Iren Mahsen en Presidensi Keieu, Epreil 2016
Kokohpoh Pein Atail Kaudial
Sang President Henry B. Eyring
Sounsawas Keieu nan Presidensi Keieu
Mwomwohdiso en Sises Krais mehlelo kopwurupwurdohr oh mihmiher pohn sampah rahnwet. Ansou koaros soukohp oh wahnparon me ieias kan me kin kaukaweid Mwomwohdiso en Sises Krais en Souleng en Imwin Rahn akan, kin aliale kaweid poatoapoat sang nanleng.
Doadoahk sarawi wo pil mehlel sangete ni tapio. Kitail kin esehla sang nan Pwuhk Sarawi: “Kauno Koht sohte pahn ketin wia mehkot, ahpw e kin ketin kasalehieng sapwellime ladu kan, soukohp kan, kupwur rir kan” (Amos 3:7).
Koht ketin pwurehng mahsen nan atail ansou wet, sang Soukohp Joseph Smith. E ketin kasalehiong Soukohp Joseph rongamwahu en Sises Krais ni unsek. E ketin kapwurehdo Sapwellime priesthood sarawio iangahki kih kan oh mweimwei kan, manaman akan, oh doadoahk kan en manaman sarawi en priesthood.
Nan rahn pwukat, soukohp oh wahnparon ieias kan mweimweieng ren koasoai, padahk, oh kaweid ni mweimwei sang Samatail Koht oh Kaun Sises Krais. Sounkomouro masanihieng Soukohpo, “Dahme ngehi Kauno masaniher, I masanihier, oh I sohte kin wekidala; oh ma sampah oh nanleng pahn sohrala, ahi mahsen sohte pahn sohrala, ahpw soahng koaros pahn pweida, mehndahte ma sang ni pein ngilei de sang ni ngilen nei ladu kan, e duwepenehte” (D&C 1:38).
Nan kapokon lap me kin wiawi pak riau nan ehu pahr, kitail kin kapaikihda ansou mwahu en rong mahsen en Kauno ong kitail sang rehn irail Sapwellimahr ladu kan. Ansou mwahu ieu mwo me soh-isepe. Ahpw kesempwalpen ansou mwahuo pid ma kitail kin alehdi mahsen kan sang ni kaweid en Ngehnohte me kohiengehr irail ladu ko (tehk D&C 50:19–22). Duwehte arail kin alehdi kaweid sang nanleng, kitail pil anahne wia oh mwo kin anahne kitail koaruhsie en pil song wia soahngohte.
“Wia Ahmw Doadoahk”
Sounpar kei samwalahro emen me towe Wahnparon Ehk-riemen ko peki rehi I en wadek ehu padahk me e wie kaukaunop ong kapokon lap. I wia towe pwulopwul men nan pwihno. I kapingki ah liki me I ele kak sewese ropada koasoai kan me Kauno pahn ketin kupwurki en nda. E sirei oh ndahiengie, “Oh, met wia ke-rieisek-riau en kamwomwadahn padahko.”
I tamanda kaweid me emen President mwahu oh kadek Harold B. Lee (1899–1973) kihongiehier mwowe ni kaweid mwahu: “Hal, ma ke men alehdi kaudiahl, wia ahmw doadoahk.”
I wadekehr, douloalehier, oh kapakapkiher ke-rieisek-riau en kamwomwadao. I onopehr ni uwen ahi kak koaros pahn kaweid en Ngehn Sarawio. Ni ansou me ih me towe pwihno wia ah padahko, I kanekelahr ahi pwukoaho. I sohte kamehlele me I wiahier sawas, ahpw I ese me I wekila ni ansou me I rong padahko eh wiawio. Iren kaweid kan kodohngie ahpw sohte nohn duwehte me I wadekehro oh me e padahngkio. Mahsen ko tehtehki wehwe laud sang dahme I wadekehr nan kamwomwadao. Oh koasoaio mwomwen wehwehiengie, pwungieng ahi anahn ko.
Ladu kan en Koht kin kaisihsol oh kapakap pwe ren alehdi ilek me E sapwellimaniki ong irail pwe ren kiheng irail kan me kin anahne kaudiahl oh kamarain. Dahme I wehwehkihla sang ni mwekido, oh pil soahng tohto me duehte, iei en alehdi soahng mwahu tohto me mie sang ni rongorong irail soukohp oh wahnparon ieias kan, kitail udahn pahn pein wiahieng kitail en kin aliale kaudiahl.
Kauno ketin poakohng aramas koaros me kin rong Sapwellime kaweid de mahsen, oh E ketin mwahngih mohngiong kan oh soahng kan me pid ehu ehu. E ketin mwahngih dahme anahne kapwungpwungla, soangen kangong da, oh soangen rongamwahu mehlel da me pahn sewese mwahu emen emen aramas pwe en kak pilada ahl me en weidie ong mour soutuk.
Kitail kan me kin rong oh kilang iren kaweid kan en kapokon lap kin ekei ansou medewe mwuri, “Dahme I tamataman me keieu mwahu?” Sapwellimen Kauno kopworopwor ong emen emen kitail iei me atail pasapeng pahn: “I sohte pahn manokehla ansou ko me I pehm kepitien Ngehno nan ahi madmadau oh mohngiong eh mahmahsanihongie me dahme I kak wia pwehn koaloalamwahuih Semeio Nanleng oh Sounkomouro.
Kitail kak alehdi pein atail kaudiahlo ansou me kitail rong soukohp kan oh wahnparon kan oh ni atail kin doadoahk ni pwoson pwe kitail en alehdi, me duwehte dahme President Lee mahsanih me kitail kak. I ese me mwo mehlel sang dahme I wehwehkiher oh sang ni kadede en Ngehno.
© 2016 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, April 2016. Pohnpeian. 12864 885
Padahk sang ni iren mahsen wet
Song wadek laud ahn President Eyring koasoai me pid kin onop kamwomwadahn ahn tohn pwihn en tiepeneo padahk. Kumwail kak idek, “Ia kesempwalpen alehdi kaudiahl?” Mwurin amwail koasoaipenehr, kumwail kak luke irail kan me kumwail kin pwarek ren douloale oh doadoahngki ehu kosondi mehn ren kak alehkihdi iren mahsen kan en kapokon lap me kohkohdoht “ni kaweid en Ngehnohte me duwehte me kohiengehr [Sapwellimen Koht] ladu kan.”