Sa Paghandum
Elder L. Tom Perry: Usa ka Tigtukod sa Gingharian
“Ako nasayud nga ang bugtong nga mahangturong kalipay nga sukad atong makita sa panahon sa atong mortal nga kasinatian moabut pinaagi sa pagsunod sa Manluluwas, sa pagsunod sa Iyang mga balaod, ug pagsunod sa Iyang mga sugo. Siya buhi. Kini mao ang akong saksi nganha kaninyo.”1
Ang siyudad hingpit nga nalaglag. Si L. Tom Perry usa sa unang mga marine nga midunggo sa Japan human magpinirmahay sa kasabutan sa kalinaw sa katapusan sa Ikaduhang Gubat sa Kalibutan. Sa dihang miabut sila sa mga nangguba sa Nagasaki, siya nahinumdom, “usa kadto sa pinakamasulub-on nga mga kasinatian sa akong kinabuhi.”
Nakita ni Tom ang hingpit nga kalaglagan sa iyang atubangan, nakahukom siya nga buhaton niya ang tanan sa pagtabang. Ang mga tropa sa kasundalohan mitukod sa punoang buhatan ug nanglimpyo, nagtukod og balik, ug nagtabang sa paglubong sa mga patay. Bisan pa niana, si Tom ug pipila ka mga sundalo gustong mohimo pa og dugang.
Nangayo sila sa ilang division chaplain og pagtugot sa pagtabang sa pagtukod og balik sa simbahan nga kristyano sa maong dapit. Kadaghanan sa mga simbahan gisirhan atol sa gubat tungod sa mga restriksyon sa gobyerno. Ang pipila ka mga building nga nagbarug kinahanglan gyud nga ayuhon. Si Tom ug ang ubang mga sundalo mipasabut nga ilang trabahoon sa ilang libre nga panahon.
Gihatag ang pagtugot, ug si Tom ug ang uban mitrabaho.
“Kami dili makahibalo sa pinulongan,” siya nahinumdom. “Ang among mahimo mao ang pahago sa pag-ayo sa mga building. Among nakit-an ang mga ministro nga wala makaserbisyo panahon sa gubat ug miawhag kanila sa pagbalik ngadto sa ilang mga pulpito. Daghan kaayo kami og kasinatian niining mga tawhana samtang ilang nasinati pag-usab ang kagawasan sa paghimo sa ilang Kristohanong mga pagtuo.”
Sa dihang panahon na nga mosakay sa tren biya sa Nagasaki, si Tom ug kadtong mitrabaho sa pagtukod pag-usab sa mga simbahan gibugal-bugalan sa ubang daghang mga sundalo. Kuyog sa ubang mga sundalo ang ilang mga girlfriend ug gikataw-an ang grupo ni Tom ug nagbiay-biay kanila sa pag-usik-usik sa ilang panahon uban sa plaster, martilyo, ug mga lansang.
Dayon dunay nahitabo nga mahinumduman ni Tom sa tibuok niyang kinabuhi. Sa dihang nagkagrabe na ang pagbugal-bugal, usa ka grupo sa gibana-bana nga 200 ka mga Kristiyanos nga Hapon naglakaw sa may bungtod dili layo sa estasyunan sa tren. Naglakaw sila paingon sa estasyunan sa tren samtang nagkanta sa “Onward, Christian Soldiers.” Kining pundok sa mga Kristiyano mipresentar og mga gasa ngadto ni Tom ug sa ubang mga sundalo kinsa nagtrabaho og maayo sa pagserbisyo kanila.
Naglinya ang mga Kristiyanong Hapon sa rilis. “Samtang nagsugod sa pagdagan ang tren, mikab-ot kami ug aron makahikap sa ilang mga tudlo sa among pagbiya,” miingon siya. “Dili kami makasulti gidaog kami sa among emosyon. Apan mapasalamaton kami nga nakatabang kami og gamay sa pagtukod pag-usab sa Kristiyanismo sa usa ka nasud human sa gubat.”2
Si Elder L. Tom Perry usa ka tigtukod sa tibuok niyang kinabuhi. Usahay kana nagpasabut sa pagtukod og chapel gikan sa mga natumpag, ug sa ubang higayon kini nagpasabut nga paglig-on sa usa ka kalag o usa ka nasud nga nagkinahanglan sa iyang walay kinutuban nga paglaum, kadasig, ug espirituhanong gahum.
