Kopwe eu Nenien Appiru me eu Saram

Pwii me fefinei, a fakkun murinno ai uwa pwan chusefan ngenikemi. Oua sinei, pwe seni ewe fansoun sia chufengen non April, sia netipechou ren manon unumon nouch kewe Aposel mi achengicheng: Preseten Boyd K. Packer, Elter L. Tom Perry, me Elter Richard G. Scott. Ra niwinsefan ngeni nenier won nang. Sia pwositir. Sia fakkun kinisou ngenir ren ar nenien appirun tongen Kraist me ren ekkewe afanafan ra anomu rech meinisin.

Sia ennetin etiwa seni netipach nouch kewe minefon Aposel, Elter Ronald A. Rasband, Elter Gary E. Stevenson, me Elter Dale G. Renlund. Ekkei mwan ra mochen apwonueta ewe angang an ewe Samon. Ra unusen tufich ar repwe wiseni ekkewe wis mi auchea ra kokko ngeni.

Mwirin ai, anneani me ekipwichi ekkewe pukfel, ru wokisin ra chok nom non ai ekiek. Sia sinei ir me ru. Ewe aewin a feito seni ewe Afanafan won ewe Chuk: “Ami saram epwe fakkun sarameno mwen mesen aramas, pun repwe kuna ami kewe foffor mi murinno o repwe mwareiti Sememi we non nang.”¹ Ewe oruwen wokisin ewe ew minne a tonong non ai ekiek nupwen ua ekieki usun wewen ewe aewin. Ei seni noun ewe Aposel Paul Taropwe ngeni Timothy: “Kopwe eu minen appiru ren ekkewe chon nuku ren om afanafan, om foffor, om tong, om nuku me nimenimoch.”²

Ua nuku ewe oruwan wokisin a awewei, non murinen kinikinin, ifa usun sia tongeni apwonueta ewe aewin. Sia winiti nenien appirun ekkewe chon nuku ren ach manaueni ewe kapas allimen Jises Kraist non ach afanafan, non poraus, non tong ennet, non ngun, non nuku, me non nimenimoch. Nupwen sia fori, ach saram epwe tin pwe ekkoch repwe kuna.

Emon me emon kich sia feito fonufan sia angei ewe Saramen Kraist. Nupwen sia apiru fofforun ewe Chon Amanau me sia manau usun I me usun An afanafan, ena saram epwe tineno non kich me epwe asarama ewe an ngeni ekkoch.

Ewe Aposel Paul a atetenatiw onu fofforun emon chon nuku, foffor repwe mut ngeni ach saram repwe tineno. Sipwe nengeni eu me eu.

Ua achufengenir ne poraus usun kewe aewin ru foffor— ren ar ew nenien appiru non kapas me non poraus. Ekkewe kapas sia nounou ra tongeni ekieta me amwasanga, are ra tongeni efeingawa me enetipengawa. Non ei fonufan ikenai a wor chommong kapas ingaw minne ra pweni fetanekich. A weires ach sisap rongorong iten Kot mi pin ra nounou non ar rese ekieki me aucheani. Kapas pochokun ra fifis non tv, kachito, puk, me kon. Aramas ra chok aea kapas mwaken me kapasen koput. Sipwe fos ngeni ekkoch ren tong me sufon, ach kapas repwe nimenimoch me sisap aea kapas are poraus mi tongeni afeingaw ika ametek Amo sipwe appiru fofforun ewe Chon Amanau, ewe a kapas ren tong me kirokiroch non unusen An angangen afanafan.

Pwan ewe ew napanap Paul a kapas usun tong ennet, minne a wewen ewe “nimenimochun tong an Kraist.”³ Ua sinei pwe mi wor me neich ra akkanamon, ekkana ir mi samwau, me ekkana ra mefi tipemwaramwar. Sia tufichin anisir me ekieta ngunur. Ewe Chon Amanau a awora epinukunuk ngeni ekkewe ir ra epinukunukungaw me pochokun ngeni ekkewe mi apwangapwang. A echikarata ekkewe mi samau; A fori ekkewe mi mok ar repwe fetan, ekkewe mi mesechuun ar repwe kuna, ekkewe mi sening pung ar repwe rongorong. A pwan amanaua ekkewe mi mano. Non An angangen afanafan A atoura ngeni ekkewe mi mochen aninis ren ennetin tong. Nupwen sia appiru I, sipwe efeiochu manau, fiti pwisin manauach.

