Jutak āinwōt juon Meram

Ekar lōn̄ aō iien ko rem̧m̧an n̄an pād ilo elōn̄ kōjeram̧m̧an ko ilo m̧anit kar kōm̧m̧an ilo aje ko an tampeļ ko. Aolepāer im em̧m̧an ippa, ekoba eo āliktata ikar pād ie ilo Phoenix, Arizona, USA, Nobōm̧ba eo ļo̧k.

Jodikdik ro me rej uwaan Kabun̄ in rekar bōk koņaer kōm̧m̧ane juon būrookraam̧ eo em̧m̧an, im ekabwilōn̄lōn̄ ilo bwebwenato. Iiō eo ļo̧k ilo Phoenix, m̧oktaļo̧k wōt jān iien kōjeram̧m̧an eo, ikar jiron̄ļo̧k ro rekar bōk koņaer, “Kom̧ij ajri ro nejin Meram̧ eo.”

Ikōņaan bwe aolep jodikdik ilo Kabun̄ in ren jeļā bwe er rej ajri ro nejin meram eo. Ilo jekjek in wōt, ewōr ippāer juon eddo n̄an erom “āinwōt meram ko an laļ” (Pilippai 2:15). Ewōr ippāer juon eddo n̄an kwaļo̧k m̧ool ko an gospel eo. Ewōr ippāer juon kūr n̄an jutak āinwōt juon romaak in tampeļ eo, eo ej kwaļo̧k meram in gospel eo n̄an juon laļ ej marokļo̧k. Ewōr ippāer juon eddo n̄an kōm̧m̧an bwe meram in kijeek eo aer en til im ururļo̧k.

Bwe jen maron̄ erom juon “jon̄ak n̄an ro rej tōmak” (1 Timote 4:12), kōj make jej aikuj in tōmak. Jej aikuj in ejaake tōmak eo emenin aikuj n̄an mour ilo jetōb im n̄an kwaļo̧k meram eo n̄an ro jet. Jej aikuj in naajdik naan in kam̧ool eo ad m̧ae iien ej erom juon emjak n̄an mour ko ad.

Ilubwilijin wāween ko rewājepdik n̄an bōk im n̄an dāpij tōmak eo jej aikuji rainin im n̄an riit im katak jeje ko rekwojarjar im n̄an jar emakijkij im iien otemjej. N̄an jodikdik ro an Kabun̄ in, ij ba, eļan̄n̄e kom̧wij jan̄in kar kōm̧m̧ane, ejaake juon m̧wil in ekkatak jeje ko rekwojarjar im jar aolep iien. Eļan̄n̄e eban kamminene kein ruo raorōk, kareel ko an laļ in im jet iien rej wāween ko reppen im rej waļo̧k ilo mour remaron̄ kōmarokļo̧k ak aaet kune meram eo am̧.

Iiō ko an jodikdik ro rejjab pidodo. Rej iiō ko rem̧m̧an n̄e Setan enaaj kapoik eok im aujiidi eok jān iaļ eo im enaaj kar tōlļo̧k eok n̄an m̧weo imōm̧ ilan̄. Ak ilo am̧ riit im jar im ilo am̧ jerbal im pokake, kwonaaj jeļā bwe meram eo ej rom̧aak ilo marok (lale D&C 6:21), ad Riwaanjon̄ok im ad kajoor—aaet Irooj Jisōs Kraist. E ej Meram eo jej kotak lōn̄ļo̧k n̄an kōmeram̧ļo̧k kuktok in maroklep eo (lale 3 Nipai 18:24).

Kōn juon naan in kam̧ool kōn Rilo̧mo̧o̧r eo im gospel eo An emōj an jepļaaktok, ejjeļo̧k juon jon̄ok n̄an ami romaak. Rej jepo̧o̧l kom̧ kajjojo raan, ilo jabdewōt kain jekjek kom̧wij loe kom̧ ie. Ilo ami ļoor waanjon̄ok eo an Rilo̧mo̧or eo, ami waanjon̄ok enaaj erom iien eo em̧m̧an n̄an erom juon meram, āinwōt kar m̧okta, ilo mour ko an ro ipeļaakimi—mekarta remaron̄ in erom membōr in baam̧le eo ami make, rijikuuļ ej jikuuļ ippām̧i, rijerbal ej jerbal ippāmi, ro kwoj kab jeļā kajjeer, ak rūwaimāijet ro.

N̄e kom̧wij erom juon meram n̄an laļ in, armej ro ipeļaakimi renaaj en̄jake juon jetōb einjuon eo enaaj kōm̧m̧an bwe ren kōņaan in iiaio ippām̧i im ļoor waanjon̄ok eo ami.

Ij akweļap n̄an ro jinen im jemān im ritōl ro an jodikdik ro n̄an jipan̄ er jutak dim kōn m̧ool im jim̧we. Jipan̄ kōļapļo̧k aer loe kōjem̧ in ekkatak ko, kōjem̧ in meļeļe, im kōjem̧ in jerbal in jipan̄ ilo aelōn̄ in kiin̄ an Anij. Ejaake ilo er kajoor n̄an jum̧ae kapo ko an laļ in. Leļo̧k n̄an er ankilan n̄an etetal ilo wānōk im tōmak, bwe ren jar, im n̄an reilo̧k n̄an lan̄ āinwōt aer emjak eban jem̧ļo̧k.

N̄an jodikdik ro ad, ij ba, Jemedwōj Ilan̄ ej iakwe kom̧. Kōm̧m̧an bwe kom̧win en̄jake iakwe eo an ritōl ro an Kabun̄ in n̄an kom̧. Kōm̧m̧an bwe en wōr ippāmi juon ikdeleel n̄an jerbal n̄an Jemedwōj Ilan̄ im Nejin. Im bwe kom̧win maron̄ aolep iien etetal ilo m̧ool im jutak āinwōt juon meram ilubwilijin ajri ro nejin Anij.