Bisan asa siya moadto, si Elder Perry mobiya nila nga mas nalig-on kay sa wala pa siya moabut.
Natawo sa Matarung nga Ginikanan
Si Lowell Tom Perry natawo niadtong Agosto 5, 1922, sa Logan, Utah, USA, ngadto ni Leslie Thomas ug Nora Sonne Perry. Usa siya sa unom ka mga anak sa pamilya. Ang mga ginikanan ni Tom ganahan sa ebanghelyo ug mitudlo niini sa ilang panimalay kada higayon kutob sa ilang mahimo. Kining matarung nga paagi sa pagpadako usa ka tinubdan sa kalig-on ni Elder Perry sa iyang tibuok kinabuhi.
Sa iyang unang pakigpulong sa kinatibuk-ang komperensya isip usa ka Apostol, si Elder Perry mihisgot sa iyang pagkabata: “Kami gisininaan diha sa among balay kada buntag, dili lamang sa mga kalo ug mga raincoat ug botas sa pagpanalipod kanamo gikan sa pisikal nga mga unos, apan gisul-uban kami sa among mga ginikanan kada adlaw sa taming sa Dios. Samtang kami moluhod alang sa pag-ampo sa pamilya ug maminaw sa among amahan, nga usa ka tighupot sa priesthood, mobu-bu sa iyang kalag ngadto sa Ginoo alang sa proteksyon sa iyang pamilya batok sa nagdilaab nga pana sa dautan, dugang nga gibag-on ang nadugang sa among taming sa hugot nga pagtuo. Samtang ang among taming gihimong lig-on, ang ilang anaa na kanunay, kay sila anaa ug kita nasayud niini.”3
Ibabaw: Batan-ong Tom Perry (sa luyo, wala) uban sa iyang mga ginikanan, mga igsoong lalaki ug babaye. Si Elder Perry miingon nga siya kanunay nga nahinumdom sa espirituhanon nga pagbansay nga gihatag sa iyang mga ginikanan kaniya sa bata pa. Ibabaw: Usa ka yearbook litrato nga gikuha sa United States Agricultural College human sa gubat.
Gikan sa usa ka batan-ong edad, si Tom gitudloan kon unsaon sa pagtrabaho. Mipasakop siya sa buluhaton sa pamilya, lakip sa pagtanom ug pag-amuma sa usa ka dako nga tanaman. “Mapasalamaton ko sa usa ka amahan kinsa adunay pailub aron sa pagtudlo kanako sa art sa garden,” siya miingon. “Ang among pamilya gitudloan dili lamang sa pamaagi sa pagtigum ug pagpuli-puli sa mga lata ug mga botelya sa estante, apan usab unsaon sa pagpatubo ug pag-ilis sa mga prutas ug utanon nga gikinahanglan sa pagpuno sa walay sulod nga lata ug botelya pag-usab.”4
Ang iyang inahan talagsaon nga magtutudlo diha sa panimalay, nagtudlo sa iyang mga anak sa ebanghelyo ug sa akademik nga mga kamatuoran sa matag oportunidad, lakip na samtang ilang gibuhat ang buluhaton sa panimalay. “Siya ordinaryo lang nga magtutudlo ug mas labaw kaayo kamapugsanon kanamo kay sa among mga magtutudlo sa eskwelahan ug simbahan.”5
Siya mobarug gayud gawas sa pultahan sa kwarto sa gabii og igong gidugayon aron sa pagsiguro nga ang iyang mga anak nag-ampo.
Sa iyang inahan, miingon si Elder Perry, “Siya miila nga ang mga ginikanan ang gitahasan sa edukasyon sa ilang mga anak ug, sa kaulahian, ang mga ginikanan kinahanglan gayud nga mosiguro nga ang ilang mga anak natudloan unsay gusto sa ilang Langitnong Amahan nga ilang makat-unan.”6
Usa ka Lider diha sa Gingharian
Si Elder Perry nagserbisyo sa daghang mga calling sa pagpangulo sa iyang tibuok kinabuhi. Siya miserbisyo sa duha ka mga bishopric, sa usa ka stake high council, isip ikaduhang magtatambag sa kapangulohan sa American Stake sa Sapa sa California, isip stake mission president, isip usa ka espesyal nga mga assistant ngadto sa Eastern States Mission president (diin siya migahin og daghang oras sa pagtabang sa gambalay sa Simbahan didto sa 1964–65 New York World‘s Fair), isip ikaduhang magtatambag sa kapangulohan sa Boston Massachusetts Stake, ug isip presidente sa niana nga stake. Niadtong 1972 gitawag siya isip Assistant sa Napulog Duha, ug dayon niadtong 1974 gitawag siya isip usa ka sakop sa Korum sa Napulog Duha ka mga apostoles.
