Saafiafiga mai le Falelauasiga o Elder Richard G. Scott
28 Setema, 2015, Tapeneko i Sate Leki
Luga: I le faailoa atu o galuega a Elder Scott mo le Neivi a le I.S., sa tuuina atu ai se fu’a Amerika i le alo o Elder Scott, o Michael. O atalii o fanau a Elder Scott sa siiina le pusamaliu. O lona afafine aupito i matua, o Mary Lee, faatasi ma lona toalua, o Bruce, ua mauaina se opo i le sauniga o le lagomauina. Agavale: O Peresitene Thomas S. Monson sa saunoa e uiga ia Elder Scott o se “uo faapelepele ma se paaga i le galuega a le Alii.” Itulau faafeagai: Sa laina le Korama a Aposetolo e Toasefulua ma le Au Peresitene o Fitugafulu i le faitotoa e ulufale ai i le Tapeneko ao aumaia i totonu le pusamaliu.
Michael W. Scott, atalii
“Sa soifua mai Tamā i se tamā e le auai i le Ekalesia, ma se tina e ui e auai i le lotu ae ua le o toe toaga mo le tele o tausaga. … O lona auai i le lotu sa faaitiitia seiloga ua sau se tagata e saili o ia ma ave o ia i le lotu. Ou te mautinoa e lei silafia e na taitai o le alii talavou sa latou aapa atu i ai o le a avea ma se taitai taua i le Ekalesia mulimuli ane. Ou te le iloa po o ai na tagata, ae ou te faafetai atu ia i latou. Masalo o se tasi na o mafuaaga sa matuai lelei ai Tama i le aapa atu i se tasi—le tagata ua le o toe toaga mai, ua tuuatoatasi, ua lotovaivai, ua mafatia—aua i lena taimi o lona talavou, o ia lea sa aapa atu i ai ma laveai mai. …
“Sa soifua Tama i se olaga na tumu i le fiafia ma le olioli. O ia o se tagata musika ma se tusiata. … E fiafia e sailiili. O lona mafaufau i se tafaoga manaia o le uta uma o tamaiti ma mea e faaaoga i le tafaoga i totonu o le tamai taavale Datsun ma faimalaga atu i nuu i tua. …
“Sa avea Tama ma se faataitaiga matagofie o le auala e fetaiai ai ma faigata. O se tasi o ia faataitaiga o le auala sa ia tali atu ai i le maliu o lana fanau e toalua. Ina ua maliu le pepe a Tina ma Tama i le taimi na fanau ai ma i le lua masina mulimuli ane na maliu ai Richard laitiiti ua lua tausaga mai se faaletonu o le fatu, o uiga faaalia a Tama na iloa ai lona tagata. I lena po [na maliu ai le la tama e lua tausaga] sa ia opoina Tina ma fai atu i ai, ‘E le tatau ona ta popole, aua na fanau o ia i totonu o le feagaiga. Ua ta maua le faamautinoaga o le a tatou faatasi i le lumanai. O lea ua ta maua se mafuaaga e ola fiafia ai. Ua i ai se ta tama ua alu i le malo selesitila aua ua maliu a o lei oo i le taimi e tali atu ai mo ia lava.’ Nai lo le ita, sa i ai lona faamoemoe; nai lo le faanoanoa, sa ia faamalosia lona naunautaiga; nai lo le le mautonu, sa ia faatino le faatuatua ia Keriso. …
“Sa ia filifili e faia mea ia taua, ma sa faapena lava. O lona faaipoipo atu ia Tina atonu o se mea silisili lea o mea uma lava.”
