Katohrehla Ansou ohng Soundor

Ehu ansou en Krismas kerendohng kitailehr oh iangahki tepin ehu pahr kapw. E mwomwen me dene aiohte me kitail katkataman ipwidien Soundor oh wiahda atail inou kan.

Nan pwungen atail inou kan ohng nan pahr wet, mie inou kitail wiahda kitail en katohrehla ansou oh kaunopada wasa nan atail mohngiong kan ohng Soundor? Mendahte iawen laud en atail kapwaiahda dahme kitail inoukihdao, I kamehlele me kitail koaros men wia mwahu sang wen me kitail wiahier. Nan Krismas wet wia ansou mwahu kitail en tehkada mwahu oh weliakapw atail wiewiahkan.

Nan atail mour, soahng kan koaros me kin kedkedirapwai kitail, e inenen kesemwpwal kitail en wiahda de wia wen atail kak koaros kitail en wahdo Krais nan atail mour oh nan imwatail kan. Oh e inenen kesemwpal kitail, en duwehte Ohl Marain ko sang Pali Mese, me idawehnte Sapwellime usuo oh “kohdo pwe en pwongih ih.”¹

Sang ni kadaudok en dih kan sang mahs, sapwellimen Sises mahseno duweduwehte. Ohng Piter oh Andru pohn oaroahr en Kalili, E mahsanih, “Kohdo idawehnie.”² Ohng Pilip e mahsanih, “Kohdo idawehnie.”³ Ohng Lihpai ‘me wie mwomwohd nan eh ohpiso’ kaweido patohwen, “Kohdo idawehnie.”⁴ Oh ong kowe oh ngehi, ma kitail rong mwahu, songen luhk ohte me pahn kodohng kitail: “Kohdo idawehnie.”⁵

Ni atail pahn idawehn Sapwellime kaweid kan en rahnpwukat oh ni atail pahn idawehn Sapwellime karasaras kan, kitail pahn ahneki ansou mwahu en kapaida mour en ekei aramas. Sises ketin lukei kitail en idawehnla ni unsek: “Kilang, Kauno kin ketin kupwuriki mohngiong oh madamadau kan me kin inengieng.”⁶

Mie aramas me komw anahne sewesehda nan Krismas wet? Mie aramas me awiawih pwe ken pwerla reh?

Sounparkei samwalahro I mwemweit en Krismaso lahng ni imwen lihemen me ah pwoudo melahr. Ni ansou me I mihmi mwo, leteleto pa wiawi ni wenihmwo. Toahkte ndand oh kedirepw men me keskesihnen ni wenihmwo. Sohte me eker; ahpw, e pehmada me e anahne kohla oh tuhweng soumwahu men me kin kelkelehpw.

Nan ansou wet, mohngiong en irail kan me kin kelkelehpw kin anahne en mie aramas me pahn pwaralahng irail nan Krismas. Ehu Krismaso ni ahi wie mwemweitih wasahn sewese aramas mah kan, I mwohndi oh koaskoasoaieng lih mah limmen, me keieu mahu sounpar epwiki ehu. Liho masukun, ahpw e tamatamante ngileie.

“Pisop, pahret komw ekis pwand!” liho nda. “I wiahki me komw solahr pahn kohdo.”

Kiht eri ahniki ehu ansou mwahu pene. Emen soumwahuo, ahpw, kilkilengieila likin wenihmw toko oh kin kapwkapwurehiong, “I ese me nei pwutak pahn kohdo oh kilangie rahnwet.” I men ese ma e pahn kohdo, pwe mie ekei ansoun Krismas me e sohte kohdo douluhl.

Nan pahr wet miehte atail ansou en patohwenda sawas, mohngiong mwahu, oh ngehn en men sawas—pwe kitail en kak idawehn karasaras en atail Soundor oh kitail en kak pahpa nin duwen me E ketin kupwuriki kitail en papah. Ni atail kin papah Ih, kitail sohte pahn kawuhdi atail ansou mwahu, me duwehte aramas me kin kihda sawas mahs,⁷ en katohrehla ansou ohng Kauno nan atail mour oh kaunopada wasa nan atail mohngiong ohng Kauno.

Kitail kak wehwehki kesemwpwal en inou me audehda mahsen me tohnlengowiahiong soun silepen sihpwko: “I wadohng kumwail rongmwahu en popohl laud. … Pwe me ipwidi ong kumwail rahnwet … Soundor, iei Krais atail Kaun”?⁸

Ni atail kin kaweliali kisakis kan nan Krismas, kitail en kin tamataman, kapingki, oh alehdi kisakis me keieu laud sang kisakis koaros—iei kisakis en atail Sounkomour oh Soundor, pwe kitail en kak ahniki mour soutik.

“Eri ia pahn katepen kisakis ehu ohng aramas emen ma e pahn kohieng, oh e ahpw sohte alehdi kisakiso? Kilang, e sohte kapingki me kohiengo, e pil sohte kaping kalahngan ohng aramas me kiskiseo.”⁹

Kitail en idawehn Ih, papah Ih, oh wauniki Ih, oh alehdi kisakis kan nan atail mour me sang Reh, pwe kitail en, sang ni mahsen kan en Pahpa Lehi,” audaudkihda sapwellime limpoak poatoapoat.”¹⁰