Thawj Pawg Thawj Tswj Hwm tsab Xov, Ob Hlis Ntuj 2016
Tsaws Tau Zoo Thaum Raug Kev Kub Ntxhov
Tsis ntev tas los kuv tus poj niam, Harriet, thiab kuv nyob ntawm tshav dav hlau saib cov dav hlau tsaws. Hnub ntawd cua hlob heev, thiab cua tshuab nplawm cov dav hlau uas tab tom tsaws, ua rau txhua lub dav hlau tig rau ub rau no thiab tshee tshee thaum cov dav hlau pib tsaws.
Thaum wb pom huab cua thiab lub dav hlau sib tawm tsam, ua rau kuv xav txog thaum kuv kawm ua ib tug kws tsav dav hlau thiab cov ntsiab cai uas kuv tau kawm—ces tom qab ntawd kuv tau qhia rau lwm tus kws tsav dav hlau.
Yav tas los kuv tau qhia lawv hais tias, “Tsis txhob siv zog tswj kav cov twj tsav dav hlau thaum co co. Muaj siab tu tu; tsis txhob muaj siab kub. Tsom ntsoov rau txoj kab nruab nrab ntawm tshav tsaws dav hlau. Yog tias nej ua yuam kev tsis raws txoj kev ncaj qha raws li nej xav, cia li ua tib zoo kho nej txoj kev sai sai. Cia li tso siab rau nej lub dav hlau. Nyob ruaj khov mus txog thaum tsis co co lawm.”
Cov kws tsav dav hlau uas twb tsav dav hlau ntev lawm to taub hais tias lawv tswj tsis tau txhua yam uas tshwm sim nyob ib puag ncig lawv. Lawv ua tsis tau kom dav hlau tsis co co. Lawv ua tsis tau dab tsi kom tsis los nag los sis tsis los daus. Lawv ua tsis tau kom cua tu los sis tshuab mus rau lwm qhov chaw.
Tiam sis lawv kuj to taub hais tias lawv ua yuam kev yog lawv ntshai qhov uas dav hlau co co los sis ntshai cua hlob—thiab qhov tseem ceeb yog lawv tsis paub ua li cas thaum muaj li ntawd. Yog yus xav tsaws dav hlau kom puaj phais thaum muaj xwm txheej tsis zoo ces yuav tsum tsav kom raws txoj kev yog thiab ya mus kom ncaj qha li yus ua taus.
Thaum kuv saib cov dav hlau tsaws zuj zus thiab xav txog tej ntsiab cai uas kuv tau kawm thaum kuv yog ib tug kws tsav dav hlau, kuv tau xav tias tej zaum muaj ib zaj lus rau peb kawm txog peb lub neej niaj hnub nim no.
Peb yeej tswj tsis tau cua daj cua dub uas peb raug nyob rau hauv peb lub neej. Tej lub sij hawm muaj tej yam uas tsis zoo li peb xav. Tej zaum peb xav tias kev poob siab, kev ntshai, kev ua xyem xyav, kev tu siab, los sis kev txhawj xeeb yeej zoo li cua daj cua dub uas nplawm peb thiab ua rau peb co co.
Thaum lub sij hawm zoo li ntawd, yeej yog ib qho yooj yim xav txog txhua yam uas mus tsis zoo thiab xav ntsoov txog peb tej teeb meem xwb. Peb raug ntxias kom tsom ntsoov rau peb tej kev sim siab thiab tsis tsom ntsoov rau tus Cawm Seej thiab peb zaj lus tim khawv txog qhov tseeb.
Tiam sis ua li ntawd tsis yog txoj kev zoo tshaj plaws kom kov yeej tej teeb meem nyob hauv lub neej no.
Ib yam li tus kws tsav dav hlau uas muaj txuj ci heev tsis tsom ntsoov rau cua daj cua dub thiab tsom ntsoov rau qhov nruab nrab ntawm txoj kev tsaws, peb kuj yuav tsum tsom ntsoov rau lub ntsiab ntawm peb txoj kev ntseeg—peb tus Cawm Seej, Nws txoj moo zoo, thiab peb Leej Txiv Saum Ntuj Ceeb Tsheej txoj hau kev—thiab peb lub hom phiaj tseem ceeb tshaj plaws—kom rov qab mus nyob saum ntuj ceeb tsheej. Peb yuav tsum tso siab rau Vajtswv thiab rau siab tsom ntsoov rau kev ua ib tug neeg ntseeg. Peb yuav tsum tso siab plhuav thiab tsom ntsoov rau kev ua neej raws li qhov yog.
Qhov uas peb qhia Leej Txiv Saum Ntuj Ceeb Tsheej hais tias peb ntseeg thiab tso siab rau Nws thaum peb zoo siab ua raws li Nws cov lus txib yuav ua rau peb muaj kev zoo siab thiab txais yeeb koob. Thiab yog tias peb ua raws nraim txoj kev yog, peb yuav tawm ntawm txhua yam teeb teem—tsis hais tej teeb meem ntawd loj npaum li cas—thiab rov qab mus saum ntuj ceeb tsheej.
Txawm tsis muaj huab ib ncig ntawm peb los sis muaj huab tsaus ntuj nti, vim peb yog Yexus Khetos cov pab coj, peb yuav tsum nrhiav Vajtswv lub nceeg vaj thiab Nws txoj kev ncaj ncees ua ntej, thiab paub tias yog peb ua li ntawd, txhua yam tsav uas peb xav tau los peb yuav tau txais (saib Mathais 6:33).
Yog ib zaj tseem ceeb rau peb lub neej!
Thaum peb haj yam xav ntsoov txog peb tej teeb meem, peb tej kev nyuaj siab, peb tej kev ua xyem xyav, thiab peb tej kev ntshai, ces haj yam yuav nyuaj rau peb. Tiam sis yog peb tsom ntsoov rau lub ntuj ceeb tsheej thiab txog kev xyiv fab ntawm txoj kev taug kev ntawm ib tug pab coj—thaum peb hlub Vajtswv, thiab pab peb cov neeg zej zog—ces peb haj yam yuav kov yeej thaum peb raug teeb meem thiab kev ntxhov siab.
Cov phooj ywg, txawm cua hlob npaum li cas nyob ib puag ncig peb, Yexus Khetos txoj moo zoo yeej yog txoj kev zoo tshaj plaws kom peb tsaws tau nyob hauv peb Leej Txiv Saum Ntuj Ceeb Tsheej lub nceeg vaj.
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais First Presidency Message, February 2016. Hmong. 12862 295
Qhia los ntawm tsab Xov No
Thawj Tswj Hwm Uchtdorf ntuas kom peb “tso siab rau Vajtswv thiab rau siab tsom ntsoov rau kev ua ib tug neeg ntseeg.” Cia li xav seb puas xav nug cov uas koj qhia seb lawv ua li cas kom tsom ntsoov rau “lub ntuj ceeb tsheej thiab txog kev xyiv fab ntawm txoj kev taug kev ntawm ib tug pab coj” thaum tej lub sij hawm uas lawv raug sim siab. Tej zaum koj yuav xav caw lawv xav txog tej yam lawv ua tau kom tsom ntsoov rau lawv zaj lus tim khawv thiab Khetos thaum lawv raug kev nyuaj thiab thov Vajtswv thiab txiav txim siab tias yuav ua li cas kom siv ob peb lub tswv yim nyob hauv lawv lub neej.