Ke mo Okesiu e Llomes

Rodam ma rodos, ng mera lungil a rengud el lemuut el me obengkemiu. Ko medengei, ke er dilak er a April, e chelechang eng meral mekngit a rengud er a remla remiid el tedei el Apostol: President Boyd K. Packer, Elder L. Tom Perry, and Elder Richard G. Scott. Te mla lmuut el mora belurir ra babeluades. Ke de meral oureng er tir. Ng mera lungil a rengud er tir el milechei a okesiu el oubeltikereng el diua Kristo ma ulekrael el olsisechakl el dolab er chelechang.

Kede kmal mengemedaod er tirka el beches el Apostol, Elder Ronald A. Rasband, Elder Gary E. Stevenson, and Elder Dale G. Renlund. Tirkang a chad el kmal blak a rengrir er a urerel a Rubak. Te kmal sebechir el mo ngmai a ikal meklou a ultutelel el ngerachel el blal mokedong el mo er ngii.

A kmal dirk, milenguiu e omdasu a tekoi er a chedaol llechukl, ea teblo el bades a kmal dirk kulatk. Aika el bades a dodengei. A kot a ngar sel Osisecheklel Osobel er a le ngara Bukl. “Ma llemesiu a kirel ua isei el dmiich er mederir a rokui el chad, me te mo mes a ungil tekoi el moruul, e mo odengesii a Demmiu el ngar a babeluades.¹ Sel ongeru el bades a mlei er a uldesuek er a kumtab er a belkul sel mle kot. Tiang a Babilengel a Apostol Paulus el mora Timothy: “Bo lungil a blekerdelem me losuub er kau a ruumerang, a tekoi el molekoi, cheldecheduch, ma beltikerreng er kau, ma blakerreng er kau er a ngerchelem, ma klikiid el klechad er kau.”²

A kumera el kmo sel ongeru el bades a smodii, a telkib, er a rolel e kede kudmeklii sel kot. Ke de mo ungil okesiul a roumerang sel de kiei el oltirakl ra ebangkelio er a Jesus Kristo lokiu dolekoi el tekoi, cheldecheduch, ma beltikerreng, ma klaumerang, ma klikiid el klechad er kid. Sel doruul el uaisei, ea llemesed a mo medidiich ma rechad a sebechir el mesang.

Bek el chad el mlei er tial beluulechad a ngiluu a Llomes er a Kristo. Mesel dosuub er a okesiul Osobel e kiei el di uai Ngii e oltirakl a osisecheklel, e sel llomes a mo kmard el ngara chelsed el ngii a mo omekellomes er a rebebil.

A Apostl Paulus a liluches a elolem el blekerdelir a roumerang, blekeradel el ngii a mecherei tial llomes meng dmiich. Ka me domes er a derta er a ikang.

Ak millekoi er a ikel kot el erung el blekeradel el dmak—el ngii a okesiu er a tekoi ma omengedecheduch. A tekoi el dousbech a sebechel kmidr a reng e omekrael, malechub eng sebechel melemall e oltuub. A beluulechad er chelechang a kmal uldirekork er a sius el uai a le dil iliuekl er kid. Ng meringel el diak lak derengesii a ngklel a Dios el meterekakl er ngii. A mekngit lomelekoi a mla mo siukang er a tv, movie, hong, ma chelitakl. A lometech el tekoi a otuub ma odechelakl. Mei e do ngedecheduch er a rechad loba beltikelreng ma omengull, e blechoel lolab a ungil tekoi e mengoit a tekoi el ngii a mo melemall. Mei e bo doltirakl er a okesiul Osobel, el milngedecheduch loba kllouelreng ma blekokouii er sera losiou.

Sel kuk imong er a blekeradel lolekoi er ngii a Paulus a dmolech el beltikelreng, el ngii a belkul a klikiid el beltikelreng er a Kristo.³ Ak medengei el kmong ngarngii tirkel ngar bita er kid el tir a sabisi, ma resmecher, ma remerta rengrir. Me kid a oba techall el mo olngeseu er tir e meruul a rengrir el moungil. A Osobel a milsterir a urungulir a re diak a urungulir ma klisiich el mora remechitechut. Ngulmekungil er a resmecher, e rirterir a sechudel mo merael, meuiko el mo omes, mechad el mo orrenges. E dirrek el ulkisii a mla mad. Sel rokir el temel er a losiou eng mlo odersii loba beltikelreng el mor tikel ngesool. Me sel dosuub er a okesiul, e kede mesterir a klengeltengat a rechad, me kid el dirrek.

