Sam Pesos blong Papa long Heven
Woman we i raet i stap laef long Not Karolina, YSA.
“Kipim olgeta komanmen. I gat sefti mo pis” (luk long Children’s Songbook, 146).
Ana i kakae las pis blong totila blong hem. Hem i sopsop mo olsem i tes naes tumas. Ana i laekem tumas ol totila blong bubuwoman blong hem. Oli bes pat blong kaekae long moning.
Ana i lukluk bubuwoman blong hem, Abuela, i wasem ol plet.
Hem i semmak olsem evri moning. Be i gat wan samting we i no semmak.
Abuela i stap wokbaot nomo i go long maket blong pem kaekae. Be i no tedei. Tedei, i no gat mane blong pem kaekae.
“?Bae mifala i kakae wanem tumoro?” Ana i askem hemwan.
Nao Ana i tingbaot. !Hem i save se weaples i gat mane! Las naet, hem i luk Abuela i putum sam pesos insaed long wan smol waet klos.
“Abuela, ?yu fogetem? Yu gat mane blong pem kaekae.”
“?Wanem mane?” Abuela i askem.
Ana i ron blong karem mane i kam. Hem i seksekem smol bag ia wetem ol koen. !Kling! !Kling!
Abuela i smael. “Hemia taeting blong yumitu, Ana. Hemia i mane blong Hem.”
“?Bae yumitu kakae wanem tumoro?” Ana i askem.
“Yu no wari,” Abuela i talem. “Mi gat fet se Papa long Heven bae i helpem yumitu.”
Long nekis moning, Abuela i givim las kon totila long Ana. Nao hem i sidaon long jea blong hem. Hem i stap somap ol red flaoa long wan dres mo i stap talem ol stori blong taem we hem i wan smol gel. Hem i no luk se hem i stap wari.
Nao Ana i harem man i noknok long doa. Ana i ron blong openemdoa.
“!Angkel Pedro!”
Angkel Pedro i talem: “Mi gat wan filing blong visitim yutufala.” Hem i putum tri basket antap long tebol. Insaed long wan i gat ol kon totila. Long narawan i gat mit. Long narawan moa i gat fres vejetebol we i kam long maket.
“O gudfala boe blong mi,” Abuela i talem. “!Bae mi mekem bes mitbol sup blong yu kakae!”
Angkel Pedro i talem: “Sup blong yu i beswan long wol.”
Ana i laf mo klapem han blong hem.
Afta hem i stop. I gat wan samting we hem i bin wantem save. “Abuela, yu yu bin save se bae Angkel Pedro bae i kam tedei? ?Hemia nao yu no stap wari long hem?”
“No” Abuela i talem. “Taem mi pem taeting blong mi, mi gat fet se Papa long Heven bae i blesem mi. !Mo Hem i mekem!“
Ana i haggem Abuela. Hem i filim se hem i gel we i moa hapi long Meksiko. Hem mo Abuela, tufala i gat fet long Papa long Heven. !Mo naoia, hem i no save wet blong kakae gudfala sup blong Abuela!