Aenōm̧m̧an ilo Būruwō
Jān Carol F. McConkie
Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄ ro
Ke eaar ralitōk aō iiō, iaar lo rikanaan, Būreejtōn David O. Mckay (1873–1970). Eaar itok bwe en aje im̧ōn jar eo ekāāl ilo Palmyra, New York, USA. Baam̧le eo aō rekar etal n̄an aje eo. Ekar bar lōn̄ armej ro raar barāinwōt itok. Kōm̧ ar aolep m̧ōņōņō in lo rikanaan eo!
Iaar lukkuun kadu, kōn menin ekar lukkuun pen n̄an aō lo armej ro ipeļaakū. Ak imaron̄ in kar en̄jake iakwe eo an Būreejtōn Mckay. Ilo jidik iien, iaar lo mouj in ko̧ļaan bōran im jouj ilo turin mejān. Iaar ļōmņak, “En̄in ej piktokin juon rikanaan an Anij.” Iaar riit kōn rikanaan ro ilo jeje ko rekwojarjar, ak en̄in kar kein kajuon aō lo juon rikanaan ak jabdewōt Ritōl Routiej ilo nememein armej. Iaar jeļā bwe rikanaan ro rej m̧ool in armej. Im rej iakwe kōj! Inaaj iien otemjeļo̧k keememej iakwe im aenōm̧m̧an eo iaar en̄jake raan eo.
Ke eaar 11 aō iiō, eaar bar wōr aō en̄jake me ekar jipan̄ eō en̄jake aenōm̧m̧an ilo būruwō. Kweilo̧k eo eļap an stake ekar epaak tok, im iaar aikuj in al ippān kumi in al eo an stake. Iaar lukkuun m̧ōņōņō! Iaar kōņak juon jōōt mouj em̧m̧an, im iaar en̄jake aenōm̧m̧an. Al eo kōm̧ kar al kake ekar naan ko jān Jon 14:27, “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄a ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.”
Naan kein raar lukkuun im̧we būruwō, im iaar keememeji jen tōre eo. N̄e ij al naan kein, ijeļā raar m̧ool. Iaar en̄jake an Jetōb Kwojarjar jiron̄ eō bwe ilo aō lo̧o̧r Jisōs Kraist ej jipan̄ eō en̄jake aenōm̧m̧an. Jen tōre eo, jekdo̧o̧n n̄e ij ioon apan̄ ko, eoon kein rej itok n̄an kōļmenļo̧kjeņ eo aō im letok n̄an eō aenōm̧m̧an. Mool eo me iaar jeļā kake ke iaar dik eaar kōjeram̧m̧an mour e aō.