Sel kuk imong, a kired el moungil okesiu er a ungil reng. A belkul rengak a kmo ke demelasem el morngii er a klengar er kid a blekokouii, omereng el saul, klausubes, e ungil ra rechad. A ikal tekoi a mo meskid a reng el ngii a mo remutech a klengar er tirkel iliuekl er kid. Ng mle techellek er a ikal betok el rak el mo obengterir a rebetok el chad el tir a oba chouai tia el reng. Ke de moungil a rengud sel dobengterir, el le te rullid el soad el mo ta er tir e moltirakl er tir. Kede mesa Llomes er a Kristo el ngar tir e ngosukid el mo omelchesiu er a beltikelreng er Ngii el mei er kid.

A mo olechotel tial llomes el ngii a morngii lokiu a klikiid e ungil reng el bolesang a rechad, e a kmo ouchais er kemiu a tekoi el dilubech er a meketeketang.

Seikid el taem, ea roungerachel er a Ikelesia a mlo omes er a re official er a Jerusalem el kirel a telbiil er a lengil a chutem el bol dechor er ngii a Church Jerusalem Center. Ma ngeiul a kengei el kirel tiang, ea Ikelesia a mlo kongei me tirkel chedad el mo kiei er tial center a mo diak lomerk ra ebangkelio. A uriul er a le meruul tial telbiil, e a tara official er a Israel, el ngii a ungil medengelii a Ikelesia ma rechad er ngii, e millekoi el kmo ng medengei el kmo a Ikelesia a mo mengull er tial telbiil el mo diak lomerk er a ebangkelio. “Engdi,” ng millekoi, el kirir a rengalek er a skuul er ngii, “e kid a mo mekera er a ikal llomes el ngara mederir?”⁴ Mei me tial tokubets el llomes di bol diich er a chelsed, me bol lesang e bol sorir a rebebil.

A mo ungil okesiul a klaumerang a belkul a kmo kede oumerang er a Rubak ma tekingel. Ng belkul a kmo kede obang e omekeroul a doumerang meng me bol omekrael a uldesued ma omerelled. A klaumera er kid ra Rubak el Jesus Kristo ma Demad er a Babeluades a mo mengetikaik a doruul. Meng iliuekl er kid a rraureng er chelechal beluulechad, klautok ra reng, me a ringelel a klengar, e sel uaisei e a klaumerang el dobang a mo otil a klengar er kid. A klaumerang me a oumededenger a diak el sebechel dmak er a tal uldasou er a osisiu el taem, e le a tang a choridii a chimong. Me ak momelekl a ikel blechoel lolekoi er kid—el kmo a rolel e kede monguu e obang a klaumerang el dousbech er ngii, eng klou a ultutelel donguiu e dosuub e domdasu a chedaol llechukl. A omengedecheduch lobengkel a Demad ra Babeluades lokiu a nglunguuch a klou a ututelel. Ng diak el sebeched el chemoit a ikang, e le a cherarou a diak a ulengellel losiik a chelitechetud, ma merael mo kekerei el blakelreng er kid. A Rubak a dilu el kmo dosiik el blak a rengud, blechoel meluluuch, e di oumerang, e a rokui el tekoi a di moungil kired.⁵

Sel mong meng ulebongel, eng kired el mo klikiid, el belkul a kmo ng klikiid a bedenged, uldesued, ma rengud. Kede medengei el kmo a bedenged a templo, el kired el mengedmokl er ngii loba omengull. A uldesued a kirel mui er a ungil uldasu e mengeroid er ngii ra ikel tekoi el ngii a mengidokel. Alsekum me kede mo obang a Chedaol Reng el blechoel lobengked, eng kired el klikiid. Rodam ma rodos, a klikiid a meskid a budech er a uldesued el ngii a techelled el monguu a yaksok er a Osobel. Ng dilu el kmo, “Te ngeltengat a re klikiid a rengrir: e le te mo mesang a Dios.”⁶

Me sel bocha de meues el okesiu er a roumerang lokiu a tekinged, cheldecheduch, ma bltikerreng, ma ungil reng, ma klikiid el klechad er kid, e kede mocha sebeched el llomes el mora beluulechad.