Mwirin, sipwe eu nenien appiru non ngun. Me rei a wewen pwe sia achocho pwe sipwe kirokiroch, uren kinisou, omusomus, me fofforoch. Ekkei napanap repwe awora ngenikich eu ngun minne epwe atapa manauen ekkewe chon unukuch. A wor ai tufichin non ekkewe ier ai upwe chiechi ngeni chommong aramas minne ngunur mi iei usun. Sia mefi och sokkun memmef nupwen sia nom rer, ew memmef a fori ach sipwe mochen chiechi ngenir me appiru ar nenien appiru. Ra pwarano ewe Saramen Kraist me anisikich ach sipwe mefi An tong fan itach.

Ne awewei pwe ewe saram minne a feito seni ngunun tong me nimenimoch mi sinneno me ren ekkoch, ua aporausa ngenikemi eu mettoch a fis fitu ier me nom.

Non ena fansoun, souemwenin ewe Mwichefen ra chufengen me souemwen non Jerusalem fan iten porausen etipeeu fengen won ewe fonu minne epwe kouta an ewe Mwichefen Nenien chunap non Jerusalem. An epwe wor mutata, ewe Mwichefen epwe tipeew pwe ekkewe chon nom non ewe neni resap afanafan. Mwirin ena etipeew a ponueta, emon souemwenin Israel, minne a sineiochu ewe Mwichefen me ekkewe chon fiit, a apasa pwe a sinei pwe ewe Mwichefen epwe sufoniti ewe pwon pwe resap afanafan. “Nge,” a apasa, a poraus usun ekkewe chon sukun repwene sukun ikkewe, “met sipwe fori usun ewe saram a nom non meser?”⁴ Amo ena saram mi auchea epwe tin non kich, pwe ekkoch repwe esinna me etiwa.

An emon epwe eu nenien appirun nuku a wewen pwe sia epinukunuku ewe Samon me non An kapas. A wewen pwe mi wor rech me sia tumunu ekkewe achifouwa minne epwe emweni ach ekiek me foffor. Ach nuku non ewe Samon Jises Kraist me Sam won Nang epwe fich ngeni meinisin sia fori. Nein ewe osukosuk non ach kei ran, ekkewe osukosuken ekiek, me weiresin ran me ran, nuku a winiti eu anko non manauach. Chechemeni pwe nuku me tipemwaramwar rese tongeni nomofengen non ekiekin emon non eu chok fansoun, pun eu epwe oturau ewe pwan eu. Ua apasa sefanni met sia fen rongorong—pwe ika sipwe angei me awora ewe nuku sia mochen, mi namwot pwe sipwe anneani me kaeo me ekipwichi ekkewe pukfel. Poraus fengen me Semach won Nang non iotek mi namwot. Sise tongeni nikitano ekkei mettoch, pun ewe chon koum me noun kewe ra kutta ewe apwangapwangen ach minen eppet, kukkununon ach nuku. Ewe Samon a apasa, “Pwe sipwe kukutta, iotek iteitan, me sipwe nuku, iwe mettoch meinisin repwe angang fengen ren eóchum.”⁵

Nesoponon, sipwe unusoch, minne a wewen pwe sia nimoch non inis, ekiek, me ngun. Sia sinei pwe inisich a eu imwenfel, sipwe osufonu me tumunuochu. Ach ekiekepwe ur ren ekiek mi afefeitai me ekiekoch me esap wor mettoch mi animengawa. Ren an ewe Ngun mi Fel epwe chiechi ngenikich iteitan, mi namwot pwe sipwe nimenimoch. Pwii me fefinei, nimenimoch epwe awora kinamwen ekiek me otufichikich ach sipwe angei ekkewe pwon an ewe Chon Amanau. A apasa, “Ra feioch ir ekkewe mi nimenimoch non netiper: pun repwe kuna Kot.”⁶

Nupwen sia pwarano pwe kich nenien appirun chon nuku non kapas, non poraus, non tong ennet, non ngun, non nuku, me non unusoch, sipwe tufichin winiti saram ngeni fonufan.