Si Elder Perry nagsangyaw ug nagpuyo uban sa hilabihan nga espirituhanong gahum ug kadasig. Ang iyang maanindot nga tingog magpabilin diha sa mga kasingkasing sa mga tigpaminaw inig kanaog niya gikan sa pulpito.
Si Elder Perry (tuo) nalingaw uban sa iyang tulo ka mga Kaigsoonan sa Korum sa Napulog Duha ka mga Apostoles—si Elder D. Todd Christofferson, Elder Quentin L. Cook, ug Elder Neil L. Andersen—sa kinatibuk-ang komperensya.
Si Elder Quentin L. Cook sa Korum sa Napulog Duha ka mga Apostoles mipakigbahin sa mosunod: “si Elder L. Tom Perry mihatag og gamhanang pagsaksi ni Jesukristo. Siya nakaila sa Manluluwas, siya nahigugma sa Manluluwas, ug [siya] gamhanan sa pagpamatuod sa kabalaan sa Manluluwas.”7
Usa ka Pamilyadong Tawo
Nahimamat ni Tom ang iyang asawa nga si Virginia Lee samtang siya nag-ihap sa mga nanambong sa usa ka stake leadership meeting. Dayon miingon siya nga nakahimo ra siya sa pagkuha sa attendance sa batan-ong mga lalaki, apan sa dihang oras na sa pagsuma sa batan-ong mga babaye, naglisud siya sa paggamit sa iyang kahanas sa math. “Sa kalit lang ang akong mga mata nakakita og madanihon, matahum nga batan-ong babaye. Hingpit nga nawala ang akong abilidad sa pag-ihap.”
Si Tom nag-eskwela sa Utah State Agricultural College (karon Utah State University) nianang higayuna ug busy kaayo sa iyang iskedyul. Bisan pa niana, ang iyang pagpangulitawo ni Virginia Lee nahimong prayoridad.8
Walo ka bulan human sa ilang panagkita, si L. Tom Perry ug si Virginia Lee naminyo sa Logan Utah Temple. Sila adunay tulo ka mga anak.
Ang panahon sa pamilya mao ang labing importante ni Tom. Kanunay siya migahin og panahon alang sa adlaw nga natawhan, pagbakasyon sa pamilya, mga tradisyon sa pamilya, ug ubang importante nga mga okasyon.
Kabahin niini, usa ka kasinatian nga nagbilin og malungtarong impresyon ngadto kaniya. Sa dihang si Tom ug ang iyang pamilya mibalhin ngadto sa East coast sa Estados Unidos tungod sa trabaho, sila misugod sa pagpangita og balay duol sa iyang trabahoan. Samtang nagpadayon sa pagpangita sa balay, nagsugod sila sa pagpangita sa layo-layo. Hangtud sa katapusan nakakita sila og balay nga nagustohan sa tibuok pamilya. Usa kini ka maanindot nga usa ka andana nga balay nga nahimutang sa kakahoyan sa Connecticut. Ang katapusang pagsulay mao ang pagsulay sa pagbiyahe. Miuli si Tom sa balay nga nahigawad. Ang pagbiyahe moabut og usa ka oras ug tunga kada bwelta.
Iyang gisulti ang problema ngadto sa iyang pamilya, nag-ingon nga sila makapili sa balay o sa usa ka amahan. Ang ilang tubag nakasurprisa kaniya. “Pilion namo ang balay,” miingon sila. “Dili man sad ka pirme dinhi.”
