Domodra na Yalododonu Edaidai
Laki Vukei Koya
Thomas Robbins, California, Amerika
Au a duri tu ena laini ena dua na siteseni ni vakatawa kasi. E liu vei au, a kerea e dua na tina vata kei na rua na gone lalai e $3 na ivakarau ni kasi kei na rua na aisi kirimu vanila vakabilo.
Ena imatai ni wanono au sa rawa ni raica ni tiko e lailai sara vei iratou. Rau a sega ni vakaivava tu na gone ka daramaka voli na isulu kadresu.
Au rogoca ni biuta na marama na ka sa vaka me iwiliwili taucoko ni ilavo taqiri ena teveli me sauma na nona bili.
Ni oti na saumi ni noqu kasi, au a gole yani ka dikeva na motoka nei la na marama. E sa dua vei ira na motoka makawa ka rawa ni kana kasi vakalevu sara.
Au a vakila e dua na tavidi ni loloma kivua na tina ni rua oqo, ia au a tekivutaka ga na noqu motopai ka draiva yani.
Vakalailai ga na noqu toso tiko ena gaunisala levu, a rogo mai vei au e dua na domo: “Laki vukei koya.” A basika mai vakarua na veivakauqeti.
Au a kuretaka na uluqu, ena kena nanumi ni sa na rairai biubiu oti o koya. Na cava madaga meu na kaya vua?
A basika vakamatata mai na domo ena ikatolu ni gauna: “Laki vukei koya!”
Au a vuki lesu ki na siteseni ni veiqaravi, ka vakasamataka voli na ka meu na tukuna kevaka e se tiko ga ekea o koya.
Niu yaco yani, au raica ni ra tadola tu na katuba ni nona motoka. A toka o koya ena idabedabe ni draiva, ka rau maleleta voli na luvena lailai e rua na medrau aisi kirimu ena idabedabe emuri.
Au a cabora e dua na masu lailai, ka tarogi Tamada Vakalomalagi se cava meu na tukuna. A kaya vei au na domo vataga, “Vakatakilai iko ka taroga ke gadreva o koya na veivuke.” Au a torova yani na nona motoka ka vakatakilai au. Au wasea vua niu a vakauqeti meu tarogi koya ke bau gadreva tu na veivuke.
Sa tekivu tagi o koya ka kaya, “Au se qai vakacavara toka ga na masu kivei Jisu, ka kerei Koya me tala mai e dua me vukei au.”
A sauma na Tamada Vakalomalagi na nona masu. Au a sauma me vakatawani sara na nona taqe ena kasi ka solia vua na naba ni talevoni ni dua ena neitou kuoramu ni talatala qase ka sa vaqara tamata voli ena gauna oya. Au sega ni kila na ka sa yaco emuri kivua na tinani gone oqo, ia au sa vakavinavinaka niu a muria na veivakauqeti meu vukei koya.