Mei e kdu er kemiu el rokui, tokuni a rengeasek, el kmo a beluulechad sel lorael el mengal mo cheroid er a osisechakl ma kerbai el bileskid a ungil Edam er a Babeluades, e kid a mo ileakl er a delongelir a rechad e le kede ngodech. Kede ileakl e le a biled a di hutsu. Kede mo ngoded eleng diak dolius e diak dolai a mekngit el klalo el mei ra bedenged. E mo ngodech e le kid el diak el mekngit a ngellekeld e diak doltuub. Kede mo ngoded sel de tibir el diak domekeek a uldesued er a ikel ngii a lolilt el osengelel a buai el ultuil er a otuub el ngii a mo choridii a Chedaol Reng el ngara rekeblid ma klengar er kid. Me kede meral mo ileakl sel doliit el kirel a klengar—omelilt el ngii a bedul osisechakl er a ebangkelio ma kerbil. Aikel ngii a rullid el ngoded er a rebetok er tial beluulechad a dirrek el meskid seikid el llomes me sel reng el ngii a mo dmiich er a di merael el mo milkolk el beluulechad.

Ng blechoel el meringel a bo dengodech er a rebebil sel dil kid el tang el dechor er a delongelir a rebetok. Ng diak el ngodech alsekum me kede medakt a lomdasu malechub a bo lolekoi a rebebil. Ng suumech a rengud a tekoi el ngara Psalm: “A Rubak a llemesek e osebelek; ng techa bok medakt er ngii? A Rubak a klisichel a klengar er ngak; ng techa bok medakt er ngii?”⁷ Sel denguu a Kristo el mo kot er a klengar er kid, e a dekted a bol btechir lokiu a duchelreng er a blakelreng er kid.

A klengar a diak el cherrungel el mei er a ta er kid, e sel bebil ea ongarm ma ringel el de chelbangel a kmal mo oberaod, meng kekeringii a llemesed. Engdi, ngokiu a ngeseu er a Demad er a Babeluades, lobengkel a ngesou er a rebebil, eng sebeched el muut el nguu tial llomes el ngii a lmuut elmo meklemesii a roled e mesterir a llomes el mora rechad lousbech.

A cholechotel tiang, e ak mo chouchais er a tekoi el kmal rutechii a rengud el el ngara soak el llechukl el blek kot el chemuiu er a betok el rak ra mla memong:

Rodam ma rodos, a techelled el mo llomes a iliuekl er kid ra bek el sils, er a ngii di el teletael el de ngarngii. Me sel doltirakl er a okesiul a Osobel, e kid a morngii a techelled el mo omekllomes er a klengar er a rebebil, ma locha rechad ra blid, resechelid, de dak loureor, de kaudengei el chad, ma re diak.

Mo er a derta er kemiu e a kmu er kemiu el kmo kau a ngelekel sechal ma redil a Demad er a Babeluades. Kau a ulebengkel el mla er sei e mlei er tia el beluulechad el ngarngii a telutk el temem, el kau a mo olechotel a beltikelreng er a Osobel me a osisecheklel, e mo bekeu el mecherei a llemesem meng dmiich ma rechad a mesang. Sel bol merek sel belsechem el ngara beluulechad, alsekum me ke mla rulii sel telutk el urerem, e sel bom nguu a klebokel el klengeltengat el kau a lmuut el mo kiei lobengkel el mo cherechar.

Ng meral mo klou a rengud er a tekingel a Osobel: “Ngak a llomes er a beluulechad: ngikel oltirakl er ngak a diak lorael er a ilkolk, ng bai mo oba llomes er a klengar.”⁹ Ma kuuchais el Kirel. Ngii a Osobeled e Olsobel, e Olngeseu lobengkel a Edam. Ngii a Okesiu e klisiched. Ngii “a llomes el dmiich er a ilkolk.”¹⁰ A derta er kid el rongesii a ngerek bo lolilt el mo oltirakl er Ngii, me bol diich el lomeklomes er a beluulechad, a nglunguchek a ngara chedaol Ngklel, el ngii a Jesus Kristo el Rubak, amen.