Jok ilo Ejjeļo̧k Uwōta Men̄e Aeer Mejatoto

Raan ko ļo̧k, n̄a im Harriet, kōmro kar pād ilo juon jikin jok an baļuun alooje an wājepdik an baļuun ko jok. Raan eo ekar juon raan ekōtoto, im kajoor in kōto ko me baļuun kein raar deplo̧ki ilo iien aer kajjieon̄ jok, ekar kōm̧m̧an bwe kajjojo baļuun en okoktak iaļen im ejjaļaaļ ilo iien aer kajjieon̄ jok.

Ilo am kalimjōk wāween in epen ikōtaan mennin kōm̧anm̧an ko im mijiin in, ij keememej kar juon aō kaminene in ekkāke im pedped in katak ko ikar katak ijo—im tokālik kar katakin rikkāke ro jet ilo kamminene in.

“Jab lukkun kōjebwebweik baļuun ņe n̄an kōņaan ņe am,” ekkā aō ba n̄an er. “Pād wōt; jab parōk. Kalimjōk wōt ļain eo ioļapļap in iaļ in jikin jok im kelo̧k eo. Eļan̄n̄e kwoj keļok jāne kōn kōņaan eo am̧ make, kōm̧m̧an oktak ko rōmōkaj ak ren tiljek. En wōr am̧ leke baļuun eo. Kwon kelo̧k wōt m̧ae iien edikļōk an ekkōtoto.”

Rikkāke ro reminene, remeļeļe bwe ejjab aolep iien remaron̄ in dāpij oktakin men ko me rej waļo̧k ipeļaakier. Ejjeļo̧k aer maron̄ in kabōjrak an aeer mejatoto. Ejjeļo̧k aer maron̄ in kaabdikļo̧k an wōt ak sno. Ejjeļo̧k aer maron̄ kabōjrak an ekkōtoto ak ukot iaļen kōto ko.

Ak er rej barāinwōt meļeļe bwe ej juon bōd n̄e jej mijak aeer in mejatoto ak kōto ko rekajoor—im eļaptata ad wiwijet im maron̄ jab kōm̧m̧an jabdewōt n̄ani. Wāween eo bwe jen jok ilo ejjeļo̧k uwōta n̄e jekjek ko rej oktak ej n̄an pād wōt ilo iaļ in ekkāke eo ejim̧we āinwōt ewājapdik im emaron̄ tōprak.

Ke ij kalimjek an joktok juon baluun im bar joktok juon im kepaak jikin bōjrak eo aer im ikar ememej pedped in katak ko ikar katak iiō ko āinwōt juon rikkāke kōn baļuun, ikar ļōmņak eļan̄n̄e ekar ejjeļo̧k juon katak ilo mennin n̄an mour ko ad.

Jej jab maron̄ dāpij lan̄ ko me jej ioon i ilo mour ko ad. Jet iien men otemjej rejjab ekar n̄an kōņaan ko ad. Jemaron̄ abōņōņō kōn apan̄ ko ad, ebbweer, mijak, būrom̧ōj, ak inepata.

Ilo iien rot kein, elukkuun pidodo ad pād ilo men otemjej ko rebōd im jekōm̧m̧an bwe ļōmņak ko ad ren obrak kōn inepata. Kapo in ej kōm̧m̧an bwe jen kalimijōki wōt mālijjon̄ ko jej jelm̧ai ijjelo̧kin ad kalimjōke wōt ad Rilo̧mo̧o̧r im naan in kam̧m̧ool eo kōn m̧ool eo.

Bōtaab ejjab wāween eo em̧m̧an in n̄an kōjjebwebweik kōj kōn apan̄ ko ilo mour in.

Ilo ejja wāween in wōt me juon rikkāke eo elōn̄ imminene ko ippān eo ejjab lukkuun ļōmņak kōn lan̄ ko ak ej lukkuun ļōmņak kōn ioļapļap in jikin jok eo im kajim̧weik jikin eo enaaj jok ie, kōn menin jej aikuj lukkuun kalimjōk wōt barāinwōt ioļapļap in tōmak ko ad—ad Rilo̧mo̧o̧r, gospel eo An, im karōk eo an Jemedwōj Ilan̄—im kōttōbar eo ad eļap—bwe jen maron̄ jepļaak ilo ejjeļo̧k uwōta n̄an mejān kajjik eo ad ilan̄. Jej aikuj lōke Anij im pād wōt ilo iaļ in ainwōt juon rikaļoor n̄an mijōk wōt kijejeto ko ad. Jej aikuj kōjparok mejād, būruwōd, im kōļmenļo̧kjeņ n̄an mijōk bwe jen mour ilo mour eo jejeļā jej aikuj mour kake.

Kwaļo̧k ad tōmak im lōke ilo Jemedwōj Ilan̄ ilo ad m̧ōņōņō in kōjparok kien ko An enaaj bōktok n̄an kōj lem̧ōņōņō im aiboojoj. Im eļan̄n̄e jej pād wōt ilo iaļ in, jenaaj dōblo̧ke jabdewōt aeer in mejatoto—jekdo̧o̧n ewi jon̄an an kajoor—im jemaron̄ jepļaak ilo ejjeļo̧k uwōta n̄an m̧weo imōd ilan̄.

Mekarta mejatoto eo ipeļaakid erreo im alikkar ak eobrak kōn kōdo ko rekaam̧ijak, āinwōt juon rikaļoor an Jisōs Kraist, jej aikuj m̧okta pukōt aelōn̄ in Anij im kwojarjar eo An, ilo ad jeļā bwe eļan̄n̄e jej kōm̧m̧an āindein, men otemjej jej aikuji aaet naaj itok (lale Matu 6:33).

Ta ejjab juon katak eaorōk ilo mour in!

Ilo an ļap wōt ad ļōmņak kōn apan̄ ko ad, ad likjab, ad pere, im ad mijak, ekōm̧m̧an an penļo̧k men otemjej. Ak n̄e ej ļapļo̧k ad kōļmenļo̧kjeņ kōn mejān kajjik eo ad ilan̄ im kōn kam̧ōņōņō ko rej waļo̧k itok wōt jān ad ļoor iaļ in an rikaļoor—iakwe Anij, jipan̄ ro rūtūrir—enaaj lapļo̧k an jejjet ad kōjebwebweiōk mour ko ad ilo iien jorrāān im aen̄wan̄wā in mejatoto.

Ro m̧ōtta, jekdoon ewi jon̄an an mour ko ad ioon apan̄, gospel eo an Jisōs Kraist enaaj aolep iien letok iaļ eo em̧m̧antata bwe jen kōm̧m̧ane juon jok eo ejjeļo̧k uwōta ie ilo aelōn̄ eo an Jemedwōj Ilan̄.