Dinhi nagsugod ang dakong kausaban ni Tom. “Kinahanglan kong maghinulsol dayon,” miingon siya. “Ang akong mga anak nagkinahanglan og amahan nga anaa na sa panimalay kanunay.” Kinasingkasing niyang gidawat ang leksyon. “Giusab nako ang akong pagtrabaho nga aron ako dunay mas daghang panahon uban sa akong pamilya.”9
Sama sa daghan kaayong mga tumong sa iyang kinabuhi, nakab-ot ni Tom ang tumong sa pamilya nga magkauban sa dakong kalampusan. “Makalingaw nga ikauban ang akong amahan,” miingon si Lee Perry, anak ni Elder Perry. “Gipaaktibo kami niya ug gusto nga moapil kanamo. Nasayud kami nga gihigugma kami sa akong amahan.”10
Si Tom ug Virginia Perry mipadako sa ilang mga anak sa pagkamatarung ug gugma. Niadtong Disyembre 14, 1974, mga walo lang ka bulan human gitawag isip usa ka Apostol, si Elder Perry namatyan og asawa tungod sa lima ka tuig nga pakigbisog sa kanser. “Karon hingpit na usab siya, ug ako nakasiguro nga ang paraiso mas malipayon nga dapit tungod kay tua siya didto,” miingon siya atol sa pasidungog sa iyang asawa.11
Niadtong Abril 28, 1976, si Elder Perry naminyo ni Barbara Taylor Dayton didto sa Salt Lake Temple. Si Elder ug Sister Perry magkuyog nga magbiyahe sa kalibutan, nagsangyaw ug nagtudlo.
Sa kinatibuk-an sa iyang pangalagad, si Elder Perry namulong kanunay sa iyang pagdako, sa iyang kaugalingong pamilya, ug sa panginahanglan sa mga pamilya nga magpabiling lig-on ug suod. Gibati kini niya pag-ayo nga daghang higayon namulong siya direkta ngadto sa iyang kaugalingong mga sakop sa pamilya isip kabahin sa iyang mga pakigpulong sa kinatibuk-ang komperensya.12
Usa ka Malampuson nga Negosyante
Sa tanan niyang taas nga kinabuhi, si L. Tom Perry adunay talento sa paggamit sa mga kahanas ug mga panabut nga iyang nakat-unan gikan sa usa ka dapit sa iyang kinabuhi ngadto sa uban. Pipila ka mga tuig sa iyang unang kaminyoon, ang calling nga miabut kaniya sa pagserbisyo isip ikaduhang magtatambag sa bishopric. Kini miabut sa usa ka panahon sa iyang propesyonal nga mga kinabuhi sa dihang si Tom dili kaayo makahunahuna kon unsaon sa pagpahaum ang maong pasalig ngadto sa iyang iskedyul. Wala kaayo siyay panahon alang sa pagkatulog og igo.13
Apan, wala siya magpanuko sa pagdawat. Usa sa unang mga kahanas nga iyang nakat-unan sa bag-o nga bishopric mao kon unsaon sa pagdelegar ug pag-organisar. Gigamit niya kini nga mga baruganan sa negosyo ug sa wala madugay duna nay mas daghang panahon sa trabaho ug sa panimalay. Kini nga mga kahanas nakatabang gayud ni Tom ngadto sa mas taas nga level sa pagdumala sa iyang retail nga negosyo.
Laing higayon nga ang training sa Simbahan nagamit sa dihang human niya dawata ang trabaho sa dakong kompaniya sa New York. Kabahin sa iyang bag-ong mga responsibilidad naglakip sa paghimo og pasundayag sa badyet ngadto sa lisud mapahimuot nga mga board of director.
Nahadlok sa sinugdanan sa assignment, si Tom mibisita sa kwarto diin siya mohimo sa pasundayag. Sa kwarto iyang nadiskobrehan ang dakong bahin sa bong-bong nga gitabunan og flannel, labing siguro nga gibutang kini alang sa acoustic nga mga katuyoan. “Samtang nagtan-aw ko sa dakong piraso sa flannel, naghunahuna ko sa akong magtutudlo sa Primary ug sa paggamit sa mga flannel board [alang sa mga leksyon].”
Nag-order si Tom og flannel-backed paper, mihimo og daghang bahin sa iyang presentasyon diha niini, ug nadani ang mga board of director sa miting sa budget. “Ang presentasyon ingon og epektibo kaayo, ug sa dihang nahuman na, gidayeg ko, salamat sa akong magtutudlo sa Primary,” siya miingon.14
Bisan og siya nagmalampuson sa negosyo, si Tom wala gayud motugot nga moimpluwensya ang iyang propesyon sa iyang kaligdong o mga mithi. Atol sa usa ka bahin sa iyang trabaho, gidapit siya sa iyang boss sa pagtambong sa lain-laing panihapon sa negosyo ug sa panahon sa pakigsosyal nga mag-una niini. Dili gusto nga makit-an nga naggunit og bisan unsa nga masaypan nga ilimnong alkohol si Tom sa wala madugay nagsugod sa pagdala og baso sa gatas.
