Matavuvale kei na Masu

Ena dua na gauna, niu a dabe toka ena yasa ni imocemoce nei tamaqu ena bogi taucoko, e a qai tukuna o koya na nona gauna ni se gone. E a tukuna na nodrau dau veilomani na nona itubutubu ena gauna ni dredre kei na loloma ni Tamada Vakalomalagi kei na iVakabula. Au kila ni sa tauvi koya voli na kenisa, kau sega ni kidrowa kina ni so na gauna e dau veiwakitaka o koya na nona lomana na Tamada Vakalomalgi kei na loloma kei na yalovinaka ni tamana vakayago. E a kaya o tamaqu ni so na gauna ni dau masu, e dau raitayaloyalotaka e na nona vakasama ni matadredredre tu mai vua na Tamada Vakalomalagi.

Erau a sa vakavulici koya na nona itubutubu ena ivakaraitaki ni masu me vaka e vosa sara tikoga vua na Kalou ka vakakina ni sa sauma lesu tiko mai na Kalou na nona masu ena yalololoma. E a gadreva o koya na ivakaraitaki o ya me yacova na ivakataotioti. Ni sa sivia sara ga na mosi, keitou dau raici koya ena yasa ni nona imocemoce ni tekiduru tiko. Sa malumalumu sara ga ka sa dredre sara vua me lesu cake tale kina na imocemoce. E a tukuna vei keitou ni a masu tiko ka taroga vua na Tamana Vakalomalagi se cava e vakararawataki kina vaka o ya ni a dau sasagataka tu ga o koya me ivalavala vinaka. Kaya o koya ni yaco mai vua na kena isau ka vaka, “na Kalou e gadreva na luvena mera tamata kaukauwa.”

Sa mani tomana tiko ga o koya me yacova na ivakataotioti ena nona vakararavitaka tiko ni na lomani koya, ena rogoci koya, ka na vakaturi koya cake na Kalou. E vakalougatataki o koya ni se gone me kila, ka me sega vakadua ni guilecava ni Kalou dauloloma oqo ena voleka tu ga vei keda me vaka saraga e dua na masu eda cabora.

O ya na vuna e vakavulici ira kina na itubutubu na Turaga ka kaya, “Ia me ra vakavulici ira talega na luvedra me ra dau masu ka caka dodonu ena mata ni Turaga” (V&V 68:28).

Sa vakalesui mai na kosipeli i Jisu Karisito—kei na iVola iMomani kei na idola ni matabete ka na rawa ni semata vata na matavuvale—baleta ni o Josefa Simici e masu ena vakabauta ni a se gonetagane lailai. E a rawata o koya na vakabauta o ya mai na dua na matavuvale yalodina ka dauveilomani.

E a solia na Turaga kina matavuvale na ivakaro oqo “Na Matavuvale: Ai Vakaro ki Vuravura Raraba” ena ruasagavulu na yabaki sa oti, mai vei ira na Mataveiliutaki Taumada kei na Kuoramu ni iApositolo Le Tinikarua: “Na yavu ni veilomani vakavuvale ka ivakadei ni duavata vakaveiwatini, na nodra tuberi ena vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na nodra dau goleva na ivakalasa e so mera vakamarautaki vata.”¹

Eda vakavinavinaka vakalevu kina matavuvale nei Josefa Simici ena vuku ni nona a tuberi cake mai. Sega walega ni ratou a ivakaraitaki ni vakabauta kei na masu na nona matavuvale, ia ratou a ivakaraitaki talega ni veivutuni, veivosovosoti, veidokai, veilomani, yalololoma, cakacaka, kei na golevi ni itavi qaravi vivinaka.

Na itabatamata ena muri iko mai era na vakatokai iko mo kalougata ni ko sa ivakaraitaki ni masu ena nomu matavuvale. Ko na sega beka ni susuga cake e dua na tamata ni Kalou yalodina, ia ena nomu masu kei na ivakaraitaki ni vakabauta ko sa na vukea na Turaga o Jisu Karisito me tubera cake na tisaipeli vinaka ka dauloloma.

Mai na veika kece ko sa digitaka mo cakava mo vukea na Turaga, me sa kena i vakadei na masu. Era na rairai tiko beka na tamata era sega ni dau vakawai, ia, ni ra masu era dau vakauqeti ira e so me rai na matadra mera raica se ocei e tu e ke ya. Sa na rawa ni ko dua na tamata vaka o ya.

Vakasamataka mada na ka ena yaco vei ira na tekiduru vata kei iko ena gauna ni masu ni matavuvale. Ni ra sa vakila ni ko vosa tiko vua na Kalou ena vakabauta, ena tarai cake na nodra vakabauta mera na dau vosa talega vua na Kalou. Ni ko masu mo vakavinavinaka vua na Kalou baleta na nomu kalougata era kila ni sa yaco oti mai, ena tarai cake na nodra vakabauta ni Kalou e lomani ira ka dau sauma na nomu masu, ia ena sauma talega na nodra. Na ka o ya ena yaco walega ena masu ni matavuvale, ni sa yaco oti vakaveitaravi vei iko na ka vata oya ena nomu masu vakataki iko.

Au se vakalougatataki tikoga oqo mai vei tamaqu kei tinaqu ni rau a dau vosa vua na Kalou. Na nodrau ivakaraitaki ena kaukauwa ni masu ena matavuvale e se vakalougatataki ira tikoga oqo na veitabatamata era qai muri rau mai.

Era sa vakalougatataki ena veisiga na luvequ kei na makubuqu ena nodrau ivakaraitaki na noqu itubutubu. Na vakabauta ni Kalou dauloloma e dau rogoca ka sauma na masu sa vakadewataki sobu vei ira. Sa na rawa vei iko mo tara cake e dua na vakatutu me baleta na nomu matavuvale. Au sa masulaka me na yaco mo vaka kina.