Ouse mochen upwe apasa ngeni ami meinisin, akkaewin ngeni ekkewe serafo, pwe nupwen ewe fonufan a touaueno seni ekkewe nongonong me emwen minne Semach won Nang a ngenikich, sipwe pwarikicheno me nein ewe mwichen aramas pokiten kich mi sokkono Sipwe pwarikicheno pokiten sia ufoufoch. Sipwe sokkono pokiten sise aea kapas pochokun me pokiten sise angei mettoch epwe efeingawa inisich. Sipwe sokkono pokiten sise aea kapas pochokun me kapasen efeingawa. Sipwe sokkono nupwen sia finata pwe ekiek esap ur ren mettoch sia katon mi ngaw me efeingawa minne ewe Ngun epwe tou seni imwach me manauach. Sipwe ennetin pwano nupwen sia finioch non pekin fofforun wenechar—minne mi wewe ngeni nongonongen ewe kapas allim. Ekkewe mettoch ra fori ach sipwe sokkono seni napengeni minen fonufan a pwan awora ngenikich ewe saram me ewe ngun minne epwe tineno non fonufan mi napeno kirochun.

Fan ekkoch a weires ach sipwe sokkono are sipwe anamon non eu mwichen aramas. Ina feitiwan pwe sipwe niuokusiti met ekkoch repwe ekieki are apasa. Ekkewe kapasen Konupin mi awora kinamwe: “Ewe Samon I ai saram o ai chon amanau; usap nuokusiti emon? ewe Samon I pochokunen manawei; I minne upwe nuokusiti?”⁷ Nupwen sia fori Kraist pwe epwe urenapen non manauach, ach nuoukus repwe ekkesiwin ren ewe tipepochokunen ach mochen.

Ese wor emon neich a unusoch manauan, me fan ekkoch ekkewe osukosuk me weires sia mesengeni ra pworacho ngenikich, ra for an ach saram epwe eiekunukun. Iwe nge, ren aninis seni Sam won Nang, fiti aninis seni ekkoch, sia tongeni angeisefanni ena saram minne a asarama sefanni ach an me epwe awora saram ngeni ekkoch mi anamwota.

Ne awewei, ua chiechi ngenikemi won ekkewe kapas monomon mi ku netip ua anneani fitu ier a no:

Pwii me fefinei kana, ach tufichin saram a nom neich iteitan ran, non met chok sia fori. Nupwen sia appiru fofforun ewe Chon Amanau, sipwe tufichin winiti saram non manauen ekkoch, ika repwe pwisin chon ach famini me chienach kewe, chienach chon angang, ekkoch sia sinei ekkis chok, are aramas sise mo sinei.

Ngeni emon me emon ami, ua apasa pwe en emon noun Semach won Nang at are nengin. Oua feito seni fan Mesan ne nonnom won ei fonufan ren och fansoun, ne pwarano tongen ewe Chon Amanau me an kewe afanafan me tineno om saram pwe meinisin repwe kuna. Nupwen ena fansoun won fonufan a mucheno, ika oua fori wisemi, oupwe feiochun niwinsefanita ren I feinfeino chok.

Mi fakkun apochokun kapasen ewe Chon Amanau: “Ngang ewe saramen fonufan: Ion epwe tapweto muri epwe kuna ewe saramen manau, iwe esap tongeni fetan non kiroch.”⁹ Ua pwarata usun I. I ach Chon Amanau me Chon Angaseno, ach Chon Peni ren ewe Sam. I ach Nenien Appiru me ach pochokun. I “ewe saram a tineno non kiroch.”¹⁰ Amo pwe meinisin mi tongeni rongorong mongungui oupwe pwon ne tapweno mwirin I, me oupwe winiti saram ngeni ewe fonufan, ina ai iotek non Itan mi pin, ewer Jises Kraist ewe Samon, amen.