“Natingala ko, sa paglabay sa panahon, kon pila sa akong mga kauban ang miapil nako sa usa ka baso nga gatas atol sa takna nga kami magkauban,” siya miingon. “Akong nahibaloan … nga ang pagkalahi gikan sa kalibutan makahatag og makaikag nga mga reaksyon, apan ang pagsunod sa balaod sa Ginoo sa kanunay may kalabutan sa Iyang mga panalangin.”15
Usa ka Patriot
Si L. Tom Perry nagserbisyo isip full-time nga misyonaryo sa Northern States mission sa dihang nagpadayon ang Ikaduhang Gubat sa Kalibutan. Sulod sa usa ka bulan sa pagpauli gikan sa iyang misyon, mipasakop siya sa mga marine.
Nagserbisyo siya sa iyang nasud uban sa dungog ug mipauli nga usa ka patriot kay sa kaniadto. Niadtong Nobyembre 2013, si Elder ug Sister Perry mga pinasidunggang mga dinapit sa 238th Marine Corps Birthday Ball. “Gusto ko nga mosulti nga kanunay kong mapasigarbuhon sa panahon nga ako nagserbisyo sa Marine Corps,” miingon siya atol sa mga kalihokan.16
Sayo sa iyang tawag isip usa ka Apostol, si Elder Perry gidapit sa Washington, D.C, alang sa usa ka miting sa mga lider sa relihiyon sa paghisgot og mga paagi sa pagpaapil sa mga kongregasyon sa pag-apil sa kasaulogan sa ika-200 nga kasumaran sa Amerika. Sa una ni Elder Perry nahimuot. Gusto siya nga makatabang sa paghiusa sa mga tingog sa mga simbahan agig pasalamat sa Dios sa paggiya ug pagpanalipod sa Amerika.
Sa iyang kasurprisa, ang grupo dili andam nga mohimo sa mao nga pamahayag. Ang bisan unsa nga paghisgot sa Ginoo nga atong Dios kinahanglang idili, tungod kay dili na gusto nga makasilo sa wala motuo sa Dios. Si Elder Perry naguol pag-ayo sa mga resulta. Hinoon, mihatag siya sa balaang pagsaksi sa kinatibuk-ang komperensya sa mga kamatuoran nga dili gustong isulti sa tibuok grupo sa mga lider sa relihiyon didto sa Washington. “Akong itudlo ang akong lig-on nga kombiksyon nga ang pundasyon sa mga matarung nga panggamhanan mao ang balaod nga nadawat gikan sa Ginoo aron sa paggiya ug sa pagdirekta sa mga paningkamot sa mga tawo. Ang matarung nga panggamhanan magdawat og direksyon gikan sa Ginoo.”17
Si Elder Perry nagpabilin nga usa ka patriot iyang tibuok kinabuhi.
Usa ka Higala sa Tanan
Ibabaw: Si Elder Perry diha sa iyang opisina sa edad nga 89. Sa Tuo: Dali rang Makapahiyom, si Elder Perry makahigala og dali bisan asa siya moadto. Dinhi siya mitimbaya sa nanambong sa panihapon sa 2014 Humanitarian Award diin siya ug ang iyang asawa, si Barbara, napasidunggan isip mga humanitarian Catholic Community Services sa Utah.
Ibabaw: gilitratohan ni Tom Smart, Deseret News; ubos: gilitratohan sa maayong kabubut-on sa Deseret News
Si Elder Perry makahigala bisan asa siya moadto. Usa ka istorya gikan sa iyang kinabuhi naghulagway sa iyang abilidad sa pagpakighigala sa bisan unsang kahimtang. Human siya ug ang iyang pamilya mibalhin ngadto sa Siyudad sa New York alang sa trabaho, nakamatikod siya nga ang mga tawo anaa sa kadalanan ug sa mga mga subway.
“Naghunahuna ko, pagkadili mahigalaon niining grupoha,” dayon nakahinumdom siya. Ang ilang kinaiya lahi kaayo sa madanihon ug sosyal nga mga tawo sa siyudad sa California nga gibiyaan sa iyang pamilya. Nahigawad siya sa kakulang sa pagtagad ug mabinationg mga tawo sa ilang palibut nga siya gusto nga mobalik ngadto sa California. Ang iyang asawa nangutana kaniya kon nakasulay na ba siya sa paghimo og kalainan. Wala pa siya makahimo. Siya misugyot, “Nganong dili nimo kining sulayan ug tan-awon kon unsa ang mahitabo?”
