Sak’iy ni yib Tamilang

Keyag ni nggu un ko bukun e madnom rok pi nam u bang nibe un ko i bing nge yibliy e pi temple. Gu ba adag ni gubin, nib mu’un e bin nib be’ech ni kug waen ngay u Phoenix, Arizona, USA, ko November nike thimur.

Pi bitir ko Gidii’en Got ko Tin Tomur e Rran nibe un ko pi madnom ko nam rorad e ri pi’ed e churu’, nib falel’. Fare duw nike thimur u Phoenix, u’mon ko fare madnom, muog ngak picha’an ni ran churu’, “Gimed e bitir ko tamilang.”

Gu ba’adag ni nge nang urngin e bitir ko Galasia ni ngar nanged ni yad e bitir ko tamilang. Ma ere, bay e murwel roraed ni ngan “par u fayleng u fithik’ e girdi’ ndar yal’uwgad ma yad ba kireb” (Filippi 2:15). Bay e murwel roraed ni ngar weliyed fan e tin nib riyul’ ko gospel. Ba’ e calling rorad ni ngar sak’iy gaed ni yad e pow ko temple, nibe dag e tamilang ko gospel ngak e fayleng nib talimar. Kan duwgily rad ni ngar ted e nifiy rorad nib gel nibe daromrom u lan e gumircha’rad.

Ra ngad “dag[ed] ngorad u rogon e thin ni [gadad] ma yog” (1 Timothy 4:12), ma thingari mich u wun’dad. Ngar da gel niged e mich nib t’uf ni ngad mon’og gad ko tin nib thothup min dag e tamilang ngak boech e gidii’. Ngar da chathowliyed e mich rodad nge mada’ ko ngiyal’ nike mang e angkor ko yafos rodad.

Rogon ni ngad fal’eged min chathowliyed e mich rodad nib fel’ rogon e daba’ e ngan bi’eg min fil rogon ko pi chep nib thothup min meybil ni gubin ngiyal’. Ngak e bitir u lan e Galasia, Gube ga’ar, fa’anra dawor mu rrin’ ni aray rogon, mu fal’eg e chiney ni nge macham ngom i bi’eg e chep nib thothup min meybil ni gubin e rran. Fa’anra dariy l’agruw e ren’ey, ma tin u wuru’ e gospel nge tin ni bingyal’ nib momaw’ ko yafos e rayogg ninge tuluf e tamilang rom.

Pi duw ni fal’ yangren e dani moem. Bogi duw ni napan ni fare Mo’oniyan’ e ra towasar nigem me rrin’ gelngin ni rayog rok ni nge tulufem ko kanawo’ ni ra fekem i yaen ko tabinaw rom u tharmiy. Machane nap’an ni gara bi’eg mag meybil nge nap’an ni gabe pigpig ma gabe fol, ma gara nang nib fel’ rogon ni fare tamilang nibe mat’ u fithik e talimar (Muguy ko D&C 6:21), e Rungin nge gelngin rodad—ni’ir fare Somoel ni Yesus Kristus. I’ir e fare Tamilang ni thingarda tay nga lang ni ngad churiy’ e talimar (muguy 3 Nephi 18:24).

Mich ni ba’ ni mornga’agen e Tathapeg nge gospel Rok nikan fulweg, ma bo’or rogon ni ngam mang e tamilang. Ba liyeg nem ni gubin e rran, demturug e rogon e pi magawon rom. Nap’an ni gara fol ko wo’ rok e Tathapeg, ra yag rom fare tawa’ath ni ngam mang e tamilang, ni rogon, u lane pi yafos ko picha’an nib liyeg nem—demtrug ko yad e chonggin e tabinaw rom, gidii’ u skul rom, gidii’ ko murwel rom, gidii’ ni gam nang, fa gidii’ ri dam nang.

Nap’an gara mang e tamilang ko fayleng, ma pi gidii’ nib liyeg nem e ra thamiy fare kan thothup nra ayuweg raed ngar adaged ni ngar noned ngom mar laekd e wo’ rom.

Gube wenig ngak pi galabthir nge pi tapowi’iy ko pifak dad ni ngam ayuweged raed ni ngar sak’iy gaed nib gel ko tin nib riyul’ mab mat’aw. Ayuw e bay nib ga’ ni ngar bing owechrad ngar filed rogon, ni ngar nanged fan, mar pigpig gad u lan gil’ilungun Got. Toey nga lan gumircha’rad gelngiy ni ngar siyeged e pi lumel u fayleng. Pii’ ngorad e athamgil ni ngar pired ni yib yul’yul’ mab mich u wun’uy, ni ngar meybil gad, mar sap gaed nga tharmiy nibr angkor rorad.

Ngak e pifak dad, gube ga’ar, gimed ba tu’uf rok e Chitamangdad nu Tharmiy. Aygum thamiyed e t’ufeg ni bay ko pi toygang’ ko Galasia ni fanam. Aygum adaged ni ngam pigpig gaed ngak e Chitamangdad nu Tharmiy nge Fak. Ma aygum mared ni gubin ngiyal’ u lan e kanawo’ u fithik e riyul’ min sak’iy ni yib tamilang u fithik pifak Got.