Wia mehn Karasaras oh Kamarain

Riei ohl akan oh lih akan, meid mwahu ei pwurehng patehng kumwail. Ni amwail esehier, sang ni atail ehupenehr nan Epreilo, kitail ahniki pahtou pwehki kepelsalehdalahn riatail Wahnpoaron silimenko: President Boyd K. Packer, Elder L. Tom Perry, oh Elder Richard G. Scott. Irail pwuralahngehr nan soanerail nanleng. Kitail loaloidkin irail. Soangen atail kapingki arail karasaras kan ni arail kasalehda duwen limpoak en Krais oh padahk kesemwpwal akan me irail pwilikihdieng kitail.

Se kasamwo atail Wahnparon kapw akan iei Elder Ronald A. Rasband, Elder Gary E. Stevenson, oh Elder Dale G. Renlund. Ohl pwukat loaloapwoat ehng arail doadoahk en Kauno. Irail warohng alehdi pwukoah kesemwpwal pwukat me re malipilipdahngehr loale.

Ansou kis samalahro, ni ei wie wadewadek oh medemedewe iren pwuhk sarawi kan, iren padahk riau me I koledi. Kitail wewehkier ire pwukat. Keieun padahko wia kisehn Padahk en pohn Nahnao: “ahmwail marain en sansal mwohn aramas pwe re en kak kilang amwail wiewia mwahu kan oh kapikapingahki Samamwail me ketiket nanleng.”Keriaun iren pwuhk sarawio iei ehu me I tamanda ni ei wie medemedewe wehwehn keieu en iren padahko. E kohsang nan nein Wahnparon Paul kisin Likou ong Timothy: “… ke en wia mehn kahlemengih ehu ong irail kan me pwoson, ni omw koasoi, [ni limpoak mehlel, ni palingehn, ni pwoson, ni mwakelekel].”²

I kamehlele me keriau en iren pwuhk sarawio kawewehier, ni pali laud, duwen atail kak kapwaiada keieu en iren padahko. Kitail kasalehda karasaras mwau sang ni atail wia souleng mehlel kei ni atail momourki rongamwahu en Sises Krais ni lokaia, ni koasoai, ni limpoak mehlel, ni palingehn, ni pwoson, oh ni mwakelekel. Ni ansou me kitail wia met, marainpatail pahn marainpeseng ong mehteikan en kilang.

Emen emen kitail ahnikier Marain en Krais ni atail kodohng sampah. Ni atail kin idawehn karasaras en Sounkomouro oh momourki Eh mour oh dahme E padahngkier, a maraino pahn kin okoahk nan loaletail kan oh pahn kamarainiada mehteikan.

Wahnparon Paul kairekehdi mehn kahlmengi weneu en souleng mehlel men, me mehn kahlmengi pwukat me pahn kak elehiong atail marain en marainpeseng. Kitail tehk mahs ehu ehu mehn kahlmengi pwukat.

I kapatapene mehn kahlmengih riau—me wia karasaras en ni lokaia oh ni koasoai. Lepin lokaia kan me kitail kin doadoahngki kin kak sewesehda oh kamarain, de irail kin kak kamedekehla oh kaluwetehla. Nan sampah rahnwet tohtohlahr lokoia sued me kapil kitailpenehr kerenieng nan wasa kan koaros me kitail kohla ie. E apwal ken sohte rong mwaren Koht ah kin kalap doadoahk pwehki sang ni soukautih oh laumwoahmw. Lokaia sohte mwau kan mwomwen wialahr kisehn kasdo kan, pwuhk kan, oh koul kan. Kaweliali en lokaia kansensued kan oh koasoi kelingeringer kan. Kitail koasoieng mehteikan ni limpoak oh wahu, nantieng kihla koasoi mwahu oh dehr doadoahngki lokaia kan de koasoi kan me pahn kamedek de kansensued. Kitail song nantieng idawehn karasaras en Sounkomouro, me kin ahniki kanengamah oh kadek nan Eh mahsen kan nan ereihn ansou me E wie padpadahk seli.

Pil ehu mehn kahlmengih me Paul koasoia iei limpoak mehlel, me kawehwehpe iei “limpoak mwakelekel en Krais.”³ I kehn ni ei ese me miehte irail akan nan atail wasahn kouson akan me kin ahniki loaloid, irail akan me soumwau, oh me solahr arail koapwoaroapwoar. Kitail ahniki ansou mwahu en sewese irailda oh kakehlakahla palingenerail kan. Sounkomouro ketikihdo kopworopwor ong irail me sohte arail koapwoaroapwoar oh kehl ong irail me luwet. E kamwahuiala me soumwahu; E sewesehda me mwator ren kakala alu, me masukun en kilangada wasa, me salengopon en rongada wasa. E pil kamaurada me mehla. Nan ereihn Sapwellime rongamwahuo, E sewesehda koaros me kin anahne sawas sang ni limpoak mehlel. Ni atail pahn idawehn Sapwellime karasaraso, kitail pahn kapaiada mour en mehtei kan iangahki pein kitail.