Nagplano si Tom sa iyang mga biyahe sa buntag sa pagpakig-ila-ila og tawo. Iyang gibantayan ang usa ka tawo sa iyang paghunong sa subway sa gibuhat niini kada buntag. Ang tawo miabut sa samang higayon, mopalit og pamantalaan, mobarug sa samang lugar sa platform sa tren, ug molingkod sa samang lingkuranan diha sa subway matag adlaw nga walay kalainan.
Si Tom gustong mobuhat og butang ug motan-aw kon makaamigo ba siya. Miabut siya og sayo usa ka adlaw niana ug mibarug niining samang paboritong lugar sa platform. Dayon milingkod siya sa lingkuranan nga gusto sa tawo. Human sa duha ka adlaw sa pagbuhat niini, nabantayan ni Tom nga mas sayo na nga moabut ang tawo kay sa kasagaran ug mibalik sa iyang lugar. Ang tawo mitamihid ni Tom, kinsa milakaw dayon ug nagkatawa samtang mipasabut siya unsay iyang gibuhat.
“Naghunahuna siya nga mao kadto ang labing nindot nga butang nga iyang nadungog sukad,” miingon si Elder Perry. Siya ug ang tawo magkuyog sa pagsakay sa tren. Sa wala madugay sila nahimong mga higala. Matag buntag nahimong lumba kinsa ang makauna sa pag-abut sa platform. Sa wala madugay ang lumba miabut og 3, dayon 4, dayon 10 ka mga sumasakay natural na lang nga moangkon sa maong lugar.
“Kini nakapaalegre sa tibuok platform,” miingon si Elder Perry. Tungod niini, ang tanan nagkasuod pag-ayo. Usa ka Pasko mga 10 kanila nagbarug sa platform nga nanganta og mga kanta sa Pasko. “Ako napalambo sa labing suod nga mga higala sukad.”18
Tigtukod sa Kahangturan
Ibabaw: Si Elder Perry ug ang iyang asawa mibutang og mortar sa cornerstone sa Brigham City Utah Temple. Ibabaw sa tuo: si Elder L. Tom Perry (nagbarug diha sa tuo) isip usa ka misyonaryo uban sa iyang kompanyon, si Elder Wayne Parkin, didto sa Northern States Mission, USA. Tuo: Batan-ong Tom Perry isip bag-ong nalista nga marine.
Tuo sa tunga: gilitratohan ni Scott Winterton, Deseret News
Atol sa Oktubre 1986 nga kinatibuk-ang komperensya, si Elder Perry mipakigbahin og istorya gikan sa iyang pagkabata nga nakapadayag sa usa ka importante nga panabut sa iyang kinabuhi. Ang iyang amahan nag-ayo sa balay, ug responsibilidad ni Tom nga siete anyos ang pagpangibut sa mga lansang gikan sa daang kahoy gamit ang bara de kabra ug tul-iron kini. Bisan og kini lisud nga trabaho, gibati niya ang katagbawan sa pagkahuman niining inadlaw nga buluhaton.
Si Elder Perry nakakompleto sa daghan nga mga proyekto sa kontruksyon sa mga katuigan, gikan sa pag-ayo sa mga chapel ngadto sa pagtukod og bag-ong mga building sa simbahan. Ang mga leksyon nga iyang nakat-unan isip usa ka bata nga magtul-id sa mga lansang makita diha sa paagi nga siya nagpuyo sa iyang kinabuhi—diha o wala sa dapit sa konstruksyon.
Miingon siya, “Adunay tinuod nga katagbawan nga moabut gikan sa paghuman sa buluhaton, ilabi na kon kini mao ang labing maayo nga buhat nga atong nahibaloan nga buhaton.”19
Si Elder Perry wala gayud mobuhat og bisan unsang butang nga ginagmay. Mitukod siya, mitudlo siya, miserbisyo siya, mipamatuod siya—sa tanan kutob sa iyang mahimo. Siya tinuod nga tigtukod sa gingharian.
