Klumech er a First Presidency, Ongeua el Buil 2016
Ulaoch me a Ocholt el mora Dersta el Chad
Mla er a President Henry B. Eyring
Kot el Counselor er a First Presidency
A mera el Ikelesia er a Jesus Kristo a mla moluut e ngara beluulechad er chelechal sils. A Ikelesia er a Jesus Kristo er a Uriul-klebesei el Santo a di mla ulekrael er a re ngar el profet me a re apostol, el tir a melemolem el melai a ulekrael ngeso er a babeluades.
Tial chedaol teletael a di mla klemerang er a ngara mong el taem. Kede subii er a chelsel a Biblia el kmo: “Ng klemrang el Dios a diak a ngera el bo loruul, le ng di ocholt a bertelel el mora remesiungel el reprofet” (Amos 3:7).
A Dios a mla lmuut el mengedecheduch er chelechal temed, lokiu a Profet Joseph Smith. Ng ulechotii a cherrengelel ebangkelio er a Jesus Kristo lokiu a Profet Joseph. Ngii a ulutii a chedaol priesthood er Ngii lobengkel a ikel rokui el kiis er a llemalt, me a klisiich, me a urerel a chedaol klisichel a priesthood.
Chelechal sils, e a re ngar el profet me a re apostol a ngarngii a lemeltir el mengedecheduch, olisechakl, e omekrael loba ngerachel el mla er a Dios el Chedam me a Rubak el Jesus Kristo. A Osobel a dilu er a Profet el kmo, a ikel kdung ngak el Rubak, a kulekoi e diak lak bo kuruul le eanged me a chutem a mo nguemed, eng di a tekingek a diak el ngemed, e di mo tmaut el rokui, a le tobed er a ngerek malechub eng tuobed er a ngerir a remesiungek, e ng diosisiu (D&C 1:38).
Chelsel a klou el ongdibel el eru er a tal rak, e kede ngeltengat er a techall el remenges a tekingel a Rubak lokiu a Remesiungel. Tia diak a mo mengaisisiu er ngii el techall. Eng di a klungiolel tial techall a di iior kid el kmo kede remenges aika el tekoi lokiu a osisiu el Reng el uai sei er a de ngai lokiu a remesiou el chad (mesa D&C 50:19–22). Tir el ngmai a ulekrael er a babeluades, me kid me ngosisiu. Meng kired el mo blak a rengud el kirel a chedaol tekoi.
“Mruul a Urerem”
Bebil el rak er a memong e a tara chedal a Chelechad er a Teruich me a terung el Apostol a ulelengit er ngak el mo choiuii a cheldechedechal er a chelsel a klou el ongdibel. Ak mle ngeasek el chedal tial chelechad. Ng mlo ungil a renguk el kmo ngii oumerang er ngak el mo ngoseuir er a tekoi el Rubak a soal a bol dung. Ng mlo klikmechur e dula er ngak el kmo, “E a, tia mong meng lluich me a eru lomelchesel tial cheldechedechak.”
Ak lotkii a tekingel a bekokeuii el President Harold B. Lee (1899–1973) le dillii er ngak ruchei el kmal dmolech a belkul: “Hal, alsekum eng soam el mo ngmai chedaol ocholt, e mruul a ngerchelem.”
Ak milenguiu, e melbedebek, e meluluuch el kirel tial lluich me a eru lomelchesel tial cheldecheduch. Ak mlo er sel tkul er bab el sebechek el mesuub loltirakl er a Chedaol Reng. Sel taem er a bocha lolekoi er tial cheldechedechal, e ngak a mla kudmeklii a ngerchelek. Ng diak kudengei el kmo ngarngii ak ngilseuir, eng di ak medengei el kmo ak mlengodech er sera krengesii tial cheldecheduch. A tekoi el krirenges a mle chengelakl er a ikel tekoi el bla krenges me a le dilung. Ng mle dmolech a belkul aikal tekoi er a ikel ngii ak chiluiu er a chelsel tial cheldecheduch. E a tekoi er a chelsel a kmal melutk el kirek, el kmal kusbech.
A remesiungel a Dios a olsengerenger e meluluuch el kirel a klumech el Ngii a mo omesterir el kirir tirkel lousbech a chedaol ocholt me a ulekrael. Sel ksilubii er tial teletael, me a lmuut el bebil, a kmo alsekum eng soad el mo ungil remenges a klemechir a re ngar el profet me a re apostol, eng kired el mo er sel tkul er bab el sebeched el mo ngmai ocholt.
A Rubak a betik a rengul er a rebek el chad el tir a remenges a Klemechel, e Ngii a medengei a chelsel a rengrir me a teletael el tir a ngara chelsel. Ngii a medengei el kmo ngera el ungil tekoi, ngera lolisiich el tekoi, ngera el klemrang er a ebangkelio a ungil mo ngosuterir a dersta el chad el mo ngiltii a rael el bedul a diak a ulebengelel el klengar.
Kid el lorrenges e omes a klumech el medung er a chelsel a klou el ongdibel a bebil er a taem e kede oker ruriul, “Ngera ikel ksal dobedebek el tekoi el mildung?” A urungulel a Rubak el mera dersta er kid a bo donger el kmo: “Ng kmal diak kubes er a taem el blo kulchesuar a Chedaol Reng er a uldesuek me a renguk louchais er ngak aikel kirek el meruul el uchul e a Chedam er a Babeluades me a Osobel a mo ungil a rengrir.”
Ng sebeched el nguu tial chedaol locholt sel dorrenges er a reprofet me a reapostol e doureor lultuil er a klaumerang el mo melai, el di uai ea ikel le dilung a President Lee. Ak medengei el kmo tia kmal klemerang lokiu a teletael dilubech me a dirrek el sioning er a Chedoal Reng.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, April 2016. Palauan. 12864 881
Osischeklel tia el klumech
Ng sebechem el mo menguiu er sel cheldechedechal a President Eyring el kirel omesubel er sel cheldechedechal a chedal a le ngarngii el chelechad er a temel a klou el ongdibel. Ng sebehem e loker, “Ngera klungiolel chedaol ocholt?” Uriul er a omsodii, eng sebechem el siotai er tirkal chad el mo melbedebek e mo oltirakl er a moktek el kirel a merael mei el klou el ongdibel “lokiu odbechel osisiu el Reng el mlora remesiungel a [Dios].”