa ko moadto niining matahum nga kalibutan, usa ka bahin niining gihandum nga higala sa kanunay magauban kanako.”
Presidente Thomas S. Monson
Ibabaw: Ang pamilyang Perry nagsunod sa lungon ngadto sa Tabernacle, giabi-abi sa mga miyembro sa Korum sa Napulog Duha ka mga Apostoles ug Seventy. Ang asawa ni Elder Perry, si Barbara, milamano sa kamot ni Elder Russell M. Nelson. Ubos, layo sa wala: ang anak nga babaye ni Elder Perry nga si Linda Nelson mibutang og usa ka rosas sa lungon samantang nagtan-aw ang iyang igsoon lalaki. Wala: Sa pag-ila sa serbisyo ni Elder Perry sa US Marines, Amerikanhong bandila gihatag ngadto ni Sister Perry.