Saafiafiga mai le Falelauasiga o Elder L. Tom Perry
5 Iuni, 2015, Tapeneko i Sate Leki
“O ma’ua ma [lo’u tuafafine] o Linda Gay… ma te fia faailoa atu lo ma lotofaafetai patino lava ia Sister Barbara Perry mo le avea ai ma soa faamaoni i lo matou tama mo le silia ma le 39 tausaga ma e faapitoa lava mo le tausiga o ia i tausaga ua mavae. … Matou te faamamaluina lou faavauvau tele, Barbara—o se faavauvau ua faalauteleina ona sa matuai atoatoa lou tuuto atu i lau tane. …
“O aso uma o le olaga o [Elder Perry] na mamalu ia te ia. Sa ia opomauina se olaga sa matuai saosaoa i taimi uma le agai i luma. Na ia faatofuina atoatoa o ia lava i mea uma sa ia faia lea sa galo ai ia te ia seia oo ina ua matua tuai i le olaga, sa tatau ona faifai lemu. … Sa ia soifua i lona olaga i lona atoatoa—o se olaga o le tuuto i le Atua, aiga, ma le atunuu.”
Lee T. Perry, atalii
“O Elder Perry e ala i lona natura o se tasi e faamoemoeina mai lava i taimi uma ina ia iloa mea e agai i luma. Sa foliga mai sa matua laitiiti lava lona onosai pe afai e le aoga le taimi. Na ia aoao i taimi uma, uunaia, ma musuia tagata uma o le au Pulega Aoao ina ia mafai ona tatou faia mea e sili atu, mafai ona tatou faia ia sili atu, ma e mafai ona tatou agai i le vave i le faamanuiaina o olaga o tagata uma o le Ekalesia. …
“Sa feagai Elder Perry ma ni luitau faaletagata lava ia, ae o lona faamoemoe mausali ma lona faatuatua i le fuafuaga e faavavau a le Atua sa masani ai lava ona ia tautino mai, ‘E lei i ai lava se aso leaga i lo’u olaga.’ …
“I le tolu aso a o lumanai lona maliu, sa ma valaau atu ai ma Elder Dallin H. Oaks ia Elder ma Sister Perry. … E pei ona masani ai, e saunoa lava Elder Perry e uiga i lona alofa mo tagata o le Ekalesia ma lona popole tele ma le atugalu mo lo latou manuia faaleagaga. Sa ia fai mai, ‘o Iesu o le Keriso, o le Faaola o le lalolagi. E faalagolago mea uma ia te Ia. E sili pe a tatou saili se auala e latalata atu ai ia te Ia, ma afai e te le mafai, e leai la se faamoemoe tele o i ai. O le mea lena tatou te manaomia. E mafai ona tatou fausia i siteki o Siona se alofa moni ma le malosi mo le talalelei.’”
Elder M. Russell Ballard o le Korama a Aposetolo e Toasefululua
“O L. Tom Perry, o se uso matua i ona uso laiti uma i le Korama a le Toasefululua. …
“Sa faia lava e Elder Perry se uunaiga maoae i tagata uma sa ia feiloai i ai. E pei ona saunoa se tasi o uo Katoliko, ‘Sa iloagofie lava lona lelei. Na te faagaeetiaina oe e ala i le avea ai ma tagata e maoae lona agaga.’
“Na tusia e se isi taitai faaleatunuu iloga e le o se tagata o le Ekalesia, ‘O Elder Perry o se faamalosiauga ia te a’u. I le fa tausaga ua mavae, sa ia asiasi atu ai i lo’u ofisa i Niu Ioka. Sa taia au i le ofoofogia o le malosi o lenei tamalii. O ia o se uo, manino ma tuusao—matua tuusao a. Sa musuia lava a’u. Ou te mautinoa sa i ai lenei aafiaga o Elder Perry i le faitau afe o tagata i luga o le ala o lona soifuaga.’”
Elder Dallin H. Oaks o le Korama a Aposetolo e Toasefululua
“[O Elder Perry] o se tasi e tali atu ma le loto i soo se tofiga ma o le sa i ai uma lo tatou talitonuga atoa. Sa faamanuiaina i se faatuatua mausali, se uiga lelei, ma se agaga o le agaalofa, sa avea ai Tom ma faataitaiga o le tautinoga a le aposetolo o Paulo, ‘Ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia’ (1 Timoteo 4:12). …
“Sa tuufaatasia e Tom Perry se mafaufau malamalama ma se loto e tumu i le faatuatua e galueaiina ai mea ofoofogia i ana upu. Sa manino lava lana ia lava sitaili. Sa faaee atu ia te ia se siufofoga lelei ma malosi lea na ia folafola atu ai le afioga a le Atua i le aiga ma le lautele i aso uma o lona soifua. O tagata uma na faalogo i lona siufofoga, ma i latou na faitauina ana upu, na vave lava ona iloaina, o ia o se tagata e le fefe e puipui ma molimau atu i le upumoni. …
“Faatasi ai ma lona faatuatua, tautinoga, ma le malosi, sa avea ai Tom Perry o se tasi o tamalii sili ona agalelei, magafagafa, ma faaaloalo ua ou iloaina. …
“Ou te tautino atu ia te outou, ou uso e ma tuafafine, sa leai se laulua i ofutau o L. Tom Perry, sa leai se ila i lona agaga, sa leai se faaletonu i lana amio. Sa alofa o ia i le Alii ma lona loto ma le agaga atoa ma auauna atu ia te Ia ma lona malosi atoa seia oo lava i le iuga o lona olaga faaletino. …
“Sa soifua mai i Logan, Iuta, na tali atu ai Tom i le valaau a lona atunuu ina ua ia tautua ai o se marini i le Taua Lona Lua a le Lalolagi. Sa ia te ia se matata faapisinisi sili ona tulaga ese, ma sa auauna atu i le malosi i tofiga uma i le Ekalesia sa valaauina i ai o ia. …
“O lana auaunaga i le galuega a le Alii ua avea ma faataitaiga lelei ma e aunoa ma se faaletonu. …
“O lona agaga le mafaatoilaloina ua toefoi atu i le aiga i lena Atua na tuuina atu ia te ia le ola. O ana talafaamaumau ua lauiloa i le lagi ma o iina o le a selesele ai i faaputuga oa o galuega lelei ma auaunaga faamaoni. …
“Soo se mea lava ou te alu i ai i lenei lalolagi matagofie, o le a ma o faatasi i taimi uma ma se vaega o lenei uo faapelepele.”
Peresitene Thomas S. Monson
Luga: O le aiga o Perry o loo mulimuli atu i le sa i totonu i le Tapeneko, sa faafeiloai e uso o le Korama a Aposetolo e Toasefululua ma le Au Fitugafulu. O le faletua o Elder Perry, o Barbara, o loo luluaao ma Elder Russell M. Nelson. Lalo, i le tauagavale: O le afafine o Elder Perry, o Linda Nelson o loo tuuina se fuarosa se tasi i luga o le sa a o tagai atu i ai lona tuagane. Tauagavale: I le faamamaluina o le auaunaga a Elder Perry i le Marini a le Iunaite Setete, na tauaao atu ai se tagavai o le malo o Amerika ia Sister Perry.