Elder D. Todd Christofferson o le Korama a Aposetolo e Toasefululua
“Na lagona e [Elder Scott] o lana feau mai le Alii o le faatautaia lea o le mana faamalolo o le alofa tunoa o Keriso ia i latou ua faatusalia ua maua e tagata faomea—e ua manunua, ua mafatia i avega, ua atuatuvale, ua leai se faamoemoe, i latou ua agasala, ma i latou ua agasala faasaga i ai. Faatasi ai ma le filiga e le masani ai, sa ia valaaulia tagata uma e saili i le Alii e ala i le usiusitai i mataupu faavae o le talalelei ma maua ai iina le filemu, fiafia, ma le olioli. …
“O Elder Scott sa i lona tulaga sili pe a aoao atu ma molimau atu i le le faatuaoia o le oo atu o le Togiola le iu a Keriso ma le olioli e maua i le liliu atu i le Atua. …
“Sa la aoao mai ma lana pele o Jeanene i tatou i se lesona faifai pea e ala ia laua faataitaiga e uiga i le alofa ma le faapelepele i se soa i le faaipoipoga ma tuuto atu ia taumafaiga sili a se tasi i lana fanau. O lena faataitaiga o le alofa ma le faamaoni ua musuia ai le faitau afe, po o le faitau miliona, i lona soifuaga atoa. …
“E tuuina atu e Elder Scott i taimi uma le faamalosiau, vave ona faailoa atu lona talitonuga, naunau e tuu atu le faamalo ma faaali atu lona alofa. Ma o lana masani lena i alii ma tamaitai i soo se nofoaga, e oo lava i lana fanau. O ana aoaoga sa musuia ae aoga, ma sa tumau. Na foliga mai e lei faavaivai lava Elder Scott i le fautua atu, aoao atu, ma le faamalosiau atu, pe taitoatasi pe i ni vaega. E le mafai ona ou tauina atu ia te outou le tele o taimi ma nofoaga na tuuina mai ai e tagata ni manatu faaalia e uiga i se mea sa latou aoaoina mai ia Elder Scott—o nisi taimi o o latou olaga talavou—lea na musuia ai o latou olaga ma auaunaga talu mai lena taimi.”
Luga: I le faailoa atu o galuega a Elder Scott mo le Neivi a le I.S., sa tuuina atu ai se fu’a Amerika i le alo o Elder Scott, o Michael. O atalii o fanau a Elder Scott sa siiina le pusamaliu. O lona afafine aupito i matua, o Mary Lee, faatasi ma lona toalua, o Bruce, ua mauaina se opo i le sauniga o le lagomauina. Agavale: O Peresitene Thomas S. Monson sa saunoa e uiga ia Elder Scott o se “uo faapelepele ma se paaga i le galuega a le Alii.” Itulau faafeagai: Sa laina le Korama a Aposetolo e Toasefulua ma le Au Peresitene o Fitugafulu i le faitotoa e ulufale ai i le Tapeneko ao aumaia i totonu le pusamaliu.
Peresitene Russell M. Nelson, Peresitene o le Korama a Aposetolo e Toasefululua.
“Ou te manatua le taimi na matou o faatasi ai i Central America ia Aperila o le 1990. Sa faagaeetia au ina ua ou vaai atu o aoaoina e Elder Scott ia faifeautalai ma tagata o le ekalesia i le gagana Sipaniolo. E le gata i le lelei o le gagana; sa matua atamai lava—tumu i le naunautaiga ma le fiafia ao ia aoao atu e ala i le Agaga. …
“E lei faavaivai Elder Scott ma sa lelei ia fegalegaleaiga ma tagata i soo se mea sa matou malaga i ai. Sa ia tuuto atu lona soifuaga e auauna atu ai i tagata uma, po o a o latou atunuu, ituaiga o tagata, po o gagana. Sa ia malamalama i le taua tele o agaga ia sa ia feiloai i ai.
“Ua aave tala i lona agaalofa. Sa ou vaavaai ia te ia o aoao atu. Sa ou vaavaai ia te ia o fesoasoani atu. Sa ou vaavaai ia te ia o alofa atu i tagata i le lalolagi atoa.”
Peresitene Thomas S. Monson
“O [Elder Scott] sa sili atu nai lo le agavaa i le taulimaina o soo se galuega na tuu atu ia te ia, ma sa ia faia e le aunoa ma le maeaea lelei ma le tomai sili. …
“Sa i ai i lo tatou lotolotoi i nei tausaga ia Richard G. Scott, o se tamalii faamamaluina, o se tamalii a le Atua. Sa faamanuiaina Richard ma se mafaufau manino, o se malamalama loloto, ma le alofa maoae mo isi. …
“Sa ia alofa i tagata. Sa ia alofa i lona aiga. Sa ia alofa i lona Tama Faalelagi. …
“O le ataata matagofie a Richard na tatala ai loto o isi. Sa tutusa ia te ia e matitiva ma e le tagolima e pei foi o e mauoa ma e tautaua. …
“O Richard sa avea ma se tagata agamalu. Sa ia aoao mai i tatou ma le alofa … i lesona o le lototele, lesona o le onosai, lesona o le faatuatua, ma lesona o le tuuto. O nei mea uma sa aoao ai i tatou e Richard G. Scott i upu ma i galuega.”