Kitail pil anahne kasalehda karasaras mwau ni atail wiewia kan. Ong ie, e wehwehki me kitail en nantiheng atail mour en ahniki kadek, karkarahk, mahk, oh ineng en sewese mehteikan. Mepwukat pahn kieng kitail ngehn ehu me pahn sair mour en irail mehn mpatail kan. I ahnikiher ansou mwahu nan ahi mour ien patehng aramas tohto me ahniki soangen ineng wet. Kitail ahniki soangen pepehm mwau ehu ni atail kin patehng irail, pepehm ehu me kin wiahng kitail en kin men patpatehng irail oh idawehn arail karasaras kan. Irail kin kasalehda Marain en Krais oh seweseikitail en kehn Sapwellime limpoak ong kitail.

Pwehn kasalehda duwen marain me kin kohdo sang aramas emen me kin ahniki limpoak mehlel ni mehteikan a kin kasawiada, I men ehukiheng kumwail kemwekid ehu me wiawihier pahr kei samwalahro.

Nan ansouo, kaun kan en Mwomwohdiso wet patehng lapalap akan nan Jerusalem pwe ren pwungkipene kisin likou en sahpw me pahn mweidada Mwomwohdiso en kauada Jerusalem Center. Pwehn kak alehdi mweimwei wet, Mwomwohdiso anahne pwungkihla me sohte kalohk pahn wiawi sang irail towe kan me pahn kouson wasau. Mwurin pwungpene ah wiawihier, emen lapalap en Israel ko, me wehwehki mwahu duwen Mwomwohdiso wet oh towe kan, apw koasoia me e ese me Mwomwohdiso pahn wahuniki koasondi me wiawihero me pid duwen sohte kalohkseli. “Ahpw,” ni eh koasoia duwen tohn sukuhl kan me pahn kin kohla wasau, “a dahme kitail pahn wiahng duen marain me miher nan meserail ko?”⁴ Pwe marain kaselel wet en kak pil kamaraihni kitail pwe mehteikan en kak kasawiada oh kapkapingki.

En wia karasaras en pwoson wehwehki me kitail en likih Kauno oh Sapwellime mahsen. E wehwehki me kitail kolokolehr oh kitail en kakeirada lamalam akan me pahn kak kaweid atail madamadau kan oh atail mwekid kan. Atail pwoson Kaun Sises Krais oh Samatail Nanleng pahn udahn katapan ong mehkoaros me kitail kin wia. Nan sounpar me kitail mihmier loaleht sang ni sawewehkan, sohte pwungpenehn koasondih kan, oh koasonsued en ehu ehu rahn akan me elehdahr pwoson ah wiahla mehkot ehu me kitail anahne nantieng kolokol nan atail mour. Tamataman me pwoson oh peikasal sohte kak pwarada ni madmadau ehute nan ansoutehkis, pwehki ehu pahn kaluwetehla ehu. I kapwurehiong dahme kitail rongehro—pwe kitail en kak en alehda oh kolokol pwoson me kitail anahneo, e kesempwal kitail en wadek oh onopki oh medemedewe iren pwuhk sarawi kan. Koskosoieng Samatail Nanleng ni kapakap inenen kesemwpwal. Kitail sohte kak en pohnsehsehla soahng pwukat, pwehki imwintihtio oh irail ko me kin ieiang ih kin raparapahki en kawehla atail mehn ser akan, atail pwoson pahn tikitikila. Kauno ketin mahsanih, “Ngoangki rapahki, kapakap ansou koaros, oh kamehlele, oh mehkoaros ahpw pahn doadoahkpene ong kamwahupemw.”⁵

Keimwsekala, kitail pahn ahniki mwakelekel, me wehwehki kitail en mwakelel ni paliwar, madamadaw, oh ngenetail. Kitail ese me paliwaratail iei tehnpas sarawi ehu, en epwel ni meleilei oh wahu. Atail madamadau en audaukihda lamalam kan me kin kakehlailiada kitail oh kihsang kitail sang soahngkan me pahn kasaminehla. Pwe kitail en kak ahniki Ngehn Sarawi en wia kempoakepatail, kitail anahne warohng. Riei soulengko, mwakelel pahn wahdohng kitail meleilei oh kahreiong kitail en warohng alehdi sapwellimen Sounkomouro inou kan. E masanih, “Meid pai me [ahniki mohngiong] mwakelekel: pwe re pahn udiahl Koht.”⁶

Ni atail pahn kasalehda karasaras mwau sang ni lokaia, ni koasoai, ni limpoak mehlel, ni wiewia, ni pwoson, oh ni mwakelekel, kitail pahn warohng en wia marain pen sampah.