Ang ebanghelyo ni Jesukristo tinuod,” miingon siya “Gipahiuli kini sa pagpanalangin sa atong mga kinabuhi niining katapusang mga adlaw. Naglangkob kini sa tanang mga kamatuoran, mga baruganan, ug mga ordinansa nga anaa sa mahinungdanong plano sa kalipay sa atong Amahan sa Langit, nga usa ka plano aron kita makabalik ug makapuyo uban Kaniya didto sa mahangturon nga kalibutan. Nga ang ebanghelyo ni Jesukristo mao ang Iyang balaan nga paagi aron kita makaatubang sa atong mahimayaon nga umaabut mao ang akong pagpamatuod nganha kaninyo.”20
“Si Tom Perry miserbisyo sa iyang nasud, sa iyang simbahan, sa iyang pamilya, sa iyang isigkatawo, ug sa iyang Dios.”—Presidente Thomas S. Monson, sa iyang mga pasidungog sa lubong ni Elder L. Tom Perry (tan-awa sa mga pahina 14–15)
Ibabaw: Si Elder Perry diha sa iyang opisina sa edad nga 89. Sa Tuo: Dali rang Makapahiyom, si Elder Perry makahigala og dali bisan asa siya moadto. Dinhi siya mitimbaya sa nanambong sa panihapon sa 2014 Humanitarian Award diin siya ug ang iyang asawa, si Barbara, napasidunggan isip mga humanitarian Catholic Community Services sa Utah.
Ibabaw: gilitratohan ni Tom Smart, Deseret News; ubos: gilitratohan sa maayong kabubut-on sa Deseret News
Wala: Si Tom Perry miserbisyo sa United States Marine Corps atol sa Ikaduhang Guat sa Kalibutan. Siya uban sa unang mga kasundalohan nga misulod sa Japan. Ibabaw: Sa Brigham Young University uban ni US senator nga si Joseph Lieberman.
Wala sa tunga: gilitratohan ni Mark A. Philbrick/BYU Photo
Ibabaw: Batan-ong Tom Perry (sa luyo, wala) uban sa iyang mga ginikanan, mga igsoong lalaki ug babaye. Si Elder Perry miingon nga siya kanunay nga nahinumdom sa espirituhanon nga pagbansay nga gihatag sa iyang mga ginikanan kaniya sa bata pa. Ibabaw: Usa ka yearbook litrato nga gikuha sa United States Agricultural College human sa gubat.
Ibabaw: Mga tawo naglinya aron sa pagsugat ni Elder Perry sa usa ka visitors’ center. Wala: Uban sa iyang mga anak sa Adlaw sa Bag-ong Tuig, 1960.
Wala sa tunga: gilitratohan ni Michael Parker, Deseret News
Ibabaw ug wala: Litrato gikuha gikan sa Abril 6, 1974, ang adlaw nga si Elder Perry gipaluyohan isip usa ka sakop sa Korum sa Napulog Duha ka mga Apostoles.
Usa ka tuig ug tunga human mamatay ang iyang asawa, nga si Virginia, si Elder Perry nagminyo ni Barbara Taylor Dayton didto sa Salt Lake Temple.
Ibabaw: Si Elder Perry ug ang iyang asawa mibutang og mortar sa cornerstone sa Brigham City Utah Temple. Ibabaw sa tuo: si Elder L. Tom Perry (nagbarug diha sa tuo) isip usa ka misyonaryo uban sa iyang kompanyon, si Elder Wayne Parkin, didto sa Northern States Mission, USA. Tuo: Batan-ong Tom Perry isip bag-ong nalista nga marine.
Tuo sa tunga: gilitratohan ni Scott Winterton, Deseret News
Litrato sa Korum sa Napulog Duha ka mga Apostoles niadtong 1979. Si Elder Perry nagbarug sa luyo nga lingkuranan tupad ni Elder Thomas S. Monson.
Ibabaw: Si Elder Perry mitimbaya sa mga miyembro diha sa Oktubre 2013 nga kinatibuk-ang komperensya. Wala: Si Elder Perry nakighimamat sa mga lider sa simbahan sa Seventh-day Adventist Church niadtong Abril 2014 sa paghisgot sa kagawasan sa relihiyon. Ubos: Si Elder Perry kanunay mogahin og panahon sa pagpakigsulti, sama niini nga pundok sa Days of ‘47 nga parada sa Siyudad sa Salt Lake, Utah.
Ibabaw sa tuo: gilitratohan ni Tom Smart, Deseret News; tuo sa tunga: litrato sa maayong kabubut-on ni Ansel Oliver; ubos sa tuo: gilitratohan ni Kristin Murphy, Deseret News