I men koasoaieng kumwail koaros, oh mehlel ong kumwail me pwulopwul kan, me ni sampah eh pahn mwekimwekid wei sang ni kosondi pwung oh mehlel kan oh kaweid kan me kodohng kitail sang Sahmo Nanleng me ketin limpoak, kitail pahn sansal nan pwungen pokon en aramas pwehki kitail sohte duweirail. Kitail pahn sansal pwehki kitail kin likouda mwahu. Kitail pahn weksang irail pwehki kitail sohte kin doadoahngki lokaia suwed oh pwehki kitail sohte kin kang soahng kan me keperieng paliwaratail. Kitail pahn weksang irail pwehki kitail sohte kin koasoia kosoi sohte katepe me wia mehn kaperen mwahl oh kaweid sapwung kan. Kitail pahn weksang irail ma kitail pahn sohte pilada kitail en audaudkihda mehn kepehse kan me pahn kasaminehla oh pahn kak kahrehieng Ngehno ah pahn sohla mih ni imwatail kan oh nan atail mour. Kitail pahn udahn sansal ni atail pahn wiada atail pilipil nin duen me pwung—pilipil kan me pahn pahrekieng kaweid kan en rongamwahu wet oh kosondi teikan. Soahng ko me kin kahrehda atail weksang palilaud en tohn sampah pil kin eledohng kitail maraino oh ngehno me pahn kasalehda lipwalipw mwahu nan sampah me dihp kadirelahr.

E kin apwal en weksang mehteikan oh uhkihda dahme kitail kamehlele. E wia pepehm ehu en masak dahme mehteikan pahn medewe de nda. Kosoi en kameleilei iei ire sang nan Melkahka kan: “Kauno iei kamarainpei oh komourpei; ihs me I pahn masak? Kauno iei kehlepen ahi mour; ihs me I pahn masak?” Ni atail pahn wiahki Krais poahsoan en atail mour, eimah en dahme pwung oh mehlelo pahn weliandi atail masepwehk kan.

Mour e sohte unsek ong emenemen kitail, oh ekei ansou kahpwal akan me kitail kin lelehng pahn kin udahn laud, kahrehiong atail marain ah pahn kin tikitikila. Ahpw, sawas sang Samatail Nanleng, kapatahieng utuht sang mehteikan, kitail kak pilehu alehdi maraino me pahn kamarainiada pein atail ahl oh sawaskihda maraino me mehteikan anahne.

Pwehn kawehwehda, I men ehukiheng kumwail koasoai kei me inenen sair ahi lamalam duwen ehu lepin kaweid kaselel me I tepin wadek sounpar tohto kei samwalahro.

Riei ohloko oh lihoko, atail ansou mwahu en kapilkin kitail marain nan ehu ehu rahn, ni sohte lipilip en kahpwal me kitail pahn lelohng loale. Ni atail pahn idawehn karasaras en Sounkomouro, kitail pahn ahniki ansou mwahu en wia mehn kamarain ong mour en mehteikan, ma re wia pein atail peneinei oh kempoakpetail kan, iengetail tohndoadoahk kan, irail kan me kitail apwtehn tuhwong, de aramas en kohdo kan.

Ong emenemen kumwail I nda me kowe sapwellimen Samatail Nanleng mwahnakapw de peihnakapw. Ke kohdosang Reh pwe ken mih pohn sampah ansou kis, pwehn kasalehda limpoak en Sounkomouro oh sapwelime padahk kan, oh mweidehng amw marain en sansal mwohn aramas akan. Ni ansou me rahno pahn imwisekla pohn sampah, ma kumwail wiahdahr amwail pali, amwail kapai pahn udahn kaselel en pwurala kousonla Reh kohkohlahte.

Ia wen mwahu en sapwellimen Sounkomouro mahsen kan: “Ngehi kamarainpen sampah: meh men me pahn idawehn ie sohte pahn alu nan rotorot, ahpw pahn ahniki marain en mour.”⁹ Oh met me I kadehdeki Ih. Ihme atail Sounkomour oh Soundor, Soun Sawasapatail rehn Samatailo. Ihme atail Kaun oh atail kehl. Ihme atail “marain me kamarainda nan wasa rotorot.”¹⁰Pwe emenemen kitail me rongorong ngilei en kak iang inoukihdi en iang idawehn Ih, wiahla marain lingaling ong sampah, iei ahi kapakap ni Mware me sarawi, iei Sises Krais atail Kaun, amen.